സമാധാന കരാര്‍ വന്നാലും യുദ്ധം അവസാനിക്കുമോ? ഗാസയില്‍ ഇനിയെന്തുണ്ട് ബാക്കി?

ആ ഒക്ടോബർ ഏഴ്, ഇസ്രയേലിൽ ഹമാസ് നടത്തിയ ആക്രമണങ്ങളിൽ 1200 പേർ കൊല്ലപ്പെടുന്നു. പിന്നീടങ്ങോട്ട്, 21-ാം നൂറ്റാണ്ടിൽ ആധുനിക മനുഷ്യൻ കണ്ട കൊടും ക്രൂരതകളാണ് ഗാസയിൽ നടന്നത്. ഇന്നുവരെ ഗാസയിൽ ഇസ്രയേൽ നടത്തിയ ആക്രമണത്തിൽ മരിച്ചുവീണവരുടെ എണ്ണം 67,139 ലേറെ വരും. ഒരു മര്യാദയുമില്ലാതെ, ആശുപത്രികളും, ക്യാമ്പുകളും അടക്കം പലസ്തീനികളെ ലക്ഷ്യമാക്കി നടത്തിയ വ്യോമാക്രമണങ്ങൾ. മരിച്ചുവീണവരിൽ 70 ശതമാനവും കുഞ്ഞുങ്ങളും സ്ത്രീകളും. പരിക്കേറ്റവർ 1.62 ലക്ഷം. ഹമാസും കൂട്ടരും നടത്തിയ പ്രത്യാക്രമണങ്ങളിൽ ഇസ്രയേലിൽ കൊല്ലപ്പെട്ടവർ 2291. അമേരിക്കൻ പ്രസിഡന്റ് കൊട്ടിഘോഷിച്ച് നടത്തുന്ന സമാധാന ഉദ്യമം തുടങ്ങിക്കഴിഞ്ഞു, അതും രണ്ടു വർഷം കഴിഞ്ഞ്. ഈ രണ്ടു വർഷം ലോകത്തിലൊരു ശക്തിക്കും പ്രശ്നത്തിൽ ഇടപെടാൻ കഴിയാതിരുന്നത് നമ്മളെ ലജ്ജിപ്പിക്കുന്നു. അതിനുമപ്പുറം, കെട്ടിട അവിശിഷ്ടങ്ങളും, മലിനമാക്കപ്പെട്ട ശുദ്ധജല സ്രോതസ്സുകളും, പുകയും പൊടിയും ചോരയുടെ ഗന്ധവും നിറഞ്ഞ വായുവുമുള്ള തകർത്തെറിയപ്പെട്ട ഒരു ഭൂമേഖലയെ നമ്മൾ മറക്കാതിരിക്കണം.

രക്ഷാപ്രവർത്തകർക്ക് പോലും എത്തിച്ചേരാനാകാതെ, ആയിരക്കണക്കിന് ജീവനുകൾ ഇപ്പോഴും അവശിഷ്ടങ്ങൾക്കടിയിലാണ് എന്ന് നാമോർക്കണം. മനസിനും ശരീരത്തിനും മുറിവേറ്റ, നിരന്തരം പലായനം ചെയ്യേണ്ടിവന്ന ലക്ഷക്കണക്കിനാളുകൾ. ബോംബാക്രമണങ്ങളിൽ 90 ശതമാനവും തകർന്നുതരിപ്പണമായി ജീവിതയോഗ്യമല്ലാതായിതീർന്ന നാട്... നടന്നത് വംശഹത്യയാണെന്ന് ലോകം പറഞ്ഞിട്ടും ഐക്യരാഷ്ട്ര സഭയുടെ പ്രത്യേക കമ്മിറ്റി അത് സ്ഥിരീകരിച്ചത് രണ്ടാഴ്ച മുൻപ് മാത്രമാണ്. യുദ്ധം മൂന്നാം വർഷത്തിലേക്ക് കടക്കുമ്പോൾ, ലോകരാജ്യങ്ങളെല്ലാം ഗാസയ്ക്ക് വേണ്ടി ശബ്ദമുയർത്തുന്നുണ്ട്. പക്ഷേ ഗാസ ശാന്തമായിട്ടില്ല. മനുഷ്യത്വത്തിന്റെ പേരിൽ കൊടുത്തുവിട്ട സഹായങ്ങൾ പോലും പിടിച്ചുവച്ചിരിക്കുകയാണ്. സംസ്കാരസമ്പന്നനായ മനുഷ്യന് ചിന്തിക്കാനാവുന്നതിനും അപ്പുറം ഭയാനകമാണ് അവിടം.

Content Highlights: Exploring the devastating impact of the Gaza conflict since Oct 7, 2023. From Hamas attacks to Israeli responses, learn about the humanitarian crisis, civilian casualties, and ongoing peace initiatives.