പാകിസ്താന് ശത്രുവിന്റെ ശത്രു മിത്രം, ചൈനയ്ക്ക് വലിയ ശത്രുവിനെ നേരിടാനുള്ള കൂട്ടുകെട്ട്; ഇന്ത്യയ്ക്ക് ‘ഇരട്ടമുന്നണി’യെന്ന ഭീഷണി

ഇന്ത്യയുടെ വടക്കൻ, പടിഞ്ഞാറൻ അതിർത്തികളിൽ രൂപപ്പെട്ടുവന്നിട്ടുള്ള ചൈന- പാകിസ്താൻ അച്ചുതണ്ട് രാജ്യസുരക്ഷയെ ബാധിക്കുന്ന സുരക്ഷാ വെല്ലുവിളിയായി മാറി. ഇന്ത്യയുടെ ദേശീയ സുരക്ഷയ്ക്ക് കടുത്ത വെല്ലുവിളിയുയർത്തുന്ന സംയുക്ത സൈനിക- തന്ത്രപരമായ സഹകരണമാണ് ഇരുരാജ്യങ്ങളും തമ്മിൽ രൂപപ്പെടുത്തിയിരിക്കുന്നത്. പരമ്പരാഗതമായി ചൈനയെയും പാകിസ്താനെയും വ്യത്യസ്തമായ സുരക്ഷാ ഭീഷണികളായാണ് ഇന്ത്യ വീക്ഷിച്ചിരുന്നതെങ്കിൽ, നിലവിലെ ആഗോള ഭൗമരാഷ്ട്രീയ സാഹചര്യം ഒരേസമയം രണ്ട് മുന്നണികളിൽ യുദ്ധസമാനമായ അന്തരീക്ഷം സൃഷ്ടിക്കാൻ പ്രാപ്തിയുള്ള ഇരട്ട യുദ്ധമുന്നണി ഭീഷണിയായി (Two-Front Threat) പരിണമിച്ചിരിക്കുന്നു. ഒരേസമയം രണ്ട് അതിർത്തികളിലും എതിരാളികൾ സൈനിക സമ്മർദ്ദം ചെലുത്തുമ്പോൾ പ്രതിരോധ സേനയുടെ വിഭവങ്ങൾ, വ്യോമസേന സ്‌ക്വാഡ്രനുകൾ, കരസേന വിഭാഗങ്ങൾ എന്നിവ വിഭജിക്കപ്പെടാൻ സാധ്യതയേറെയാണ്.

ഇന്ത്യയെ സംബന്ധിച്ചിടത്തോളം 'ഇരട്ട മുന്നണി' യുദ്ധമെന്നത് കേവലം ഭാവനാത്മകമായ സൈനിക നിഗമനമല്ല, മറിച്ച് എപ്പോൾ വേണമെങ്കിലും പ്രായോഗികതലത്തിൽ സംഭവിക്കാവുന്ന  യാഥാർത്ഥ്യമാണ്. ചൈനയും പാകിസ്താനും തമ്മിലുള്ള ബന്ധം നയതന്ത്ര തലത്തിൽനിന്ന് സൈനികവും സാങ്കേതികവുമായ സഹകരണത്തിലേക്ക് മാറിയതോടെ, ഇന്ത്യയുമായി യുദ്ധമുണ്ടായാൽ പടിഞ്ഞാറൻ അതിർത്തിയിൽ പാകിസ്താനും വടക്കൻ അതിർത്തിയിൽ ചൈനയും ഒരേസമയം പ്രത്യാക്രമണം നടത്താനുള്ള സാധ്യതയുണ്ട്‌. ഔപചാരികമായ സൈനിക സഖ്യങ്ങളിൽ ചൈന പങ്കാളിയാകാറില്ലെങ്കിലും; പാകിസ്താനുമായുള്ള ബന്ധം ഇന്ത്യയെ ഉദ്ദേശിച്ച് മാത്രമാണ് ചൈന നിലനിർത്തുന്നത്.

Content Highlights: The evolving China-Pakistan axis presents a significant security challenge for India, impacting its national defense strategy and regional stability.