ഗഗൻയാൻ: ആദ്യദൗത്യം ഈവർഷം തന്നെ, ലക്ഷ്യമിടുന്നത് ആറ് വിക്ഷേപണങ്ങൾ - ISRO ചെയർമാൻ

മനുഷ്യരെ ബഹിരാകാശത്തെത്തിക്കുന്നതിനുള്ള ഇന്ത്യയുടെ ബഹിരാകാശ പദ്ധതിയായ ഗഗൻയാന്റെ ഭാഗമായുള്ള ആദ്യ ആളില്ലാ ദൗത്യത്തിന്റെ വിക്ഷേപണം ഈ വർഷം തന്നെ ഉണ്ടാകുമെന്ന് ഐഎസ്ആർഒ ചെയർമാൻ വി. നാരായണൻ അറിയിച്ചു. ഈ ദൗത്യവുമായി ബന്ധപ്പെട്ട ജോലികൾ വളരെ പുരോഗമിക്കുകയാണെന്ന് അദ്ദേഹം വ്യക്തമാക്കി. ജിഎസ്എൽവി-എഫ്17 റോക്കറ്റ് ഉപയോഗിച്ച് ഇഒഎസ്-05 (EOS-05) ഭൗമനിരീക്ഷണ ഉപഗ്രഹം വിജയകരമായി വിക്ഷേപിച്ചതിന് ശേഷം സംസാരിക്കുകയായിരുന്നു അദ്ദേഹം.

നടപ്പ് സാമ്പത്തിക വർഷത്തിൽ ഐഎസ്ആർഒ നേടുന്ന ആദ്യ വിജയമാണിത്. ഈ സാമ്പത്തിക വർഷം തന്നെ നാവിഗേഷൻ ഉപഗ്രഹമായ എൻവിഎസ്-03 (NVS-03) ഉൾപ്പെടെ ആറ് വിക്ഷേപണങ്ങൾ കൂടി ഐഎസ്ആർഒ ലക്ഷ്യമിടുന്നുണ്ടെന്ന് അദ്ദേഹം വ്യക്തമാക്കി.

അതേസമയം ഇപ്പോൾ വിക്ഷേപിച്ച ഇഒഎസ്-05 ചാര ഉപഗ്രഹമാണെന്ന തരത്തിലുള്ള പ്രചാരണം അദ്ദേഹം തള്ളി. ഒമ്പത് വർഷമാണ് ഇഒഎസ്-05-ന്റെ പ്രവർത്തന കാലാവധിയെന്നും അദ്ദേഹം പറഞ്ഞു.

പ്രതീക്ഷിച്ചതിനേക്കാൾ മികച്ച പ്രകടനമാണ് വിക്ഷേപണ വാഹനം കാഴ്ചവെച്ചതെന്ന് ഐഎസ്ആർഒ ചെയർമാൻ പറഞ്ഞു. 29,000 കി.മീ ദൂരത്തുള്ള ഭ്രമണപഥത്തിൽ ഉപഗ്രഹം എത്തിക്കാനാണ് പ്രതീക്ഷിച്ചതെങ്കിലും 171 കി.മീ x 31,026 കി.മീ ഓർബിറ്റിലാണ് ഉപഗ്രഹത്തെ എത്തിക്കാനായെന്ന് അദ്ദേഹം പറഞ്ഞു.

സെപ്റ്റംബർ നാലിന് പുലർച്ചെ 2.55 നായിരുന്നു ഇഒഎസ് -05 ഉപഗ്രഹ വിക്ഷേപണം. ഭൗമനിരീക്ഷണത്തിനായി ജിയോ സ്റ്റേഷനറി പ്ലാറ്റ്‌ഫോമിൽ (36,000 കി.മീ) സ്ഥാപിക്കുന്ന ഇന്ത്യയുടെ ആദ്യത്തെ ഉപഗ്രഹമാണിത്. പ്രവർത്തന സജ്ജമാകുന്നതോടെ ഈ ഉപഗ്രഹം സാമൂഹിക-സാമ്പത്തിക സുരക്ഷാ മേഖലകളിൽ ഇഒഎസ്-05 നൽകുന്ന വിവരങ്ങൾ വലിയ സ്വാധീനം ചെലുത്തുമെന്നാണ് വിലയിരുത്തൽ. തത്സമയ വിവരങ്ങൾ ലഭ്യമാകുന്നതോടെ കാലാവസ്ഥാ നിരീക്ഷണം, ദുരന്തനിവാരണം, കൃഷി-പരിസ്ഥിതി, സുരക്ഷ തുടങ്ങിയ മേഖലകളിൽ ആവശ്യമായ വിവരങ്ങൾ ശേഖരിക്കാനാവും.

ചുഴലിക്കാറ്റുകൾ, പെട്ടെന്നുണ്ടാകുന്ന മേഘവിസ്ഫോടനങ്ങൾ എന്നിവ തത്സമയം നിരീക്ഷിക്കാനും കൃത്യമായ മുന്നറിയിപ്പുകൾ നൽകാനും ഇത് സഹായിക്കും. പ്രളയം, കാട്ടുതീ തുടങ്ങിയ പ്രകൃതിദുരന്തങ്ങൾ സംഭവിക്കുമ്പോൾ അവയുടെ ഗതി നിരീക്ഷിക്കാനും ഈ ഉപഗ്രഹത്തിന്റെ സഹായത്തോടെ സാധിക്കും.

ജിഎസ്എൽവി ഇതുവരെ വിക്ഷേപിച്ചതിൽ വച്ച് ഏറ്റവും ഭാരമേറിയ ഉപഗ്രഹമാണിത് (2367 കിലോഗ്രാം). ജിഎസ്എൽവിയുടെ ആദ്യ വിക്ഷേപണത്തെ അപേക്ഷിച്ച് പേലോഡ് ശേഷിയിൽ 50% വർദ്ധനവ് ഉണ്ടായിട്ടുണ്ട്. സ്ട്രക്ചറൽ മാസ് കുറച്ചും പ്രൊപ്പൽഷൻ സിസ്റ്റം മെച്ചപ്പെടുത്തിയുമാണ് ഇത് സാധ്യമാക്കിയത്

ഈ സാമ്പത്തിക വർഷത്തിൽ ശ്രീഹരിക്കോട്ടയിൽ നിന്നുള്ള രണ്ടാമത്തെ വിജയകരമായ ദൗത്യമാണിത്. ആദ്യത്തേത് സ്കൈറൂട്ട് എന്ന സ്വകാര്യ സ്റ്റാർട്ടപ്പിന്റേതായിരുന്നുവെന്നും വി. നാരാണൻ ചൂണ്ടിക്കാട്ടി. 

Content Highlights: ISRO plans to launch the first unmanned Gaganyaan mission later this year, following the successful deployment of the EOS-05 earth observation satellite which will significantly aid in real-time disaster management and weather forecasting.