പുറത്തായതിന് പിന്നാലെ വൈഭവിന് നേരെ കൈചൂണ്ടി രാജസ്ഥാൻ നായകൻ; നിസ്സഹായനായി കൗമാരതാരം

ജയ്പുർ: ഐപിഎല്ലിൽ ഗുജറാത്തിനോട് തോറ്റ് ഫൈനൽ കാണാത പുറത്തായെങ്കിലും രാജസ്ഥാൻ താരം വൈഭവ് സൂര്യവംശിയുടെ പ്രകടനം ശ്രദ്ധേയമായി. വിക്കറ്റുകൾ നിരനിരയായി നഷ്ടമാകുമ്പോഴും ക്രീസിൽ നിലയുറപ്പിച്ച് ബാറ്റേന്തിയ വൈഭവ് ഏറെക്കുറെ ഒറ്റയ്ക്കാണ് ടീമിനെ കരകയറ്റിയത്. 96 റൺസുമായി ടീമിന്റെ ടോപ് സ്‌കോററുമായി. എന്നാൽ, പുറത്തായതിന് പിന്നാലെ വൈഭവിനോട് അൽപ്പം രോഷത്തോടെയാണ് രാജസ്ഥാൻ നായകൻ സംസാരിച്ചത്. ഇത് ആരാധകർക്കിടയിൽ വൻ ചർച്ചയായി.

സെഞ്ചുറി നേടുമെന്ന് തോന്നിച്ചെങ്കിലും നാല് റൺസ് അകലെ താരം മടങ്ങി. 47 പന്തിൽ 96 റൺസെടുത്ത സൂര്യവംശി രാജസ്ഥാൻ ഇന്നിങ്‌സിലെ ടോപ് സ്‌കോററുമായി. പുറത്തായതിന് പിന്നാലെ നിരാശയോടെയാണ് വൈഭവ് കളം വിട്ടത്. ശേഷം ഡഗൗട്ടിൽ ഇരുന്ന വൈഭവിനെ രാജസ്ഥാൻ നായകൻ റിയാൻ പരാഗ് സമീപിക്കുകയും ദേഷ്യത്തോടെ സംസാരിക്കുകയുമായിരുന്നു. വൈഭവിനുനേരെ കൈചൂണ്ടി സംസാരിക്കുന്നത് ക്യാമറകൾ ഒപ്പിയെടുത്തു. നിസ്സഹായതയോടെ വൈഭവ് പ്രതികരിക്കുന്നതും കാണാം. ഇതിന്റെ വീഡിയോ വ്യാപകമായി പ്രചരിച്ചു.

പിന്നാലെ, രാജസ്ഥാൻ ആരാധകർ പരാഗിനെതിരേ തിരിഞ്ഞു. ടീമിനെ തകർച്ചയിൽനിന്ന് കരകയറ്റിയ താരത്തോട് ഇങ്ങനെ പെരുമാറിയതെന്തിനാണെന്നാണ് പലരും ചോദിക്കുന്നത്. പരസ്യമായി ദേഷ്യപ്പെട്ടത് തെറ്റാണെന്നും വൈഭവിനോട് ഇങ്ങനെ പറയാൻ പരാഗിന് എന്ത് അവകാശമാണുള്ളതെന്നും ആരാധകർ ചോദിക്കുന്നു. കൗമാരക്കാരനെ മാനസികമായി തളർത്തുകയാണോ എന്ന സംശയവും പലരും പങ്കുവെച്ചു. മത്സരത്തിൽ വെറും 11 റൺസെടുത്ത് പുറത്തായ പരാഗിനെ രൂക്ഷമായി വിമർശിക്കുകയും ചെയ്തു.

ഒരുവശത്ത് വിക്കറ്റ് പൊഴിഞ്ഞതോടെ ശ്രദ്ധിച്ചാണ് സൂര്യവംശി തുടക്കത്തിൽ കളിച്ചത്. 31 പന്തിലാണ് അർധസെഞ്ചുറി വന്നത്. താരത്തിന്റെ ഐ.പി.എലിലെ വേഗം കുറഞ്ഞ അർധശതകമാണിത്. എന്നാൽ, അർധസെഞ്ചുറിക്കുശേഷം ബാറ്റിങ് അതിവേഗത്തിലായി. അടുത്ത 16 പന്തിൽ 46 റൺസ് വന്നു. എട്ട് ഫോറും ഏഴ് സിക്സും സൂര്യവംശിയുടെ ഇന്നിങ്സിലുണ്ട്. 204.25 ആണ് സ്ട്രൈക്ക് റേറ്റ്. കഗീസോ റബാഡയുടെ പന്തിലാണ് സെഞ്ചുറിക്ക് നാല് റൺസ് മാത്രം അകലെവെച്ച് താരം പുറത്തായത്.ജഡേജ (35 പന്തിൽ 47) കൗമാരതാരത്തിന് ഉറച്ചപിന്തുണ നൽകി.

എന്നാൽ, ശുഭ്മൻ ഗിലിന്റെ തകർപ്പൻ സെഞ്ചുറിയും (53 പന്തിൽ 104), സായ് സുദർശന്റെ അർധ സെഞ്ചുറിയും (32 പന്തിൽ 58) ഗുജറാത്തിന്റെ പോരാട്ടം അനായാസമാക്കി. ഓപ്പണിങ് വിക്കറ്റിൽ 12.5 ഓവറിൽ 167 റൺസ് വന്നതോടെ ഗുജറാത്ത് ജയമുറപ്പിച്ചു. ഫൈനലിലെത്താനാവാതെ വന്നതോടെ നിരാശയോടെ ഡഗൗട്ടിലിരിക്കുന്ന വൈഭവിനെയാണ് കണ്ടത്. കടുത്ത നിരാശയിലായിരുന്നു പതിനഞ്ചുകാരൻ. മുഖം മറച്ചുനിൽക്കുന്ന കൗമാരതാരത്തിന്റെ ചിത്രങ്ങൾ വ്യാപകമായി പ്രചരിക്കുന്നുണ്ട്.

Content Highlights: Vaibhav Suryavanshi scored a brilliant 96 off 47 balls against Gujarat Titans in IPL 2026., Viral video shows Riyan Parag confronting the teenager in the dugout., Fans criticized Parag for his behavior after the youngster's valiant effort to save the innings., Shubman Gill's century powered Gujarat Titans to victory, knocking RR out of the tournament., Vaibhav's innings included 8 fours and 7 sixes at a strike rate of 204.25.