ജർമൻകാരിക്ക് കിട്ടിയ ഇന്ത്യൻ കടിയും മെഗാ സീരിയലുകാരുടെ നല്ല നടപ്പും

അഖിലലോക കുടിലതന്ത്ര, കണ്ണീര്‍ സീരിയലുകള്‍ക്കു കര്‍ട്ടന്‍ വീഴുമോ? പ്രിയതമ ലലനാമണി ആകെ ആശങ്കയിലാണ്. സീരിയലുകള്‍ക്കെതിരേ വനിതാകമ്മിഷന്‍ വടിയെടുക്കാനുള്ള സാധ്യത കാണുന്നുണ്ട്രേത. നൂറും ഇരുന്നൂറുമൊക്കെ കഷണങ്ങളാക്കി സീരിയല്‍ റബ്ബര്‍പോലെ വലിച്ചുനീട്ടുന്നത് അത്ര ശുഭകരമല്ലെന്നായിരുന്നു കമ്മിഷന്റെ വിലയിരുത്തല്‍. പഴയ ശുപാര്‍ശയാണിതെന്നും സെന്‍സര്‍ ബോര്‍ഡിന്റെ കത്രികപ്രയോഗമാണു ലക്ഷ്യമെന്നു ഘടോല്‍ക്കചന്‍ പിള്ള പറഞ്ഞുനോക്കിയിട്ടും ഓള്‍ക്കു വിശ്വാസം പോരാ.

വലിച്ചുനീട്ടിയില്ലേല്‍ അതു സീരിയല്‍ ആകുന്നതെങ്ങനെ എന്ന സംശയം ന്യായം. സീരിയല്‍ സീരിയസായാല്‍ സങ്കടം, സഹതാപം ഇത്യാദി വികാരവിചാരങ്ങളുടെ വേലിയേറ്റം വൈകുന്നേരം വീട്ടിലുണ്ടാകില്ലെന്നൊരു ആശങ്കയുമുണ്ട്. മിനിസ്‌ക്രീനിന് ഉള്ളിലേയും മുന്നിലേയും കണ്ണീര്‍ പ്രളയം കണ്ട് പണ്ടേ ഉള്ളുലഞ്ഞതാണ്. തീപ്പൊരി ചാനല്‍ ചര്‍ച്ച കാണണോ കണ്ണീരും കുതന്ത്രവും കാണണമോ എന്ന തര്‍ക്കത്തില്‍ തട്ടി റിമോട്ട് കണ്‍ട്രോള്‍ എന്ന നിയന്ത്രണയന്ത്രം നിലതെറ്റി തറയില്‍ വീണ് പലതവണ തവിടുപൊടിയായിട്ടുണ്ട്. ചര്‍ച്ചയിലെ കഥാനായകന്മാര്‍ക്കാണോ സീരിയലിലെ കഥാപാത്രങ്ങള്‍ക്കാണോ അഭിനയമികവെന്നതും തര്‍ക്കവിഷയമായ ചരിത്രമുണ്ട്.

Content Highlights: kaladosham-kuttanadan-serial-seaplane-satire-kerala