അല്ക്കരാസ് അത്ഭുതമാകുന്നത് ഇങ്ങനെയാണ്
കാളപ്പോരിന് പേരുകേട്ട ഇടമാണ് സ്‌പെയിന്‍. അതുകൊണ്ടുതന്നെ ആ നാട്ടില്‍നിന്ന് വരുന്ന കായികതാരങ്ങള്‍ക്ക് അല്‍പ്പം ഉശിര് കൂടും. റാഫേല്‍ നദാലും കാര്‍ലോസ് പുയോളും ഫെര്‍ണാണ്ടോ അലോണ്‍സോയുമെല്ലാം കായികരംഗത്ത് അത് തെളിയിക്കുകയും ചെയ്തു. സ്‌പെയിന്‍ ജന്മം നൽകിയ ലോകോത്തര കായികതാരങ്ങളിലെ ഇളമുറത്തമ്പുരാനാണ് കാര്‍ലോസ് അല്ക്കരാസ് ഗാര്‍ഫിയ. കാലിലും കൈയിലും അത്ഭുതമൊളിപ്പിച്ച് ടെന്നീസ് കോര്‍ട്ടിനെ അടക്കിവാഴുന്ന യുവരാജാവ്. കൗമാരം പിന്നിടുമ്പോഴേക്കും അല്‍ക്കരാസിന്റെ ഷെല്‍ഫിലുള്ളത് രണ്ട് ഗ്രാന്‍ഡ്സ്ലാം കിരീടങ്ങളാണ്. മറ്റു താരങ്ങള്‍ ഒന്നെങ്കിലും നേടാനായി കിണഞ്ഞുശ്രമിക്കുമ്പോള്‍ സ്വതസിദ്ധമായ ശൈലിയുടെയും തികഞ്ഞ ആത്മസമര്‍പ്പണത്തിന്റെയും കരുത്തില്‍ അല്ക്കരാസ് കൗമാരത്തില്‍ തന്നെ അത് സ്വന്തമാക്കി.
നിലവില്‍ ലോകറാങ്കിങ്ങില്‍ ഒന്നാം സ്ഥാനത്തുള്ള അല്‍ക്കരാസിന്റെ പ്രതിഭയുടെ ആഴം ജൂലായ് 16-ന് രാത്രി നടന്ന വിംബിള്‍ഡണ്‍ ഫൈനലിലൂടെ ലോകം തിരിച്ചറിഞ്ഞു. 23 ഗ്രാന്‍ഡ്സ്ലാം കിരീടം നേടി ടെന്നീസ് ലോകത്ത് എതിരാളികളില്ലാത്ത രാജാവായി വിലസുന്ന സാക്ഷാല്‍ നോവാക് ജോക്കോവിച്ചിനെ അദ്ദേഹത്തിന്റെ ഇഷ്ട കോര്‍ട്ടില്‍ മുട്ടുകുത്തിച്ച് 2023 വിംബിള്‍ഡണ്‍ കിരീടത്തില്‍ മുത്തമിട്ടെങ്കില്‍ അല്ക്കരാസ് ചില്ലറക്കാരനല്ല. ആദ്യ സെറ്റില്‍ 6-1 ന് നാണംകെട്ടിട്ടും കാണികളുടെ കൂക്കുവിളികള്‍ കാതുകളില്‍ അമ്പുകണക്കെ തറച്ചുകയറിയിട്ടും ഈ 20-കാരന്‍ പതറിയില്ല. തുടക്കക്കാരന്റെ അങ്കലാപ്പില്ലാതെ ആദ്യമായി വിംബിള്‍ഡണ്‍ ഫൈനലില്‍ കളിക്കുന്നതിന്റെ പരിഭ്രമമൊന്നും കാണിക്കാതെ ശാന്തനായി അല്ക്കരാസ് പൊരുതാനൊരുങ്ങി. ആദ്യസെറ്റില്‍ തന്നെ നാണം കെടുത്തിയ ജോക്കോയെ രണ്ടാം സെറ്റില്‍ ടൈബ്രേക്കറിലൂടെ 7-6 ന് വീഴ്ത്തി അല്ക്കരാസ് മത്സരത്തില്‍ ഒപ്പത്തിനെത്തി. ആവേശം അണപൊട്ടിയ ടൈബ്രേക്കറില്‍ 8-6 എന്ന സ്‌കോറിനാണ് താരത്തിന്റെ വിജയം.
Content Highlights: life story of 2023 mens wimbledon winner carlos alcaraz