വിരാട് സിങ്ങിനും ആദിത്യ സിങ്ങിനും സെഞ്ചുറി; കേരളത്തിനെതിരെ ഝാർഖണ്ഡിന് കൂറ്റൻ സ്‌കോർ

ജംഷെഡ്പുർ: രഞ്ജി ട്രോഫിയിൽ കേരളത്തിനെതിരെ കൂറ്റൻ സ്‌കോറുയർത്തി ഝാർഖണ്ഡ്. ക്യാപ്റ്റൻ വിരാട് സിങ്ങിന്റെയും ശിഖർ മോഹന്റെയും ആദിത്യ സിങ്ങിന്റെയും സെഞ്ചുറികളുടെ പിൻബലത്തിൽ ആദ്യ ഇന്നിങ്‌സിൽ ഝാർഖണ്ഡ് 587 റൺസ് നേടി. കേരളത്തിനായി വൈശാഖ് ചന്ദ്രൻ അഞ്ച് വിക്കറ്റ് വീഴ്ത്തി.

അഞ്ച് വിക്കറ്റ് നഷ്ടത്തിൽ 289 റൺസെന്ന നിലയിലാണ് ഝാഖണ്ഡ് രണ്ടാം ദിവസം ബാറ്റിങ് തുടങ്ങിയത്. കരുതലോടെ ഇന്നിങ്‌സ് മുന്നോട്ടു നീക്കിയ ക്യാപ്റ്റൻ വിരാട് സിങ്ങും ആദിത്യ സിങ്ങും ചേർന്ന് 80 റൺസ് മാത്രമാണ് ആദ്യ സെഷനിൽ കൂട്ടിച്ചേർത്തത്. കേരള ക്യാപ്റ്റൻ വിഷ്ണു വിനോദ് ബൗളർമാരെ മാറിമാറി പരീക്ഷിച്ചെങ്കിലും ഫലമുണ്ടായില്ല. ചായയ്ക്ക് പിരിയുംമുൻപ് ആദിത്യയും മൂന്നാം സെഷന്റെ തുടക്കത്തിൽ തന്നെ വിരാട് സിങ്ങും തങ്ങളുടെ സെഞ്ചുറികൾ പൂർത്തിയാക്കി.

സ്‌കോർ 506ൽ നിൽക്കെ വിരാട് സിങ്ങിനെ സച്ചിൻ ബേബിയുടെ കൈകളിലെത്തിച്ച് വൈശാഖ് ചന്ദ്രനാണ് ഈ കൂട്ടുകെട്ടിന് അവസാനമിട്ടത്. 263 പന്തുകളിൽ ഒൻപത് ബൗണ്ടറികളടക്കം 108 റൺസാണ് വിരാട് നേടിയത്. ഈ ക്യാച്ചോടെ സച്ചിൻ ബേബി ഫസ്റ്റ് ക്ലാസ് ക്രിക്കറ്റിൽ നൂറ് ക്യാച്ചുകളെന്ന അപൂർവ്വ നേട്ടവും സ്വന്തമാക്കി.

വൈകാതെ ആദിത്യ സർവാദെയുടെ പന്തിൽ ക്ലീൻ ബൗൾഡായി ആദിത്യ സിങ്ങും മടങ്ങി. 279 പന്തുകളിൽ 17 ബൗണ്ടറികളടക്കം 147 റൺസാണ് ആദിത്യ നേടിയത്. തുടർന്നെത്തിയ സാഹിൽ രാജ് 19-ഉം മനീഷി 20 ഉം സുശാന്ത് മിത്ര 18ഉം റൺസെടുത്ത് പുറത്തായി. കേരളത്തിനായി വൈശാഖ് ചന്ദ്രൻ അഞ്ചും ജലജ് സക്‌സേന മൂന്നും ആദിത്യ സർവാദെ രണ്ടും വിക്കറ്റുകൾ വീഴ്ത്തി.

Content Highlights: Jharkhand scored a massive 587 runs in the first innings against Kerala in the Ranji Trophy., Centuries from captain Virat Singh (108) and Aditya Singh (147) anchored Jharkhand's innings., Kerala bowler Vaisakh Chandran took 5 wickets in the match., Sachin Baby completed a milestone of 100 catches in first-class cricket.