ഇന്ത്യ-പാക് പോരാട്ടം: ടോസിൽ റഫറിയെ തിരുത്തി പാക് നായകൻ; ഹസ്തദാനമില്ലാതെ ക്യാപ്റ്റന്മാർ

ദോഹ: ഏഷ്യാ കപ്പ് റൈസിംഗ് സ്റ്റാർസ് ടൂർണമെന്റിൽ ഞായറാഴ്ച നടന്ന ഇന്ത്യ 'എ'-പാകിസ്താൻ 'എ' മത്സരത്തിന്റെ ടോസിനിടെ നാടകീയ രംഗങ്ങൾ. മാച്ച് റഫറിയ്ക്ക് പറ്റിയ അമളിയാണ് പ്രശ്നമായത്.
ടോസിനായി ഇന്ത്യ 'എ' നായകൻ തിലക് വർമ്മയും പാക് നായകൻ അബ്ദുൾ സമദും ഗ്രൗണ്ടിലെത്തി. നാണയം ടോസ് ചെയ്തപ്പോൾ അബ്ദുൾ സമദ് 'ഹെഡ്സ്' വിളിച്ചു. നാണയം നിലത്തുവീണപ്പോൾ 'ടെയിൽസ്' ആണെന്നും തിലക് വർമ്മ ടോസ് ജയിച്ചെന്നുമാണ് മാച്ച് റഫറി ആദ്യം പ്രഖ്യാപിച്ചത്. എന്നാൽ, ഇരു ക്യാപ്റ്റന്മാരും കുനിഞ്ഞുനിന്ന് നാണയം പരിശോധിച്ചതോടെ അത് 'ഹെഡ്സ്' തന്നെയാണെന്ന് വ്യക്തമായി. ഉടൻ തന്നെ മൈക്കിലൂടെ 'ഇത് ഹെഡ് ആണ്, ഹെഡ് ആണ്' എന്ന് അബ്ദുൾ സമദ് വിളിച്ചുപറയുകയായിരുന്നു. ഇതോടെ ടോസ് പാകിസ്താന് അനുകൂലമായി തിരുത്തുകയും അവർ ബാറ്റിങ് തിരഞ്ഞെടുക്കുകയും ചെയ്തു. ടോസിന് പിന്നാലെ ഇരു ക്യാപ്റ്റന്മാരും പരസ്പരം ഹസ്തദാനം ചെയ്യാതെയാണ് അഭിമുഖങ്ങൾക്കായി നീങ്ങിയത് എന്നതും ശ്രദ്ധേയമായി.
കഴിഞ്ഞ മത്സരത്തിൽ കളിച്ച അതേ ടീമിനെത്തന്നെയാണ് ഇരു രാജ്യങ്ങളും ഈ നിർണായക പോരാട്ടത്തിലും നിലനിർത്തിയത്.
ടീമുകൾ: ഇന്ത്യ 'എ': തിലക് വർമ്മ (ക്യാപ്റ്റൻ), വൈഭവ് സൂര്യവംശി, അഭിഷേക് ശർമ്മ, ആയുഷ് ബദോനി, കുമാർ കുശാഗ്ര (വിക്കറ്റ് കീപ്പർ), റിങ്കു സിംഗ്, സൂര്യാൻഷ് ഷെഡ്ഗെ, ഷഹബാസ് അഹമ്മദ്, വിപ്രജ് നിഗം, ഹർഷിത് റാണ, പ്രിൻസ് യാദവ്.
പാകിസ്താൻ 'എ': അബ്ദുൾ സമദ് (ക്യാപ്റ്റൻ), ഷാമിൽ ഹുസൈൻ, മാസ് സദാഖത്ത്, റൊഹൈൽ നസീർ (വിക്കറ്റ് കീപ്പർ), ഹസൻ നവാസ്, ഫർഹാൻ യൂസഫ്, സാദ് മസൂദ്, മുഹമ്മദ് ഇമ്രാൻ രൺധാവ, അഹമ്മദ് ദാനിയാൽ, സുഫിയാൻ മുഖീം, അലി റാസ.
Content Highlights: Dramatic toss confusion during India A vs Pakistan A match in Asia Cup Rising Stars., Match referee initially declared India A captain Tilak Varma as the toss winner., Pakistani captain Abdul Samad corrected the referee, showing it was heads., Captains avoided a handshake after the toss, adding tension to the encounter.