തെങ്ങിൻ തൈകൾ നടാം, വീട്ടുമുറ്റത്ത് പച്ചക്കറിത്തോട്ടം; മഴക്കാലത്ത് മണ്ണറിഞ്ഞുള്ള കൃഷി, മികച്ച വിളവ്

ജൂൺ മാസം കേരളത്തിൽ മഴക്കാലത്തിന്റെ തുടക്കമായതിനാൽ കൃഷിയിടപരിപാലനത്തിൽ പ്രത്യേക ശ്രദ്ധ ആവശ്യമാണ്. മഴയെത്തുന്നതോടൊപ്പം പുതിയ നടീൽ പ്രവർത്തനങ്ങളും ആരംഭിക്കുന്ന സമയമാണിത്. അതിനാൽ കൃഷിയിടം വൃത്തിയായി സൂക്ഷിക്കുകയും മഴക്കാല മുൻകരുതൽ നടപടികൾ സ്വീകരിക്കുകയും വേണം.

ആദ്യമായി മഴവെള്ളം കെട്ടിനിൽക്കാതിരിക്കാൻ നീർവാർച്ച സംവിധാനങ്ങൾ മെച്ചപ്പെടുത്തുന്നതിനൊപ്പം നിലവിലുള്ള ചാലുകൾ വൃത്തിയാക്കുകയും ചെയ്യുക. മഴ ആരംഭിക്കുമ്പോൾ തന്നെ കൃഷിയിടത്തിൽ ആവശ്യമായ ജലനിർഗ്ഗമന സൗകര്യങ്ങൾ ഒരുക്കുന്നത് ഭാവിയിലെ രോഗബാധ കുറയ്ക്കാൻ സഹായിക്കും. വിളകളിൽ രോഗകീടബാധ ഉണ്ടാകുന്നുണ്ടോ എന്ന് നിരന്തരം നിരീക്ഷിക്കണം. മഴക്കാലമായതിനാൽ ചെടികളിൽ കുമിൾ രോഗങ്ങളും നീരൂറ്റിക്കുടിക്കുന്ന കീടങ്ങളുടെ ആക്രമണവും കൂടുതലായിരിക്കും. തുടക്കത്തിൽ തന്നെ ആവശ്യമായ പ്രതിരോധമാർഗ്ഗങ്ങൾ സ്വീകരിക്കണം. കൂടാതെ രോഗബാധിത ഇലകളോ കൊമ്പുകളോ കണ്ടാൽ അവ നീക്കം ചെയ്യുന്നത് ഗുണകരമാകും. മഴയോടൊപ്പം കളകൾ വേഗത്തിൽ വളരാൻ തുടുങ്ങുന്നതിനാൽ സമയബന്ധിതമായി കളകൾ നീക്കം ചെയ്യണം. ജൈവവളങ്ങൾ, കമ്പോസ്റ്റ്, ശുപാർശ പ്രകാരമുള്ള രാസവളങ്ങൾ എന്നിവ പച്ചക്കറി, വാഴ, കിഴങ്ങുവർഗ്ഗങ്ങൾ, പഴവർഗ്ഗങ്ങൾ തുടങ്ങിയ വിളകൾക്ക് ആവശ്യാനുസരണം നൽകണം. പുതിയ നടീലിന് ഗുണനിലവാരമുള്ള തൈകൾ തിരഞ്ഞെടുക്കുകയും മഴയുടെ തീവ്രത അനുസരിച്ച് ആവശ്യമെങ്കിൽ താങ്ങുകൾ നൽകുകയും വേണം. തെങ്ങ്, വാഴ പച്ചക്കറി തുടങ്ങിയ വിളകളിൽ മണ്ണൊലിപ്പ് ഉണ്ടാകാതിരിയ്ക്കാൻ പുതയിടീൽ നടത്തുന്നതും ഗുണകരമാണ്.

Content Highlights: Prepare your farm for the 2026 monsoon season in Kerala. Learn expert tips on drainage, pest control, and crop protection.