ഒരാൾ ഇറങ്ങുമ്പോൾ മറ്റേയാൾ കയറും, പിന്നെ മറ്റൊരാൾ; മൂന്നാം നമ്പറിൽ ഇന്ത്യയ്ക്ക് പരീക്ഷണ കാലം

രണ്ടുവർഷത്തോളമായി ഇന്ത്യൻ ടെസ്റ്റ് ടീമിന്റെ മൂന്നാം നമ്പർ പൊസിഷൻ റിവോൾവിങ് ഡോർ പോലെയാണ് പ്രവർത്തിക്കുന്നതെന്ന് വിമർശനം ഉയർന്നുകഴിഞ്ഞു. ഒരാൾ ഇറങ്ങുമ്പോൾ മറ്റൊരാൾ കയറും. പിന്നാലെ മറ്റൊരാൾ വരും. അപ്പോൾ നേരത്തേ കയറിയ ആൾ ഇറങ്ങും. ടീമിന്റെ ആസൂത്രണത്തിലെ അനിശ്ചിതത്വം ഇതിൽ കാണാം. ശ്രീലങ്കയ്‌ക്കെതിരായ പരമ്പര ആരംഭിക്കാനിരിക്കേ, മൂന്നാം നമ്പറിൽ ആരാകും ബാറ്റുചെയ്യുകയെന്ന ചർച്ച ഉയർന്നുകഴിഞ്ഞു.

ഡൗൺ ആകാത്ത വൺഡൗൺ

ടെസ്റ്റ് ക്രിക്കറ്റിൽ ഏറ്റവും കുഴപ്പംപിടിച്ച ബാറ്റിങ് പൊസിഷനാണ് മൂന്നാമൻ അഥവാ വൺ ഡൗൺ. ചിലപ്പോൾ രണ്ടാമത്തെ പന്തിൽത്തന്നെ ക്രീസിലെത്തേണ്ടിവരും. ഓപ്പണർമാർ ഉറച്ചുനിന്നാൽ ചിലപ്പോൾ ഒന്നോ രണ്ടോ സെഷൻ കഴിഞ്ഞ് ഇറങ്ങിയാൽ മതിയാകും. അതായത്, കളിയുടെ സാഹചര്യമനുസരിച്ച് മൂന്നാമന്റെ ചുമതല മാറും. തുടക്കത്തിലേ ഓപ്പണറുടെ വിക്കറ്റ് നഷ്ടപ്പെട്ടാൽ ഇന്നിങ്‌സിന് അടിത്തറയിടാൻ കഴിയണം. തുടർന്ന് മധ്യനിരയെ കൂട്ടുപിടിച്ച് സ്‌കോർ കൺസോളിഡേറ്റ് (ശക്തിപ്പെടുത്തൽ) ചെയ്യണം. ചുരുക്കത്തിൽ ഇന്നിങ്‌സിന് ദിശാബോധം നൽകുന്നയാളാണ് മൂന്നാമൻ. ഒരു ടെസ്റ്റ് ടീമിന്റെ പ്രതീകമായും മൂന്നാമനെ വിശേഷിപ്പിക്കാറുണ്ട്. ഉദാഹരണം റിക്കി പോണ്ടിങ്. തുടക്കത്തിലേ ആക്രമിച്ചു കളിക്കുന്നവരാണ് ഓസ്‌ട്രേലിയക്കാർ. ടീം തകർച്ച നേരിട്ടാൽ പ്രത്യാക്രമണം നടത്തി മേൽക്കൈനേടാൻ ശ്രമിക്കും. രണ്ടിനും പോന്നയാളായിരുന്നു പോണ്ടിങ്. വിദേശപിച്ചുകളിലെ സ്വിങ്, സീം എന്നിവയെ മലപോലെനിന്ന് നേരിട്ട് ബൗളർമാരെ ക്ഷീണിതരാക്കി മധ്യനിരയ്ക്ക് കളി എളുപ്പമാക്കിക്കൊടുക്കുന്ന ജോലിയാണ് രാഹുൽ ദ്രാവിഡും ചേതേശ്വർ പൂജാരയും ഇന്ത്യക്കുവേണ്ടി ചെയ്തത്. കുമാർ സംഗക്കാര, കെയ്ൻ വില്യംസൺ, ഹാഷിം ആംല തുടങ്ങിയവരും ഈ പൊസിഷനിലെ വിഖ്യാത കളിക്കാരാണ്.

