ദുരൂഹത നീങ്ങാതെ 3ഐ/അറ്റ്ലസ്, ചിത്രങ്ങള് പുറത്തുവിടാന് നാസയ്ക്കുമേല് സമ്മര്ദം
സൗരയൂഥത്തിന് പുറത്തുനിന്നെത്തിയ 3ഐ/അറ്റ്ലസ് വാല്നക്ഷത്രം ചൊവ്വയുടെ ഏറ്റവും അടുത്തെത്തിയപ്പോള് പകര്ത്തിയ ഉയര്ന്ന റെസല്യൂഷനുള്ള ചിത്രങ്ങള് പുറത്തുവിടാന് നാസയ്ക്കുമേല് സമ്മര്ദ്ദം. വാല്നക്ഷത്രം പ്രകടിപ്പിച്ച അസാധാരണമായ ഇന്-പ്ലെയിന് ത്വരണത്തെക്കുറിച്ച് ശാസ്ത്രലോകത്ത് ആകാംക്ഷ വര്ധിച്ചുവരുന്ന സാഹചര്യത്തിലാണിത്. യു.എസ് കോണ്ഗ്രസ് അംഗം അന്ന പോളിന ലൂണ ഈ ചിത്രങ്ങള് ലഭ്യമാക്കാന് നാസയോട് ഔദ്യോഗികമായി അഭ്യര്ത്ഥിച്ചു. സൗരയൂഥത്തിന് പുറത്തുനിന്നുള്ള ഈ സന്ദര്ശകനെ ചുറ്റിപ്പറ്റിയുള്ള നിഗൂഢതയടക്കം ചൂണ്ടിക്കാട്ടിയാണിത്.
2025 ജൂലായില് ആദ്യമായി കണ്ടെത്തിയ 3ഐ/അറ്റ്ലസ് പ്രപഞ്ച പരിസരത്തിലൂടെ കടന്നുപോയതായി അറിയപ്പെടുന്ന മൂന്ന് നക്ഷത്രാന്തരീയ വസ്തുക്കളില് ഒന്നാണ്. സൂര്യനോട് ഏറ്റവും അടുത്തുവന്നപ്പോള് (പെരിഹീലിയന്)അപ്രതീക്ഷിതമായ ഗുരുത്വാകര്ഷണം മൂലമല്ലാത്ത ത്വരണം അത് പ്രകടിപ്പിച്ചു. സൂര്യനില് നിന്ന് ചെറുതായി അകന്നുമാറുകയും പ്രകാശത്തില് അസാധാരണമായ വര്ധനവ് കാണിക്കുകയും ചെയ്തു. ഇതെല്ലാം സാധാരണ വാല്നക്ഷത്രങ്ങളുടെ പ്രവര്ത്തനങ്ങളില് നിന്ന് ഇതിനെ വ്യത്യസ്തമാക്കുകയും, അതിന്റെ സ്വഭാവവും ഉത്ഭവവും മനസിലാക്കുന്നതിനുള്ള താത്പര്യം വര്ധിപ്പിക്കുകയും കൗതുകകരമായ ചോദ്യങ്ങള് ഉയര്ത്തുകയും ചെയ്തിരുന്നു. സാധാരണയായി വാല്നക്ഷത്രങ്ങള് സൂര്യനോട് അടുക്കുമ്പോള് ഖരരൂപത്തിലുള്ള മഞ്ഞ് നേരിട്ട് വാതകമായി മാറുന്ന പ്രക്രിയയിലൂടെ പൊടിയും വാതകവും പുറന്തള്ളാറുണ്ട്. ഇത് അവയുടെ പ്രകാശത്തിലും ഭ്രമണപഥത്തിലും മാറ്റങ്ങള് വരുത്തുന്നു. എന്നിരുന്നാലും 3ഐ/അറ്റ്ലസിന്റെ ത്വരണം വര്ധിച്ചതും പ്രകാശം കൂടിയതും അസാധാരണമായിരുന്നു. ഇത് അഭ്യൂഹങ്ങള്ക്കും ശാസ്ത്രീയ സംവാദങ്ങള്ക്കും വഴിവെച്ചു.
