'നിന്റെയൊക്കെ പേരിൽ എത്ര പരാതികളുണ്ടെന്നറിയാമോ? പെണ്ണുകേസുകൾ വേറേ!'; കള്ളുഷാപ്പിൽ കയറി പോലീസ് അലറി

സംഭവം നടക്കുന്നത് ഒരു ശനിയാഴ്ച രാവിലെയാണ്. കോളേജ് ജങ്ഷനടുത്തുള്ള കട്ടങ്ങനാൽ ലോഡ്ജിലായിരുന്നു അക്കാലത്ത് താമസം. അവധിദിവസമായതുകൊണ്ട്, പതുക്കെ എഴുന്നേറ്റ് പത്തുമണിയോടെ ഭക്ഷണം കഴിക്കാൻ പോയത് ഷാപ്പിലേക്കാണ്. പകലായതുകൊണ്ട്, 'മദ്യപാനം പകലരുത്, പലരരുത്' എന്ന വേദവാക്യം ഞങ്ങൾ അങ്ങോട്ടുമിങ്ങോട്ടും തമാശയായി പറഞ്ഞുകൊണ്ടിരുന്നു. അല്ലെങ്കിലും അങ്ങനെയൊരു ദുരുദ്ദേശ്യമില്ലായിരുന്നു. ഞങ്ങളെ അസമയത്തു കണ്ടപ്പോൾ ഷാപ്പുടമയ്ക്കു പ്രത്യേകിച്ചൊന്നും തോന്നിയില്ല. കാരണം, മിക്കവാറും അവധിദിവസങ്ങളിൽ അതൊക്കെ ഞങ്ങളുടെ പതിവായിരുന്നു. ഷാപ്പുടമ ഞങ്ങൾക്കു വേണ്ട വിഭവങ്ങളൊക്കെ മേശപ്പുറത്തു നിരത്തി. 

'മൂക്കാത്ത ഓരോന്നെടുക്കാം. രാവിലത്തേതാ... ഇപ്പോൾ വന്നതേയുള്ളു.' കള്ളിന്റെ കാര്യമാണയാൾ പറഞ്ഞതെന്നറിയാമായിരുന്നെങ്കിലും ഞാനൊന്നും പറഞ്ഞില്ല. കൂട്ടുകാരിലൊരാൾ ചിരിച്ചുകൊണ്ടു പറഞ്ഞു: 
'ചേട്ടാ, പകലരുത് എന്നല്ലേ?'
'എന്നാൽ അങ്ങനെയാകട്ടെ.' അയാളും പറഞ്ഞു. 

Content Highlights: Thampy Antony shares memories of the Kerala emergency period