മാംസാഹാരിയല്ല, ഇവൻ വെജിറ്റേറിയൻ! ശാസ്ത്രലോകത്തെ അമ്പരപ്പിച്ച് 'ഹെൽ ചിക്കൻ' ദിനോസർ

ഏകദേശം 66 ദശലക്ഷം വർഷങ്ങൾക്കുമുമ്പ് ജീവിച്ചിരുന്ന പുതിയ ഇനം ദിനോസറിനെ ശാസ്ത്രജ്ഞർ കണ്ടെത്തി. 'ഇൻഫെർണോഗല്ലസ് ജെയിംസി' (Infernogallus jamesi) എന്ന് നാമകരണം ചെയ്യപ്പെട്ട ഈ ദിനോസർ മാംസാഹാരിയല്ല, പഴങ്ങൾ കഴിക്കുന്ന ഒന്നായിരുന്നു. ഇപ്പോൾ വടക്കേ അമേരിക്കയിലുള്ള ഭൂപ്രദേശത്തായിരുന്നു ഇവ ജീവിച്ചിരുന്നത്.

ഈ ദിനോസർ സസ്യാഹാരിയാണ് എന്നത് സാധാരണ ദിനോസറുകളിൽ കണ്ടിട്ടില്ലാത്ത സവിശേഷതയാണ്. അതുതന്നെയാണ് ഈ കണ്ടെത്തലിനെ വേറിട്ടതാക്കുന്നത്. നേച്ചർ എന്ന ജേണലിൽ ഈ പഠനം പ്രസിദ്ധീകരിച്ചിട്ടുണ്ട്.

"ക്രിറ്റേഷ്യസ് കാലഘട്ടത്തിൽ ദിനോസറുകൾ വ്യത്യസ്തമായ പാരിസ്ഥിതിക സാഹചര്യങ്ങളുമായി പൊരുത്തപ്പെട്ട് വൈവിധ്യമാർന്ന ജീവിതരീതികൾ സ്വീകരിച്ചിരുന്നുവെന്ന് ഗവേഷകർക്ക് നേരത്തെ തന്നെ അറിയാമായിരുന്നു. എന്നാൽ, പഴങ്ങൾ ഭക്ഷിച്ചിരുന്ന ദിനോസറുകളുടെ കണ്ടെത്തൽ ശാസ്ത്രലോകത്തെ അമ്പരപ്പിച്ചു. ഇത്തരമൊരു ഭക്ഷണരീതിയുടെ തെളിവുകൾ കണ്ടെത്താനാകുമെന്ന് ശാസ്ത്രജ്ഞർ പ്രതീക്ഷിച്ചിരുന്നില്ല" എന്ന് സ്റ്റോണി ബ്രൂക്ക് സർവകലാശാലയിലെ അനാട്ടമിക്കൽ സയൻസസ് വിഭാഗം അസിസ്റ്റന്റ് പ്രൊഫസറായ ഡോ. ഗ്രിഗറി ഫൺസ്റ്റൺ പറയുന്നു.

അമേരിക്കയിലെ മൊണ്ടാന, നോർത്ത് ഡക്കോട്ട തുടങ്ങിയ സംസ്ഥാനങ്ങളിലായി വ്യാപിച്ചുകിടക്കുന്ന 'ഹെൽ ക്രീക്ക് ഫോർമേഷൻ' (Hell Creek Formation) എന്ന പ്രദേശത്തുനിന്നാണ് ഇതിന്റെ ഫോസിൽ കണ്ടെത്തിയത്. ഈ പ്രദേശത്തിന്റെ പേരുമായി ബന്ധപ്പെടുത്തിയാണ് ഇതിന് 'ഹെൽ ചിക്കൻ' അഥവാ 'ഇൻഫെർണോഗല്ലസ്' എന്ന് പേര് നൽകിയത്.

ഏകദേശം 6.6 കോടി വർഷങ്ങൾക്കുമുമ്പാണ് ഈ ദിനോസർ ജീവിച്ചിരുന്നത്. അക്കാലത്ത് ഈ പ്രദേശം ഉപോഷ്ണമേഖലാ കാലാവസ്ഥയുള്ള തീരസമതലമായിരുന്നു. ട്രൈസെറാടോപ്സ്, ആങ്കിലോസോറസ്, ടിറാനോസോറസ് റെക്സ് തുടങ്ങിയ ദിനോസറുകൾക്കൊപ്പമാണ് ഇൻഫെർണോഗല്ലസ് ജീവിച്ചിരുന്നത്.

