ആദ്യ ടെസ്റ്റിൽ നാല് പേസർമാർ കളിക്കും; ബൗളിങ് തന്ത്രം വെളിപ്പെടുത്തി ഗിൽ

വെല്ലിങ്ടൺ: ന്യൂസീലൻഡിനെതിരായ ആദ്യ ടെസ്റ്റിൽ ഇന്ത്യ നാല് പേസ് ബൗളർമാരുമായിട്ടാകും കളിക്കാനിറങ്ങുകയെന്ന് ഇന്ത്യൻ ക്യാപ്റ്റൻ ശുഭ്മാൻ ഗിൽ. സ്ക്വാഡിലുള്ള ആറ് പേസ് ബൗളർമാരിൽ ആരൊക്കെയാകും ടീമിലുണ്ടാകുകയെന്ന് ടീം മാനേജ്മെന്റ് ഇതുവരെ തീരുമാനിച്ചിട്ടില്ലെന്നും വാർത്താസമ്മേളനത്തിൽ ഗിൽ വ്യക്തമാക്കി.
'ഏകദിന പരമ്പരയിൽ പേസ് ബൗളർമാർ മികച്ച പ്രകടനമാണ് പുറത്തെടുത്തത്. അന്തിമ ഇലവനെ കുറിച്ച് ഇപ്പോഴും ആലോചിച്ചുകൊണ്ടിരിക്കുകയാണ്. നാല് പേസ് ബൗളർമാർ ഏതായാലും കളിക്കും. എന്നാൽ ആരാണെന്നത് നിശ്ചയിച്ചിട്ടില്ല. ടെസ്റ്റിൽ സ്വന്തം നാട്ടിൽ കിവീസിന് മികച്ച റെക്കോർഡാണുള്ളത്. അതിനാൽ ഏകദിനത്തേക്കാൾ വെല്ലുവിളിയാകും ടെസ്റ്റ് മത്സരം.'-ഗിൽ വ്യക്തമാക്കി.
മൂന്നാം ദിനം മുതൽ പിച്ച് ബാറ്റിങ്ങിന് അനുകൂലമാകാൻ സാധ്യതയുള്ളതിനാൽ വാലറ്റത്തും ബാറ്റ് ചെയ്യാൻ കഴിയുന്ന ബൗളർമാരെയാണ് ടീം ലക്ഷ്യമിടുന്നതെന്നും ഗിൽ കൂട്ടിച്ചേർത്തു. ജസ്പ്രീത് ബുംറ നയിക്കുന്ന പേസ് നിരയിൽ മുഹമ്മദ് സിറാജ്, ആകാശ്ദീപ്, പ്രസിദ്ധ് കൃഷ്ണ, അൻഷുൽ കാംബോജ്, ഗുരുനൂർ ബ്രാർ എന്നിവരാണ് ഇടം പിടിച്ചിരിക്കുന്നത്.
Content Highlights: India will field four fast bowlers in the first Test against New Zealand., Captain Shubman Gill confirmed the team management is finalizing the final XI from six pacers., The team is focusing on bowlers who can contribute with the bat for the lower order., Gill acknowledged New Zealand's strong home record in Test cricket.