നാസയുടെ ഹബിള്, ജെയിംസ് വെബ് ബഹിരാകാശ ദൂരദര്ശിനികള് ഉള്പ്പെടെയുള്ള ഒന്നിലധികം ദൂരദര്ശിനികളില് നിന്നുള്ള നിരീക്ഷണങ്ങള് വാല്നക്ഷത്രത്തിന്റെ ഘടനയെക്കുറിച്ച് വിലപ്പെട്ട വിവരങ്ങള് നല്കിയിട്ടുണ്ട്. വിവിധ ബഹിരാകാശ നിരീക്ഷണ കേന്ദ്രങ്ങളില് നിന്നുള്ള ചിത്രങ്ങള് നാസ പൊതുജനങ്ങള്ക്ക് ലഭ്യമാക്കിയിട്ടുണ്ടെങ്കിലും 2025 ഒക്ടോബര് 2-ന് വാല്നക്ഷത്രം ചൊവ്വയ്ക്ക് സമീപത്തുകൂടി കടന്നുപോയപ്പോള് ചൊവ്വയുടെ ഉപരിതലത്തിലും ഭ്രമണപഥത്തിലുമുള്ള ക്യാമറകള് പകര്ത്തിയ പ്രത്യേക ഉയര്ന്ന റെസല്യൂഷനുള്ള ചിത്രങ്ങള് ഇതുവരെ പുറത്തുവിട്ടിട്ടില്ല.
സങ്കീര്ണമായ ഡാറ്റാ പ്രോസസിങ്, വിശദമായ അവലോകനം തുടങ്ങിയവ ഈ കാലതാമസത്തിന് കാരണമായേക്കാമെന്ന് വിദഗ്ദ്ധര് അഭിപ്രായപ്പെടുന്നു, എന്നാല് ചിത്രങ്ങള് പുറത്തുവിടാതിരിക്കുന്നത് സുതാര്യതയെയും ശാസ്ത്രീയമായ സ്ഥിരീകരണത്തെയും കുറിച്ച് ആശങ്ക ഉയര്ത്തിയിട്ടുണ്ടെന്നാണ് പലരും പറയുന്നത്. ഈ ചിത്രങ്ങള് പുതിയ ഭൗതിക പ്രതിഭാസങ്ങള് വെളിപ്പെടുത്തിയേക്കാം. ഇത് നക്ഷത്രാന്തരീയ വസ്തുക്കളെക്കുറിച്ചുള്ള നമ്മുടെ ധാരണയെ കൂടുതല് ആഴത്തിലാക്കുകയോ പുനര്രൂപകല്പ്പന ചെയ്യുകയോ ചെയ്തേക്കാം എന്നാണ് വിലയിരുത്തപ്പെടുന്നത്.
അസ്വാഭാവിക പ്രത്യേകതകള് കാരണം 3ഐ/അറ്റ്ലസ് ഒരുപക്ഷേ സ്വാഭാവിക ഒരു വസ്തുവായിരിക്കില്ലെന്ന് ഹാര്വാര്ഡ് ജ്യോതിശാസ്ത്രജ്ഞനായ ആവി ലോബ് അഭിപ്രായപ്പെട്ടിരുന്നു. അതോടെ 3ഐ/അറ്റ്ലസ് ഒരു വാല്നക്ഷത്രമാണോ അതോ അന്യഗ്രഹ പേടകമാണോ എന്നതരത്തിലുള്ള ചോദ്യങ്ങള്വരെ ഉയര്ന്നിരുന്നു.
Content Highlights: Congresswoman Luna urges NASA to release high-resolution images of interstellar comet 3I/ATLAS captured near Mars. Uncover its mysteries