ഏകദേശം അഞ്ചടി നീളവും 25 പൗണ്ട് (11.3 കിലോഗ്രാം) ഭാരവുമായിരുന്നു ഈ ദിനോസറിനുണ്ടായിരുന്നത്. ടിറാനോസോറസ് റെക്സ് ഉൾപ്പെടുന്ന മാംസഭോജികളായ ദിനോസറുകളുടെ വിഭാഗമായ തെറോപോഡ് (Theropod) ഗ്രൂപ്പിലാണ് ഇതും ഉൾപ്പെടുന്നത്. എന്നാൽ, മറ്റ് തെറോപോഡുകളിൽനിന്ന് വ്യത്യസ്തമായി ഈ ദിനോസറിന്റെ പ്രധാന ഭക്ഷണം പഴങ്ങളായിരുന്നു.

ദിനോസറിന്റെ വായുടെ ഘടനയെക്കുറിച്ച് നടത്തിയ പഠനത്തിലാണ് പഴങ്ങൾ ഭക്ഷിക്കാൻ സഹായിക്കുന്ന പ്രത്യേക സവിശേഷതകൾ ഗവേഷകർ കണ്ടെത്തിയത്.

ചവയ്ക്കുമ്പോൾ മുന്നോട്ടും പിന്നോട്ടും ചലിപ്പിക്കാൻ സഹായിക്കുന്ന തരത്തിലായിരുന്നു ഇതിന്റെ താടിയെല്ലുകളിലെ പേശികളുടെ ഘടന. പഴങ്ങളിലെ മൃദുവായ ഭാഗങ്ങളിൽനിന്ന് വിത്തുകൾ വേർതിരിച്ചെടുക്കാൻ ഈ സവിശേഷതകൾ ദിനോസറിനെ സഹായിച്ചിരുന്നു. ആമകളിലും തത്തകളിലും ഇത്തരം സവിശേഷതകൾ പ്രത്യേകം കണ്ടിട്ടുണ്ടെങ്കിലും ഒരേ ജീവിയിൽ ഇവ രണ്ടും ഒരുമിച്ച് കാണുന്നത് ഇതാദ്യമാണെന്ന് ഗവേഷകർ പറയുന്നു.

ഏതെല്ലാം പഴങ്ങളാണ് ഈ ദിനോസർ ഭക്ഷിച്ചിരുന്നതെന്ന് ഇപ്പോഴും വ്യക്തമല്ല. എന്നാൽ, പലതരം ബെറികളും പീച്ച്, ഒലിവ് പോലുള്ള പഴങ്ങളും ഇത് ഭക്ഷിച്ചിരിക്കാനാണ് സാധ്യത. വിത്തുകളുടെ വ്യാപനത്തിലും ദിനോസറുകൾക്ക് നിർണായക പങ്കുണ്ടായിരുന്നുവെന്ന സൂചനയും ഈ കണ്ടെത്തൽ നൽകുന്നു. പഴങ്ങൾ ഭക്ഷിക്കുന്നതിലൂടെ പുഷ്പിക്കുന്ന സസ്യങ്ങളുടെ വിത്തുകൾ വിവിധ പ്രദേശങ്ങളിലേക്ക് വ്യാപിക്കാൻ ഇൻഫെർണോഗല്ലസ് സഹായിച്ചിരിക്കാമെന്നാണ് ഗവേഷകരുടെ വിലയിരുത്തൽ. ഇന്നത്തെ പക്ഷികൾക്ക് സമാനമായി ഇവയ്ക്ക് തൂവലുകളുണ്ടായിരിക്കാം എന്നും അനുമാനമുണ്ട്.

Content Highlights: Scientists have unearthed a 66-million-year-old dinosaur named Infernogallus jamesi in North America, which surprisingly fed on fruits instead of meat. This unique 25-pound theropod featured a specialized beak adapted for seed extraction and dispersal, shedding new light on the diverse ecological roles of Late Cretaceous dinosaurs.