കോടമഞ്ഞ് പുതച്ച പച്ചമലനിരകൾ, അദ്ഭുതപ്പെടുത്തുന്ന ഭീമൻ പാറ; മനോഹരം പെരുമ്പാറക്കാഴ്ചകൾ
രണ്ടുകൈ: കോടമഞ്ഞ് പുതച്ച പച്ചമലനിരകൾ മാടിവിളിക്കുകയാണ് സഞ്ചാരികളെ. തൃശ്ശൂർ കോടശ്ശേരി പഞ്ചായത്തിലെ വാരൻകുഴി വനമേഖലയിലുള്ള പെരുമ്പാറ മേഖലയാണ് മനോഹരകാഴ്ചകളുമായി കാത്തിരിക്കുന്നത്. വാരൻകുഴിയിൽനിന്ന് ഏകദേശം ഒരു കിലോമീറ്ററോളം വനത്തിനുള്ളിലൂടെ പോയാൽ പ്രകൃതിസൗന്ദര്യത്താൽ നിറഞ്ഞ പെരുമ്പാറയിലെത്താം.
കാഴ്ചക്കാരെ അദ്ഭുതപ്പെടുത്തുന്ന ഒരു ഭീമൻ പാറയാണ് ഇവിടെയുള്ളത്. മനോഹരമായ കാഴ്ചകളും പുൽമേടും സഞ്ചാരികളെ ഏറെ ആകർഷിക്കുന്നുണ്ട്. വനംവകുപ്പിന്റെ സ്കെച്ചിൽ ഈസ്ഥലം പ്രത്യേകം അടയാളപ്പെടുത്തിയിട്ടുണ്ട്.
പെരുമ്പാറ വിനോദസഞ്ചാരകേന്ദ്രമാക്കണം എന്നാവശ്യപ്പെട്ട് കോടശ്ശേരി പഞ്ചായത്ത് സംസ്ഥാന സർക്കാരിന് റിപ്പോർട്ട് സമർപ്പിച്ചിട്ടുണ്ട്. കോടശ്ശേരി വനമേഖലയിലെ പെരുമ്പാറ വിനോദസഞ്ചാര കേന്ദ്രമാക്കണമെന്ന് ആവശ്യപ്പെട്ട് കോടശ്ശേരി പഞ്ചായത്ത് പ്രസിഡന്റ് റിജു മാവേലി, ബ്ലോക്ക് അംഗം സി.വി. ആന്റണി, കെ.എം. ജോസ് എന്നിവർ മന്ത്രി കെ. രാജനും സനീഷ് കുമാർ ജോസഫ് എം.എൽ.എ. ക്കും നിവേദനം നൽകി.
Content Highlights: perumbara local destination at thrissur, local travel destinations, local trip