പാകിസ്താനുമായി യുദ്ധമുണ്ടായാൽ സൗദി ഇന്ത്യയ്ക്ക് ഭീഷണിയാകുമോ? അണുവായുധവും കരാറിന്റെ ഭാഗം

ഇന്ത്യയും പാകിസ്താനും തമ്മിൽ ഇനിയൊരു യുദ്ധമുണ്ടായാൽ, അല്ലെങ്കിൽ ഓപ്പറേഷൻ സിന്ദൂർ പോലൊരു ആക്രമണമുണ്ടായാൽ സൗദി അറേബ്യ പാകിസ്താനൊപ്പം നിൽക്കുമോ? ഇന്ത്യയെ ആക്രമിക്കാൻ സൗദി തയ്യാറാകുമോ? പാകിസ്താനും സൗദിയും തമ്മിൽ പ്രതിരോധ കരാർ ഒപ്പുവെച്ചതോടെ പലകോണുകളിൽനിന്നും ഉയർന്നുകേട്ട ചോദ്യമാണിത്. പാകിസ്താനോ സൗദിയോ മറ്റൊരു രാജ്യത്താൽ ആക്രമിക്കപ്പെട്ടാൽ ആ നീക്കം ഇരുരാജ്യങ്ങൾക്കും എതിരായ യുദ്ധമായി കണക്കാക്കപ്പെടും എന്ന കരാറിലെ വ്യവസ്ഥയാണ് ആശങ്കകൾക്ക് വഴിവെച്ചത്. ഇതോടെ ഇന്ത്യ-സൗദി ബന്ധത്തെ ഈ കരാർ ബാധിക്കുമോയെന്ന് ഉറ്റുനോക്കുകയാണ് രാജ്യം. 

റിയാദിൽവെച്ച് സൗദി കിരീടാവകാശി മുഹമ്മദ് ബിൻ സൽമാനും പാകിസ്താൻ പ്രധാനമന്ത്രി ഷഹബാദ് ഷരീഫും ചേർന്നാണ് ഇത്തരമൊരു കരാറിൽ ഒപ്പുവെച്ചത്. ഇതാദ്യമായല്ല സൗദിയും പാകിസ്താനും തമ്മിൽ പങ്കാളിത്തമുണ്ടാകുന്നത്. വർഷങ്ങൾക്ക് മുമ്പുതന്നെ ഇരുരാജ്യങ്ങളും തമ്മിൽ സൗഹൃദ ഉടമ്പടിയുണ്ട്. 1967 മുതൽ സൗദിയിലെ ഒരുവിഭാഗം കമാൻഡോകളെ പരിശീലിപ്പിക്കുന്നതും സാങ്കേതിക ഉപദേശം നൽകുന്നതും പാക് സൈന്യമാണ്. അത്തരത്തിൽ അവർ തമ്മിലൊരു സഹകരണം നിലനിൽക്കുന്നുണ്ട്. ഇതിന്റെ തുടർച്ചയെന്നോണം സൈനിക മേഖലയിലും സുരക്ഷാ മേഖലയിലും സഹകരണം വർധിപ്പിക്കാൻ ഏറെക്കാലമായി ചർച്ചകൾ നടക്കുന്നുണ്ട്. അങ്ങനെയാണ് ഇരുരാജ്യങ്ങളും തമ്മിലിപ്പോൾ പ്രതിരോധ കരാറിലെത്തിയത്. എന്നാൽ നേരത്തെ പറഞ്ഞ അതിലെ സുപ്രധാനമായ വ്യവസ്ഥ കരാറിനെ സൂക്ഷ്മമായി നിരീക്ഷിച്ച് കരുതലോടെ നീങ്ങാൻ ഇന്ത്യയെ നിർബന്ധിതമാക്കി.  

Content Highlights: Saudi Pakistan Defence Pact: Indias Growing Concerns over the NATO Style Clause