കണ്ടെത്താനായില്ല; സംരക്ഷിത പദവിയിൽ നിന്ന് ഒഴിവാക്കപ്പെട്ട് 18 സ്മാരകങ്ങൾ
ഒരു നാടിന്റെ പൈതൃകത്തിന്റെയും സംസ്‌കാരത്തിന്റേയും അടയാളപ്പെടുത്തലാണ് ചരിത്രനിര്‍മിതികളും സ്മാരകങ്ങളും. എന്നാല്‍ അത്തരം സ്മാരകങ്ങളെല്ലാം അതേ പ്രാധാന്യത്തോടെ സംരക്ഷിക്കുന്നവരാണോ നമ്മള്‍. അല്ല. അതിലേറ്റവും ഒടുവിലെ ഉദാഹരണമാണ് കഴിഞ്ഞ ദിവസം ആര്‍ക്കിയോളജിക്കല്‍ സര്‍വേ ഓഫ് ഇന്ത്യ(എ.എസ്.ഐ) പുറത്ത് വിട്ട ഒരു കണക്ക്. കേന്ദ്ര സംരക്ഷിത സ്മാരകങ്ങളുടെ പട്ടികയില്‍നിന്ന് ആര്‍ക്കിയോളജിക്കല്‍ സര്‍വേ ഓഫ് ഇന്ത്യ(എ.എസ്.ഐ) ഒഴിവാക്കാനൊരുങ്ങുന്നത് രാജ്യത്താകമാനമുള്ള 18 സ്മാരകങ്ങളാണ്. ദേശീയ പ്രാധാന്യം ഇല്ലാതായി എന്നാണ് ഡീലിസ്റ്റ് ചെയ്യുന്നതിനായി ചൂണ്ടിക്കാണിക്കപ്പെട്ട കാരണം.
ഹരിയാനയിലെ മുജേസര്‍ ഗ്രാമത്തിലെ കോസ് മിനാര്‍ നമ്പര്‍ 13, ഡല്‍ഹിയിലെ ബാരാ ഖംബ സെമിത്തേരി, ഝാന്‍സിയിലെ റംഗൂണിലെ ഗണ്ണര്‍ ബര്‍ക്കിലിന്റെ ശവകുടീരം, ലഖ്നൗവിലെ ഗൗഘട്ടിലെ സെമിത്തേരി, ഉത്തര്‍പ്രദേശിലെ വാരാണസിയിലെ ടെലിയ നള ബുദ്ധ അവശിഷ്ടങ്ങളുള്‍പ്പെടെയുള്ള സ്മാരകങ്ങളാണ് പട്ടികയില്‍ നിന്ന് ഒഴിവാക്കപ്പെട്ടത്.