'ഫിറ്റ്നസ് ബാറ്ററി ടെസ്റ്റുകൾ'; ലക്ഷ്യം 2036 ഒളിമ്പിക്‌സ്; പ്രതിഭകളെ കണ്ടെത്താൻ രാജ്യവ്യാപക പദ്ധതി

ന്യൂഡൽഹി: 2036-ലെ ഒളിമ്പിക്‌സിന് ആതിഥേയത്വം വഹിക്കാനുള്ള നീക്കത്തിൽ ഇന്ത്യ ശക്തമായി മുന്നിലുണ്ടെന്ന് പ്രധാനമന്ത്രി നരേന്ദ്ര മോദി. രാജ്യത്തിന്റെ 80-ാമത് സ്വാതന്ത്ര്യദിനത്തിൽ ചെങ്കോട്ടയിൽ വെച്ച് നടത്തിയ പ്രസംഗത്തിലായിരുന്നു പ്രധാനമന്ത്രിയുടെ വാക്കുകൾ. ഇതിന്റെ ഭാഗമായി അഞ്ചു മുതൽ 15 വയസുവരെയുള്ള കുട്ടികൾക്കിടയിൽ കായിക പ്രതിഭകളെ കണ്ടെത്തുന്നതിനായി ഒരു രാജ്യവ്യാപക പദ്ധതി ആരംഭിക്കുമെന്ന് അദ്ദേഹം പ്രഖ്യാപിച്ചു.

രാജ്യത്തിന്റെ എല്ലാ കോണുകളിൽ നിന്നുമുള്ള കുട്ടികളെ കണ്ടെത്തി അവർക്ക് ലോകോത്തര നിലവാരത്തിലുള്ള പരിശീലനം നൽകുകയാണ് ലക്ഷ്യം. ഇതിനായി കൃത്രിമ ബുദ്ധി (എഐ) ഉപയോഗിച്ചുള്ള 'ഫിറ്റ്നസ് ബാറ്ററി ടെസ്റ്റുകൾ' നടത്തും. കായികക്ഷമത, കരുത്ത്, വേഗത, വഴക്കം എന്നിവ അളക്കുന്നതിലൂടെ കുട്ടികളിലെ ഒളിഞ്ഞിരിക്കുന്ന കായിക വാസനകൾ കണ്ടെത്താൻ സാധിക്കും.

നിലവിൽ ഒളിമ്പിക്‌സിലെ മൂന്നിൽ രണ്ട് വിഭാഗങ്ങളിലും ഇന്ത്യയ്ക്ക് യോഗ്യത നേടാൻ സാധിക്കുന്നില്ല എന്ന വസ്തുത പ്രധാനമന്ത്രി ചൂണ്ടിക്കാട്ടി. എന്നാൽ 2036 ആകുമ്പോഴേക്കും ചുരുങ്ങിയത് മുക്കാൽ ഭാഗം മത്സരയിനങ്ങളിലും ഇന്ത്യയുടെ സാന്നിധ്യം ഉറപ്പാക്കാനാണ് സർക്കാർ ലക്ഷ്യമിടുന്നതെന്നും അദ്ദേഹം വ്യക്തമാക്കി.

2008-ലെ ബെയ്ജിങ് ഒളിമ്പിക്‌സിനായി ചൈന നടപ്പിലാക്കിയ തന്ത്രത്തിന് സമാനമായി, ഇന്ത്യ ഇതുവരെ ശോഭിക്കാത്ത മേഖലകളിൽ ശ്രദ്ധ കേന്ദ്രീകരിക്കും. കൂടുതൽ മെഡലുകൾ വാഗ്ദാനം ചെയ്യുന്ന അക്വാട്ടിക്‌സ് (നീന്തൽ ഉൾപ്പെടെ), സൈക്ലിങ്, റോവിങ്, ജിംനാസ്റ്റിക്‌സ് എന്നീ മേഖലകളിൽ പ്രത്യേക ശ്രദ്ധ നൽകും.

2014-ൽ ആരംഭിച്ച ടാർഗറ്റ് ഒളിമ്പിക് പോഡിയം സ്‌കീം അത്ലറ്റുകൾക്ക് വലിയ പിന്തുണ നൽകുന്നുണ്ടെന്നും ഖേലോ ഇന്ത്യ, യൂണിവേഴ്‌സിറ്റി ഗെയിംസ് എന്നിവയിലൂടെ രാജ്യം കായികരംഗത്ത് വലിയ കുതിപ്പ് നടത്തുകയാണെന്നും അദ്ദേഹം പറഞ്ഞു.

2036 ഒളിമ്പിക്‌സ് വേദിയുടെ കാര്യത്തിൽ 2029-ൽ മാത്രമേ അന്തിമ തീരുമാനം ഉണ്ടാവുകയുള്ളൂ. ഇതിനിടെ 2030-ലെ കോമൺവെൽത്ത് ഗെയിംസിന് അഹമ്മദാബാദ് ആതിഥേയത്വം വഹിക്കും. അന്താരാഷ്ട്ര കായിക മത്സരങ്ങൾ ഇന്ത്യയിലേക്ക് കൊണ്ടുവരുന്നതിന്റെ ഭാഗമായി അടുത്ത ആറുമാസത്തിനുള്ളിൽ 11 രാജ്യാന്തര മത്സരങ്ങൾ ഇന്ത്യയിൽ നടക്കുമെന്നും പ്രധാനമന്ത്രി അറിയിച്ചു.

രാജ്യത്തെ ഓരോ കുട്ടിയുടെയും കായിക ശേഷി തിരിച്ചറിയുകയും അവരെ ലോകനിലവാരത്തിലേക്ക് ഉയർത്തുകയും ചെയ്യുന്നതിലൂടെ 2036 ഒളിമ്പിക്‌സിൽ ഇന്ത്യയെ ഒരു വൻശക്തിയായി മാറ്റാനാണ് ഈ ബൃഹദ് പദ്ധതിയിലൂടെ ലക്ഷ്യമിടുന്നത്.

Content Highlights: India aims to host and excel in the 2036 Olympics., A nationwide talent hunt will screen children aged 5 to 15., AI-powered fitness battery tests will identify hidden sports potential., Focus will be given to underrepresented sports like aquatics, cycling, and gymnastics.