കയ്യിലെത്ര കാശുണ്ടായാലും ഈസി മണി വേണം; മലയാളിയെ പറ്റിക്കാൻ എന്തെളുപ്പം...!

പകരം കിട്ടുന്നത് മണ്ണായാലും പൊന്നായാലും പെണ്ണായാലും കയ്യിലെ കാശ് മറ്റൊരാള്‍ക്ക് എണ്ണിക്കൊടുക്കുക എന്ന് പറഞ്ഞാല്‍ എനിക്ക് സഹിക്കൂകേല. രാവണപ്രഭു എന്ന സിനിമയില്‍ രതീഷ് വിജയരാഘവനോട് പറയുന്ന ഡയലോഗാണിത്. അയ്യോ ശരിയാണ്, എനിക്കാണേ ചങ്ക് പറിഞ്ഞുപോകുന്ന വേദനയാണ് എന്നായിരുന്നു വിജയരാഘവന്റെ മറുപടി. ജഗതിയില്‍നിന്ന് വാങ്ങിയ സ്ഥലത്തിന്റെ കാശ് എണ്ണിക്കൊടുത്തിട്ട് ഇരുവരും ചെയ്ത വേല ക്ലാസിക് തറപ്പണിയായിരുന്നു. കാശുമായി പോയ ജഗതിയെ വ്യാജ എന്‍ഫോഴ്സ്മെന്റുകാരെ ഉപയോഗിച്ച് വഴിയില്‍ തടഞ്ഞ് നിര്‍ത്തി കണക്കില്ലാത്ത പണമാണ് അതെന്ന് പറഞ്ഞ് തട്ടിയെടുക്കുകയായിരുന്നു. മംഗലശ്ശേരി കാര്‍ത്തികേയനെത്തി രക്ഷപെടുത്തിയതുകൊണ്ട് ജഗതിക്ക് പണം നഷ്ടപ്പെട്ടില്ല. 

പക്ഷേ, മലയാളി ഇപ്പോഴും ഇതേ മാനസികാവസ്ഥയില്‍ തന്നെയാണ് ജീവിക്കുന്നത്. കാശ് കയ്യിലെത്രയൊക്കെ ഉണ്ടെങ്കിലും പിന്നെയും ഈസി മണി എങ്ങനെയൊക്കെ ഉണ്ടാക്കാം എന്ന് മാത്രമാണ് ചിന്ത. അതിനായി എന്തെങ്കിലും ചെയ്യാനൊന്നും നമ്മള്‍ തയ്യാറല്ല. നമുക്കായി മറ്റാരെങ്കിലും പണിയെടുക്കണം. വേണേ അതിനുള്ള ഫീസും നമ്മള്‍ കൊടുക്കും. ആരെങ്കിലും ഇതിനായി ആപ്പ് വികസിപ്പിക്കുന്നുണ്ടോ എന്നാണ് നോക്കുക. അതിനായി സോഷ്യല്‍ മീഡിയ പ്ലാറ്റ്ഫോമിലൊക്കെ വ്യാപകമായി പരതും. സമ്പാദിച്ച് സമ്പാദിച്ച് ലക്ഷാധിപതിയാകാമെന്ന് വിചാരിച്ചിരുന്നിട്ട് ഒരു കാര്യവുമില്ല. എന്തെങ്കിലുമൊക്കെ വ്യത്യസ്തമായി ചിന്തിക്കണം. അതിനല്‍പ്പം റിസ്‌കൊക്കെ എടുക്കണം. അല്ലാതെ കാര്യം നടക്കില്ല. കിട്ടിയാല്‍ ഊട്ടി, ഇല്ലെങ്കില്‍ ചട്ടി.

Content Highlights: Kerala lost ₹1142 Cr to easy money scams in 4 years. Learn how to avoid investment fraud