ഈ വിജയങ്ങൾക്കും കിരീടങ്ങൾക്കും എറിഞ്ഞു പൊട്ടിക്കാത്ത റാക്കറ്റുകൾക്കും അപ്പുറം മറ്റു പലതുമാണ് റാഫ

മഞ്ഞപ്പന്തും റാക്കറ്റുമായി ഒരു മയ്യോര്‍ക്കക്കാരന്‍ രണ്ടു ദശാബ്ദത്തിലധികമാടിയ പ്രണയ നാടകത്തിന്റെ അവസാന രംഗത്തിന് കഴിഞ്ഞദിവസം മലാഗയില്‍ തിരശ്ശീല വീണു. റൊളാങ് ഗാരോസിലും ഫ്ളഷിങ് മെഡോസിലും കളിമണ്ണിലും പുല്‍ത്തകിടിയിലും ഹാര്‍ഡ് കോര്‍ട്ടിലുമൊക്കെ റാഫേല്‍ നഡാലെന്ന ആ പ്രണയ നായകന്റെ ആട്ടം കാണുവാന്‍ കഴിഞ്ഞുവെന്നതാണ് കായികപ്രേമികളുടെ പുണ്യം. കളിക്കളം കണ്ട ഏറ്റവും ഗുണവാനായൊരു നായകനെന്ന വിശേഷണത്തിലായിരിക്കും റാഫ അറിയപ്പെടുക. ഇരുപത്തൊന്നാം നൂറ്റാണ്ടിന്റെ ആദ്യ രണ്ട് ദശാബ്ദങ്ങളില്‍ കളിക്കളം വാണ ടെന്നീസ് ത്രയങ്ങളില്‍ റോജര്‍ ഫെഡററെന്ന ഇതിഹാസത്തെക്കാളും നൊവാക് ജോക്കോവിച്ചെന്ന ഒറ്റയ്ക്കു വഴിവെട്ടിവന്ന പോരാളിയേക്കാളും ഒരു പണത്തൂക്കം മുന്നില്‍ റാഫ നില്‍ക്കുന്നത് ഈ സ്വഭാവവിശേഷം കൊണ്ടായിരിക്കും.

കളിക്കളത്തിനകത്തും പുറത്തും ഒരുപോലെ ഒരു പോലെ മാന്യനായിരിക്കുക അത്ര എളുപ്പമല്ല. ടെന്നീസ് പ്രേമികളുടെ ഹൃദയം കീഴടക്കിയ താരം എന്ന ബഹുമതി റോജര്‍ ഫെഡററര്‍ക്കുള്ളതാണ്. സാക്ഷാല്‍ ഫെഡറര്‍ പോലും ടീനേജിന്റെ തുടക്കത്തില്‍ ഒരു ചൂടന്‍ താരമായിരുന്നു. ഫെഡററുടെ ആത്മകഥയായ 'ദ മാസ്റ്ററില്‍' ടീനേജില്‍ താരം കാണിച്ചിരുന്ന വിക്രിയകളെക്കുറിച്ചും ചൂടന്‍ സ്വഭാത്തെക്കുറിച്ചും പരിശീലകന്റെ സഹായത്തോടെ ആ ദൗര്‍ബല്യങ്ങളില്‍ നിന്ന് കരയകയറിയതിനെക്കുറിച്ചുമൊക്കെ വിശദമാക്കുന്നുണ്ട്. വികാരങ്ങളെ അടക്കി കളിക്കളത്തിനകത്തും പുറത്തും ഏറ്റവും സ്നേഹിക്കപ്പെടുന്ന താരമാകാന്‍ വര്‍ഷങ്ങള്‍ക്കിപ്പുറം ഫെഡറര്‍ക്കു കഴിഞ്ഞു.

Content Highlights: rafael-nadal-tennis-legacy-retirement-sportsmanship