ധോനിയാവാന് ശ്രമിച്ച് ബൗളറായി, പന്തില് കെണിവല തീര്ത്ത ഫിനിഷര്; യഷ് താക്കൂര് തുടങ്ങിയിട്ടേയുള്ളൂ
ഊണിലും ഉറക്കത്തിലും ധോനിയാവണം എന്ന് സ്വപ്നം കണ്ടുനടന്ന പയ്യനെ പിടിച്ച് അമ്മ ഒരുനാള് സംഗീതക്ലാസിൽ കൊണ്ടുപോയി ചേര്ത്തു. ചേര്ത്തതിന്റെ പിറ്റേന്നുതന്നെ ടീച്ചര് വിളിച്ചു പറഞ്ഞു: 'ദയവായി നാളെ മുതല് അവനെ ഇങ്ങോട്ട് വിടരുത്. നേരാംവണ്ണം സംസാരിക്കുന്നതു പോലുമില്ല. അത്രയ്ക്ക് നാണംകുണുങ്ങിയാണവന്. ഈ വിധത്തിലാണെങ്കില്, കൊച്ചിന് പാട്ടുപാടാന് കഴിയുമെന്ന് തോന്നുന്നില്ല'.
ടീച്ചര് വളരെ ഹൃദയാലുവായിട്ടാണ് ഇക്കാര്യം വിളിച്ചറിയിച്ചതെങ്കിലും, അമ്മ അത് കേട്ടമാത്രയില് തന്നെ പൊട്ടിച്ചിരിക്കുകയാണ് ചെയ്തത്. വാസ്തവത്തില് യഷ് ഒരു ഉഗ്രന് ഗായകനായിരുന്നു. ടീച്ചറുടെ മുന്പിലോ ക്ലാസിലോ വായ തുറക്കാതിരുന്നതുകൊണ്ട് അവര്ക്ക് അക്കാര്യം മനസ്സിലാകാതെ പോയെന്നേയുള്ളൂ. മകന്റെ ആലാപന മികവ് നിരവധി തവണ കേട്ട് അനുഭവിച്ചതാണ് ആ അമ്മ. പക്ഷേ, ധോനിയാവാന് നടക്കുന്ന പയ്യന് അങ്ങനെ വല്ല വിചാരവും വേണ്ടേ... അങ്ങനെ മകനെ സംഗീതം പഠിപ്പിക്കണമെന്ന മോഹം അമ്മ അവിടെ അവസാനിപ്പിച്ചു.
Content Highlights: yash thakur lsg player cricket career life story