പടിക്കലോ സുദർശനോ?

രണ്ടുവർഷത്തോളമായി മൂന്നാംനമ്പറിലേക്ക് ആളെ കണ്ടെത്താനാകാതെ ഇന്ത്യ വിഷമിക്കുകയാണ്. പൂജാര വിരമിച്ചത് കഴിഞ്ഞവർഷമാണെങ്കിലും 2023 ടെസ്റ്റ് ചാമ്പ്യൻഷിപ്പ് ഫൈനലോടെ അദ്ദേഹത്തിന് ടീമിൽ സ്ഥാനം നഷ്ടപ്പെട്ടിരുന്നു. തുടർച്ചയായ പരാജയങ്ങളും ഇഴയുന്ന ബാറ്റിങ്ങുമാണ് ഇതിനു കാരണമായത്. ആക്രമണോത്സുകത ടെസ്റ്റിന്റെയും ഭാഗമായപ്പോൾ ക്ലാസിക് ടെസ്റ്റ് ബാറ്ററായിരുന്ന ആ കളിക്കാരന്റെ കരിയറിന് വിരാമമായി. 2024 ജൂലായിൽ ഗൗതം ഗംഭീർ കോച്ചായി ചുമതലയേറ്റശേഷം മൂന്നാം നമ്പറിൽ പരീക്ഷണങ്ങളുടെ കാലമായിരുന്നു. ഇതുവരെ പരീക്ഷിച്ചത് ഏഴുപേരെ. എന്നിട്ടും ആ പൊസിഷനിൽ ആളെ ഉറപ്പിക്കാനായിട്ടില്ല. ഇന്ത്യൻ ടെസ്റ്റ് ടീമിന്റെ അടുത്തകാലത്തെ ദയനീയ പ്രകടനങ്ങൾക്ക് ഈ ആശയക്കുഴപ്പവും കാരണമാണ്. സ്‌പെഷ്യലിസ്റ്റ് ബാറ്റർ അല്ലാഞ്ഞിട്ടുകൂടി വാഷിങ്ടൺ സുന്ദറിനെ ദക്ഷിണാഫ്രിക്കയ്‌ക്കെതിരേ മൂന്നാം നമ്പറിൽ കളിപ്പിക്കുന്നതും ക്രിക്കറ്റ് പ്രേമികൾ ഞെട്ടലോടെ കണ്ടു.

