എന്തൊരു രക്ഷപ്പെടുത്തലാണത്; ആ കിക്ക് എവിടേക്ക് വരുമെന്ന് ബോനോയ്ക്ക് മുൻകൂട്ടി അറിയാമായിരുന്നോ?

ഗ്വാഡലൂപ്പ്: ആരെയും പിടിച്ചുകെട്ടാനാകുമെന്ന് ഒരിക്കൽ കൂടി തെളിയിച്ചിരിക്കുകയാണ് ആഫ്രിക്കൻ കരുത്തരായ മൊറോക്കോ. റൗണ്ട് ഓഫ് 32 ഘട്ടത്തിൽ കരുത്തരായ നെതർലൻഡ്‌സിനെ കീഴടക്കി പ്രീക്വാർട്ടറിലേക്ക് പ്രവേശിച്ചിരിക്കുകയാണ് അഷ്‌റഫ് ഹക്കീമിയും സംഘവും. പെനാൽറ്റി ഷൂട്ടൗട്ടിലേക്ക് നീണ്ട മത്സരത്തിൽ രണ്ടിനെതിരേ മൂന്നു ഗോളുകൾക്കായിരുന്നു മൊറോക്കോയുടെ ജയം.

ഷൂട്ടൗട്ടിനു പിന്നാലെ സോഷ്യൽ മീഡിയയിൽ വൈറലാകുന്നത് മൊറോക്കൻ ഗോൾകീപ്പർ യാസ്സിൻ ബോനോയുടെ പ്രകടനമാണ്. നിശ്ചിത സമയത്ത് ഡച്ച് താരം വാൻ ഡെ വെനിന്റെ ഗോളെന്നുറച്ച ഒരു ഷോട്ട് രക്ഷപ്പെടുത്തിയ ബോനോ തുടർന്നും ഏതാനും രക്ഷപ്പെടുത്തലുകൾ നടത്തി. പിന്നീട് ഷൂട്ടൗട്ടിൽ നെതർലൻഡ്‌സ് താരം ക്രിസെൻസിയോ സോമർവിലിന്റെ കിക്ക് അവിശ്വസനീയമായ അനായാസതയോടെ തടുത്തിട്ട പ്രകടനമാണ് യാസ്സിൻ ബോനോയെ താരമാക്കുന്നത്. ഒരു വശത്തേക്കും ഡൈവ് ചെയ്യാതെ എഴുന്നേറ്റു നിന്നാണ് ബോനോ, സോമർവിലിന്റെ കിക്ക് തടുത്തിട്ടത്. പന്ത് എങ്ങോട്ടുവരുമെന്ന് മുൻകൂട്ടി അറിയായിരുന്നതുപോലെയായിരുന്നു ആ രക്ഷപ്പെടുത്തൽ.

2022 ഖത്തർ ലോകകപ്പിന്റെ പ്രീക്വാർട്ടറിൽ ഷൂട്ടൗട്ടിലേക്ക് നീണ്ട സ്‌പെയിനിനെതിരായ മത്സരത്തിലും താരം ബോനോയായിരുന്നു. അന്ന് സ്‌പെയിനിന്റെ രണ്ട് കിക്കുകളാണ് ബോനോ തടുത്തിട്ടത്. കരിയറിൽ ഇതുവരെ നേരിട്ട 61 പെനാൽറ്റികളിൽ 15 എണ്ണം ബോനോ തടുത്തിട്ടിട്ടുണ്ട്. ഇതിൽ ഒമ്പത് എണ്ണം നിശ്ചിത സമയത്തും ആറ് എണ്ണം ഷൂട്ടൗട്ടുകളിലുമായിരുന്നു.

2022 ലോകകപ്പിൽ സ്പെയിനിനെതിരായ പ്രീ-ക്വാർട്ടർ മത്സരത്തിൽ ബോനോ നടത്തിയ രണ്ട് സേവുകൾ മൊറോക്കോയെ ചരിത്രപരമായ വിജയത്തിലേക്കാണ് നയിച്ചത്. സ്പാനിഷ് താരങ്ങളായ കാർലോസ് സോളറിന്റെയും സെർജിയോ ബുസ്‌ക്വെറ്റ്‌സിന്റെയും കിക്കുകളാണ് അന്ന് ബോനോ തടഞ്ഞത്.

പിന്നീട് 2025-ലെ ആഫ്രിക്കൻ നേഷൻസ് കപ്പിന്റെ സെമി ഫൈനലിൽ നൈജീരിയക്കെതിരെയും രണ്ട് പെനാൽറ്റി കിക്കുകൾ തടുത്തിട്ട് അദ്ദേഹം വീണ്ടും മൊറോക്കോയുടെ ഹീറോയായി. സ്പാനിഷ് ക്ലബ്ബ് സെവിയ്യക്ക് വേണ്ടി കളിക്കുമ്പോൾ യൂറോപ്പ ലീഗ് ഉൾപ്പെടെയുള്ള പ്രധാന ടൂർണമെന്റുകളിലെ നോക്കൗട്ട് ഘട്ടങ്ങളിൽ അദ്ദേഹം സമാനമായ രീതിയിൽ ടീമിന്റെ രക്ഷകനായിട്ടുണ്ട്.

കളിക്കളത്തിലെ മികവിനു പുറമെ, ജീവകാരുണ്യ പ്രവർത്തനങ്ങളിലും ബോനോ സജീവമാണ്. 2023-ൽ മൊറോക്കോയിലുണ്ടായ ഭൂകമ്പത്തെത്തുടർന്ന് ദുരിതബാധിതരെ സഹായിക്കുന്നതിനായി അദ്ദേഹം തന്റെ സഹതാരങ്ങൾക്കൊപ്പം രക്തദാന ക്യാമ്പുകളിൽ പങ്കെടുത്തിരുന്നു.

Content Highlights: Morocco advanced to the Round of 16 after defeating Netherlands on penalties., Yassine Bounou's exceptional save against Summerville highlighted the match., Bounou has saved 15 out of 61 career penalties., Historical context includes his 2022 World Cup performance and 2025 AFCON heroics., Bounou is recognized for both his athletic prowess and charitable work.