'വീരപ്പനല്ലല്ലോ, ബിജെപി ഓഫീസ് മുന്‍ സെക്രട്ടറിയല്ലേ, സതീശന്റെ വീട്ടിൽ പോയിട്ടില്ല'- ശോഭാ സുരേന്ദ്രൻ
ബി.ജെ.പി. ഓഫീസ് മുന്‍ സെക്രട്ടറി തിരൂര്‍ സതീശനെതിരെ ശോഭാ സുരേന്ദ്രൻ. സതീശന്റെ വീട്ടിൽവച്ചെടുത്തതെന്ന് അവകാശപ്പെടുന്ന ചിത്രം തന്റെ തറവാട് വീട്ടിൽ വച്ച് എടുത്തതാണെന്നും സതീശന്റെ വീട്ടിൽ പോയിട്ടില്ലെന്നും ശോഭാ പറഞ്ഞു. അമ്മ അസുഖബാധിതയായി കിടന്നസമയത്ത് കുടുംബത്തിനൊപ്പം സതീശൻ കാണാനെത്തിയപ്പോൾ എടുത്തതാണ് ചിത്രം. ഫോട്ടോയ്ക്ക് കുറഞ്ഞത് രണ്ടുവർഷമെങ്കിലും പഴക്കമുണ്ട്. താൻ ഇപ്പോഴിരിക്കുന്നതു പോലെയാണോ ചിത്രത്തിലുള്ളത്. സതീശന്റെ ഭാര്യയെയും കുട്ടിയെയും കണ്ടാൽ മാറ്റമില്ലേയെന്നും ശോഭാ സുരേന്ദ്രൻ ചോദിച്ചു. ആരാണ് ഫോട്ടോയിലുള്ളത്, വീരപ്പനല്ലല്ലോ, ബി.ജെ.പി. ഓഫീസ് മുന്‍ സെക്രട്ടറിയല്ലേയെന്നും അവർ ചോദിച്ചു.
ആന്റോ അഗസ്റ്റിനും സതീശനുമെതിരെ മാനനഷ്ടക്കേസ് കൊടുക്കുമെന്നും ശോഭാ സുരേന്ദ്രൻ പറഞ്ഞു. ഇത് ശ്രീഷൻ അടിയാട്ടിന്റെ ബുദ്ധിയാണെന്നും ശോഭാ ആരോപിച്ചു. മാധ്യമപ്രവർത്തകരെത്തുന്നതിന് മുമ്പ് തന്നെ കാണാൻ വന്നത് ശ്രീഷൻ അടിയാട്ടിന്റെ സുഹ‍ൃത്താണെന്നും സതീശനെതിരെ എന്തിനാണ് സംസാരിക്കുന്നതെന്നും സതീശനെ വിട്ടുപിടിച്ചുകൂടെയെന്നും ചോദിച്ചതായും എല്ലാവരെയും കോടതി കയറ്റുമെന്നും ശോഭാ പറഞ്ഞു.