ശുഭ്മൻ ഗിൽ, സായ് സുദർശൻ, കരുൺ നായർ, വിരാട് കോലി, വാഷിങ്ടൺ സുന്ദർ, ദേവദത്ത് പടിക്കൽ, കെ.എൽ. രാഹുൽ എന്നിവരാണ് ഗംഭീർ വന്നശേഷം മൂന്നാം നമ്പറിൽ പരീക്ഷിക്കപ്പെട്ടവർ. ന്യൂസീലൻഡിനെതിരേ ബെംഗളൂരുവിലാണ് കോലി തന്റെ പ്രിയപ്പെട്ട നാലാം നമ്പർ വിട്ട് മൂന്നാമനായത്. ഒരേയൊരു തവണ മാത്രം. ഗിൽ ഏഴു ടെസ്റ്റിൽ മൂന്നാമനായി. കോലി, രോഹിത് ശർമ എന്നിവർ പെട്ടെന്ന് വിരമിക്കുകയും ടീമിന്റെ ക്യാപ്റ്റനാകുകയും ചെയ്തതോടെ ഗിൽ നാലാം നമ്പറിലേക്കു മാറി. ഇതോടെ സർവത്ര ആശയക്കുഴപ്പമായി സായ് സുദർശൻ ആറു ടെസ്റ്റിൽ മൂന്നാമനായെങ്കിലും 29.50 ശരാശരിയിൽ ആകെ 354 റൺസ് നേടാനേ കഴിഞ്ഞിട്ടുള്ളൂ. മാത്രമല്ല, ആ പൊസിഷനുവേണ്ട ടെക്‌നിക്കൽ ക്ലാസ് സായിക്കുണ്ടോയെന്നും ഇതുവരെയുള്ള കളികണ്ടാൽ സംശയം തോന്നും. കരുൺ നായർ, കെ.എൽ. രാഹുൽ, ദേവദത്ത് പടിക്കൽ, സുന്ദർ എന്നിവർ ഓരോ ടെസ്റ്റിലാണ് മൂന്നാം നമ്പറിൽ പരീക്ഷിക്കപ്പെട്ടത്. പരിക്കേറ്റതിനാൽ ശ്രീലങ്കയ്‌ക്കെതിരായ പരമ്പരയിൽ സായ് ഉണ്ടാകില്ല. സന്നാഹ മത്സരത്തിൽ സെഞ്ചുറിയടിച്ച ദേവദത്ത് പടിക്കൽ മൂന്നാമനാകാനാണ് എല്ലാ സാധ്യതയും. ആഭ്യന്തരമത്സരങ്ങളിലെ തുടർമികവ് പടിക്കലിനെ അതിനർഹനാക്കുന്നുമുണ്ട്. അപ്പോഴും ചോദ്യം ബാക്കിയാകുന്നു. ഇന്ത്യ ദ്രാവിഡിനും പൂജാരയ്ക്കും പിൻഗാമിയെ കണ്ടെത്തിക്കഴിഞ്ഞോ?

വല്ലപ്പോഴുമാകുന്ന ടെസ്റ്റുകൾ

ഇന്ത്യ തുടർച്ചയായി ടെസ്റ്റ് കളിക്കാത്തതും ഒരു കളിക്കാരനും മൂന്നാം നമ്പറിൽ തുടർച്ചയായ അവസരം ലഭിക്കാത്തതും കളിക്കാരുടെ ആത്മവിശ്വാസത്തെയും താളത്തെയും ബാധിക്കാം. ശ്രീലങ്കയ്‌ക്കെതിരായ രണ്ടു ടെസ്റ്റുകൾ കഴിഞ്ഞാൽ ഇന്ത്യയുടെ അടുത്ത ടെസ്റ്റ് നവംബർ 19-ന് ന്യൂസീലൻഡിനെതിരേ വെല്ലിങ്ടണിലാണ്. അതും രണ്ടു ടെസ്റ്റ് പരമ്പരയാണ്.

ഓസ്‌ട്രേലിയക്കെതിരേ അടുത്ത ജനുവരി 21-ന് നാഗ്പുരിൽ ആരംഭിക്കുന്നതാണ് ഇനി വരാനുള്ള അഞ്ചു ടെസ്റ്റുകളുടെ വലിയൊരു സീരീസ്. ഇതിനിടെ ഏകദിനം, ടി-ട്വന്റി എന്നിവയിലായിരിക്കും കളിക്കാർ. ഏതു ഫോർമാറ്റും അനായാസം മാറിമാറിക്കളിക്കാൻ കോലിയെപ്പോലുള്ള കളിക്കാർക്ക് സാധിച്ചിട്ടുണ്ട്.

Content Highlights: Seven different players have been tested at No. 3 in Test matches since Gautam Gambhir became head coach., The No. 3 position remains unstable following the departures of stalwarts like Cheteshwar Pujara and Virat Kohli., Devdutt Padikkal emerges as the top contender for the No. 3 spot in the upcoming series against Sri Lanka., Infrequent Test match scheduling and constant chopping and changing affect player confidence and rhythm.