കൈവിട്ട ക്യാച്ച്, 173 റൺസ് കൂട്ടുകെട്ട്; ബുംറയുടെ സ്പെല്ലിന് പിന്നാലെ തിരിച്ചുവന്ന് കിവീസ്

വെല്ലിങ്ടൺ: ബുംറയുടെ മാജിക് സ്പെല്ലുകൾ കൊണ്ട് തുടക്കം തന്നെ കിവീസിനെ പ്രതിരോധത്തിലാക്കാൻ സാധിച്ചതിന്റെ ആത്മവിശ്വാസത്തിലായിരുന്നു ഇന്ത്യൻ ടീം. ആദ്യ സെഷനിൽ തന്നെ നാല് വിക്കറ്റുകൾ വീഴ്ത്താൻ ഇന്ത്യക്കായി. ആദ്യദിനം ഇന്ത്യ സ്വന്തമാക്കുമെന്ന് കരുതിയെങ്കിലും കിവീസ് ശക്തമായി തിരിച്ചുവരുന്നതാണ് വെല്ലിങ്ടണിൽ കണ്ടത്. ആറാം വിക്കറ്റിൽ ഒന്നിച്ച ഹെന്റി നിക്കോൾസും ഗ്ലെൻ ഫിലിപ്സും 173 റൺസാണ് ഒന്നാം ദിനം ചേർത്തത്. അതോടെ ഇന്ത്യ പരുങ്ങലിലായി.
അഞ്ചുവിക്കറ്റ് നഷ്ടത്തിൽ 70 റൺസെന്ന നിലയിൽ വൻ തകർച്ചയുടെ വക്കിലായിരുന്നു ന്യൂസീലൻഡ്. ഓപ്പണർമാരായ ടോ ലാഥം (0), ഡെവോൺ കോൺവേ (4) എന്നിവർ മടങ്ങിയതോടെ കിവീസ് 12-2 എന്ന നിലയിലേക്ക് വീണു. മൂന്നാമനായി ഇറങ്ങിയ നിക്കോൾസാണ് പിന്നീട് ടീമിനെ കരകയറ്റിയത്. രചിൻ രവീന്ദ്ര (15), ഡാരിൽ മിച്ചൽ (1), ടോം ബ്ലണ്ടൽ (5) എന്നിവരും പുറത്തായതോടെ ടീം 70-5 എന്ന നിലയിലായി. ബുംറ മൂന്ന് വിക്കറ്റും അൻഷുൾ കാംബോജ്, ആകാശ് ദീപ് എന്നിവർ ഓരോ വിക്കറ്റ് വീതവും വീഴ്ത്തി.
അവിടെനിന്നാണ് ഇന്ത്യയുടെ എല്ലാ കണക്കുകൂട്ടലുകളും തെറ്റിച്ചുകൊണ്ട് ഗ്ലെൻ ഫിലിപ്സ്-നിക്കോൾസ് സഖ്യം ബാറ്റേന്തുന്നത്. 30 ഓവറിൽ അഞ്ചുവിക്കറ്റ് നഷ്ടത്തിൽ 75 റൺസാണ് കിവീസ് സ്കോർ ബോർഡിലുണ്ടായിരുന്നത്. പിന്നീട് ഗ്ലെൻ ഫിലിപ്സ് മികച്ച രീതിയിൽ ബാറ്റുവീശി. 36-ാം ഓവറിൽ ഫിഫ്റ്റി തികച്ചുകൊണ്ട് നിക്കോൾസും ക്രീസിൽ നിലയുറപ്പിച്ച് ബാറ്റേന്തി. ഈ മൈതാനത്ത് നിക്കോൾസ് ഒൻപതാം തവണയാണ് അമ്പതിലധികം റൺസെടുക്കുന്നത്. അതും 15 ഇന്നിങ്സുകളിൽ നിന്ന്.
രണ്ടാം സെഷനിൽ കിവീസിന് ഒരു വിക്കറ്റ് മാത്രമാണ് നഷ്ടമായത്. 80 റൺസുമെടുത്തു. ചായയ്ക്ക് പിരിയുമ്പോൾ 140 റൺസിലെത്തി. 50-ാം ഓവറിൽ പ്രസിദ്ധ് കൃഷ്ണയെ ബൗണ്ടറി പായിച്ച ഫിലിപ്സ് ടെസ്റ്റ് ക്രിക്കറ്റിൽ 1000 റൺസും തികച്ചു. പ്രസിദ്ധ് കൃഷ്ണയും കാംബോജും വാഷിങ്ടൺ സുന്ദറും മാറിമാറിയെറിഞ്ഞെങ്കിലും ഇരുവരും പിടികൊടുക്കാൻ തയ്യാറായില്ല. ആത്മവിശ്വാസത്തോടെ ഇന്നിങ്സ് മുന്നോട്ടുനീക്കിയ ഫിലിപ്സും നിക്കോൾസും പതിയെ ടീമിനെ കരകയറ്റി. ഫിലിപ്സിന്റെ അർധസെഞ്ചുറിയുമെത്തിയതോടെ ടീം 150 കടന്നു.
ഇന്നിങ്സ് ട്രാക്കിലാക്കിയ കിവീസ് ബാറ്റർമാരെയാണ് മൂന്നാം സെഷനിൽ കാണുന്നത്. ഇന്ത്യൻ പേസർമാരെ നന്നായി ഇരുവരും നേരിട്ടു. പ്രസിദ്ധ് കൃഷ്ണ എറിഞ്ഞ 54-ാം ഓവറിൽ തുടർച്ചയായി രണ്ട് ബൗണ്ടറികൾ കണ്ടെത്തിയ നിക്കോൾസ് സ്കോറുയർത്തി. ആറാം വിക്കറ്റിൽ സെഞ്ചുറി കൂട്ടുകെട്ടും കടന്നതോടെ ഇന്ത്യ പ്രതിരോധത്തിലായി. പിന്നാലെ നിക്കോൾസിന്റെ സെഞ്ചുറിയുമെത്തി. വെല്ലിങ്ടണിലെ ഈ മൈതാനത്ത് നിക്കോൾസ് നേടുന്ന അഞ്ചാമത്തെ സെഞ്ചുറിയാണിത്.
74-ാം ഓവറിൽ നിക്കോൾസിനെ പുറത്താക്കാനുള്ള അവസരം ലഭിച്ചെങ്കിലും ഇന്ത്യ പാഴാക്കി. ബാക്ക്വേർഡ് സ്ക്വയർ ലെഗിൽ അടിച്ച പന്ത് അനായാസം കൈപ്പിടിയിലാക്കുമെന്ന് തോന്നിച്ചെങ്കിലും ദേവദത്ത് പടിക്കൽ കൈവിട്ടു. ഋഷഭ് പന്തും ക്യാച്ചിനായി ഓടിയെത്തിയെങ്കിലും സാധിച്ചില്ല. 243-5 എന്ന നിലയിൽ ആദ്യദിനം അവസാനിച്ചു. 113 റൺസുമായി നിക്കോൽസും 94 റൺസുമായി ഫിലിപ്സും ക്രീസിലുണ്ട്. ആറാം വിക്കറ്റ് കൂട്ടുകെട്ട് പൊളിക്കാനുള്ള വഴിയായിരിക്കും രണ്ടാം ദിനം ഇന്ത്യ തേടുക.
Content Highlights: New Zealand vs India, 1st Test