'അന്ന് അച്ഛൻ മുറി അടച്ചിരുന്ന് കരയും, ഞാൻ കാണുന്നില്ലെന്ന് അദ്ദേഹം കരുതി'

കഴിഞ്ഞ മാസമാണ് ലയണൽ മെസ്സിയുടെ പിതാവ് ഹോർഹെ മെസ്സി വിട പറഞ്ഞത്. റൊസാരിയോയിലെ സ്വകാര്യ ആശുപത്രിയിലായിരുന്നു അന്ത്യം. ഇതിന് പിന്നാലെ പിതാവിന്റെ മരണാനന്തര ചടങ്ങിൽ പങ്കെടുക്കാൻ മെസ്സി യുഎസ്സിൽ നിന്ന് റൊസാരിയോയിലെത്തിയിരുന്നു. തന്റെ ജീവിതത്തിലെ പ്രതിസന്ധി നിറഞ്ഞ വേളയായതിനാൽ സ്വകാര്യത ആഗ്രഹിക്കുന്ന മെസ്സി മാധ്യമങ്ങളിൽ നിന്നും പൊതുവേദികളിൽ നിന്നും അകലം പാലിക്കുകയും ചെയ്തിരുന്നു.

മെസ്സിയുടെ കരിയറിലെ നിർണായക വഴിത്തിരിവാണ് അച്ഛൻ ഹോർഹെ മെസ്സി. കുട്ടിക്കാലത്ത് തന്നെ മെസ്സിയെ ബാഴ്‌സലോണയിലെ അക്കാദമിയിലെത്തിച്ചത് അച്ഛനാണ്. തന്റെ സ്വപ്‌നങ്ങൾ സാക്ഷാത്കരിക്കാനായുള്ള അച്ഛന്റെ ത്യാഗങ്ങളെ കുറിച്ച് മുമ്പ് അഭിമുഖത്തിൽ മെസ്സി പറഞ്ഞിട്ടുണ്ട്. തന്റെ പരിശീലനത്തിനായി കുടുംബത്തോടൊപ്പം ബാഴ്‌സലോണയിലേക്ക് മാറിയപ്പോൾ പിതാവ് അനുഭവിച്ച ബുദ്ധിമുട്ടുകളെ കുറിച്ചാണ് മെസ്സി അന്ന് തുറന്ന് സംസാരിച്ചത്.

'ഞങ്ങൾ ബാഴ്‌സലോണയിൽ എത്തിയപ്പോൾ എന്റെ മുറി അടച്ചിരുന്ന് ഞാൻ ഒറ്റയ്ക്ക് കരയാറുണ്ടായിരുന്നു. അന്ന് എന്റെ അച്ഛനും അതുപോലെ തന്നെ ചെയ്തിരുന്നു. ഒന്നുകിൽ ഞാൻ കാണാതെ, അല്ലെങ്കിൽ ഞാൻ കാണുന്നില്ല എന്ന് കരുതി. ഞങ്ങൾ രണ്ടുപേരും കുഴപ്പമില്ലാതെ അന്ന് അഭിനയിച്ചു. പക്ഷേ ഞങ്ങൾ രണ്ടു പേരും വളരേയധികം കഷ്ടപ്പെടുകയായിരുന്നു. കാര്യങ്ങൾ കഠിനമായപ്പോൾ എന്ത് ചെയ്യണം എന്നതിനെക്കുറിച്ച് അച്ഛൻ എന്നോട് ചോദിച്ചു. ബാഴ്‌സയിൽ മുന്നോട്ട് പോകണോ അതോ തിരിച്ച് നാട്ടിലേക്ക് പോകണോ എന്നായിരുന്നു ചോദ്യം. എനിക്ക് മുന്നോട്ടുപോകാനായിരുന്നു താത്പര്യം. അത് പറഞ്ഞപ്പോൾ അച്ഛൻ എന്റെ കൂടെത്തന്നെ നിന്നു.'-മെസ്സി അന്ന് അഭിമുഖത്തിൽ പറഞ്ഞു.

2022-ൽ ലോകകപ്പ് നേടിയതിന് ശേഷം, ഡയറക്ട് ടിവി സ്‌പോർട്‌സിന് നൽകിയ മറ്റൊരു അഭിമുഖത്തിലും തന്റെ പിതാവിന്റെ പിന്തുണയെക്കുറിച്ച് മെസ്സി തുറന്നു പറയുന്നുണ്ട്. ''എന്റെ അച്ഛൻ എന്നെ അളവില്ലാതെ സഹായിച്ചു. അദ്ദേഹം എന്നെക്കുറിച്ച് വളരെ വിമർശനാത്മകമായി ചിന്തിക്കാറുണ്ട്. അത് എന്നെ എപ്പോഴും കൂടുതൽ കഠിനാധ്വാനം ചെയ്യാൻ പ്രേരിപ്പിച്ചു.'-അന്ന് മെസ്സി പറഞ്ഞത് ഇങ്ങനെയാണ്.

സ്‌പെയിനെതിരെയുള്ള ലോകകപ്പ് ഫൈനൽ നഷ്ടപ്പെട്ടതിന് തൊട്ടുപിന്നാലെയാണ് ഏറെക്കാലമായി അസുഖ ബാധിതനായിരുന്ന ഹോർഹെ മെസ്സി അന്തരിച്ചത്. അദ്ദേഹത്തിന് 68 വയസ്സായിരുന്നു.

ഇതിന് പിന്നാലെ മെസ്സി പിതാവിനെ കുറിച്ച് സോഷ്യൽ മീഡിയയിൽ വികാരനിർഭരമായ കുറിപ്പ് പങ്കുവെച്ചിരുന്നു. 'തുടക്കം മുതൽ നിങ്ങൾ എന്റെ കൂടെയുണ്ടായിരുന്നു. ഞാൻ എന്റെ കരിയറിന്റെ അവസാനത്തോട് അടുത്തിരുന്നു. അത് ഒരുമിച്ച് അവസാനിപ്പിക്കാൻ കൂടി കൂടെ നിൽക്കണമായിരുന്നു. അതിന് മുന്നേ വിട വാങ്ങി. 2026 ലോകകപ്പിൽ കളിക്കണമെന്ന് നിങ്ങൾ എന്നോട് നിരന്തരം ആവശ്യപ്പെട്ടിരുന്നു. അത് ആരംഭിക്കുന്നതിന് ദിവസങ്ങൾക്ക് മുമ്പാണ് നിങ്ങളുടെ ആരോഗ്യനില വഷളായത്. ഒരു ടൂർണമെന്റിൽ നിങ്ങൾ ഇല്ലാതിരുന്ന ആദ്യത്തെ മത്സരമായിരുന്നു അത്. എങ്കിലും നിങ്ങൾ സുഖം പ്രാപിക്കുമെന്ന് അമ്മ എന്നോട് പറഞ്ഞുകൊണ്ടേയിരുന്നു.'-മെസ്സി സോഷ്യൽ മീഡിയയിൽ അന്ന് കുറിച്ചു.

Content Highlights: Jorge Messi passed away at age 68 after a prolonged illness in Rosario, Argentina., The tragedy occurred just days after Lionel Messi's 2026 World Cup heartbreak against Spain., Lionel Messi shared a deeply emotional tribute on social media, thanking his father for lifelong support and sacrifices.