'യുദ്ധതന്ത്രങ്ങൾ മാറി, ടെക്നോളജിയിൽ ഇന്ത്യയും മുന്നേറണം'; സ്റ്റാർട്ടപ്പുകളോട് ആനന്ദ് മഹീന്ദ്ര
ആധുനിക യുദ്ധതന്ത്രങ്ങളിലെ മാറ്റത്തെക്കുറിച്ച് വിശദമായ കുറിപ്പുമായി പ്രമുഖ വ്യവസായി ആനന്ദ് മഹീന്ദ്ര. ലിയോണിഡാസ് എന്ന ഹൈ-പവർ മൈക്രോവേവ് (എച്ച്പിഎം) സിസ്റ്റത്തിന്റെ വീഡിയോ എക്സിൽ അദ്ദേഹം പങ്കുവെച്ചുകൊണ്ടാണ് അദ്ദേഹം ഇക്കാര്യം വിശദീകരിച്ചത്. ഒരേ സമയം നിരവധി ഡ്രോണുകളെ പ്രവർത്തന രഹിതമാക്കാൻ കഴിവുളളതാണ് ഈ സംവിധാനം.
'49 ഡ്രോണുകൾ. ഒരു പൾസ്. ഒരേ സമയം ഒരു ആയുധത്തെ മാത്രമേ തടയാൻ കഴിയുന്ന പരമ്പരാഗത പ്രതിരോധ സംവിധാനങ്ങളിൽനിന്നും ലേസറുകളിൽനിന്നും വ്യത്യസ്തമായി ഈ സംവിധാനങ്ങൾക്ക് ഒരേ സമയം ഒന്നിലധികം ഭീഷണികളെ ലക്ഷ്യമിടാൻ കഴിയുമെന്ന് പോസ്റ്റിൽ അദ്ദേഹം ചൂണ്ടിക്കാട്ടി.
ഇന്ത്യ ഇത്തരം സാങ്കേതികവിദ്യകൾ തദ്ദേശീയമായി വികസിപ്പിക്കേണ്ടത് അത്യാവശ്യമാണെന്ന് അദ്ദേഹം പറയുന്നു. 'ഇന്ത്യയെ സംബന്ധിച്ചിടത്തോളം ഇത്തരം സംവിധാനങ്ങൾ ഇറക്കുമതി ചെയ്യുക എന്നത് ഒരു മികച്ച തന്ത്രമല്ല. നിർമിതബുദ്ധി (എഐ)യുടെ പിന്തുണയോടെയുള്ള എച്ച്പിഎം ലേസർ സംവിധാനങ്ങൾ ഇന്ത്യ തദ്ദേശീയമായി വികസിപ്പിക്കേണ്ടതുണ്ടെന്ന് അദ്ദേഹം അഭിപ്രായപ്പെട്ടു. സംഘർഷങ്ങളിൽ രാജ്യങ്ങൾക്കുണ്ടാകുന്ന ചെലവിലെ അന്തരം അദ്ദേഹം ചൂണ്ടിക്കാട്ടി. 'സമീപകാല സംഘർഷങ്ങൾ ഒരു ക്രൂരമായ യാഥാർത്ഥ്യം എടുത്തുകാണിക്കുന്നു. kamikaze ഡ്രോണുകളുടെ വില അവയെ നശിപ്പിക്കാൻ അയച്ച പ്രതിരോധ സംവിധാനങ്ങളുടെ വിലയുടെ ഒരു ചെറിയ അംശം മാത്രമാണ്. ആക്രമണകാരിക്ക് വിജയിക്കേണ്ട ആവശ്യമില്ല. അവർക്ക് കണക്കുകൾ തനിക്ക് അനുകൂലമായി നിലനിർത്തിയാൽ മതി.' - അദ്ദേഹം ചൂണ്ടിക്കാട്ടി.
ലേസറുകൾ വളരെ വിലകുറഞ്ഞതും കൃത്യതയുള്ളതുമാണെങ്കിലും അവയ്ക്ക് ഒരു സമയത്ത് ഒരു ലക്ഷ്യത്തെ മാത്രമേ തകർക്കാൻ കഴിയൂ. ഒരു കൂട്ടം ഡ്രോണുകൾ എത്തിയാൽ അതൊരു പ്രശ്നമാണ്. എച്ച്പിഎംന് ആ പരിമിതിയില്ല. ഇത് ഒരു പ്രദേശമാകെ വ്യാപിക്കുന്നു, ഒരു പോയിന്റല്ല. പ്രതിരോധ സംവിധാനങ്ങളുമായി അവയും സംയോജിപ്പിക്കുകയാണ് വേണ്ടത്.
ഭാവിയിലെ വ്യോമ പ്രതിരോധ സംവിധാനങ്ങൾ വിവിധ തലങ്ങളിലാണുള്ളത്. ഓരോ സാങ്കേതികവിദ്യയും വ്യത്യസ്തമായ ഒരു പ്രത്യേക സ്ഥാനം നേടുന്നു. മൂലധനം, ഡീപ്-ടെക് സ്റ്റാർട്ടപ്പുകളെ വളർത്താൻ കഴിയുന്ന സ്ഥാപനങ്ങൾ എന്നിവ രാജ്യത്തിന് ആവശ്യമാണ്. ഗുജറാത്തിലെ ഒരു പ്രമുഖ ഡീപ്-ടെക് ഇൻകുബേറ്ററായ iCreate-യുടെ ചെയർമാൻ സ്ഥാനം താൻ ഏറ്റെടുത്തിട്ടുണ്ട്. ഈ തരത്തിലുള്ള നൂതനമായ കണ്ടുപിടിത്തങ്ങളുടെ കേന്ദ്രമായി ഇതിനെ മാറ്റാൻ ആഗ്രഹിക്കുന്നു. ഭാവിയിലെ പ്രതിരോധത്തെ മേഖലയെ നിർവചിക്കുന്ന സാങ്കേതികവിദ്യകൾ നിങ്ങൾ നിർമ്മിക്കുകയാണെങ്കിൽ, ദയവായി https://icreate.org.in എന്ന വെബ്സൈറ്റ് സന്ദർശിക്കണെന്നും അദ്ദേഹം എക്സ് പോസ്റ്റിൽ അഭ്യർഥിച്ചിട്ടുണ്ട്.
Content Highlights: Anand Mahindra highlights HPM technology as a solution for multi-target drone neutralization., Economic disparity in modern drone warfare makes traditional interceptors unsustainable., Mahindra calls for India to prioritize indigenous, AI-enabled defense systems., iCreate is positioned as a key incubator for deep-tech defense innovations in India.