നാലുറൺസിന് കിവീസിനെ കീഴടക്കി ഇന്ത്യ, ജയം ഡക്ക്‌വർത്ത് ലൂയിസ് നിയമപ്രകാരം

വെല്ലിങ്ടൺ: ന്യൂസീലൻഡിനെതിരായ രണ്ടാം ഏകദിനത്തിലും ഇന്ത്യക്ക് ജയം. മഴ കളിമുടക്കിയ മത്സരത്തിൽ ഡക്ക്‌വർത്ത് ലൂയിസ് നിയമപ്രകാരം നാല് റൺസിനാണ് ഇന്ത്യയുടെ ജയം. കീവീസിനെ 134 റൺസിന് എറിഞ്ഞിട്ട ഇന്ത്യ മറുപടി ബാറ്റിങ്ങിൽ 26 ഓവറിൽ 113-7 എന്ന നിലയിൽ നിൽക്കേ മഴയെത്തുകയായിരുന്നു. പിന്നീട് മത്സരം തുടരാനാവാതെ വന്നതോടെ ഡക്ക്‌വർത്ത് ലൂയിസ് നിയമപ്രകാരം ഇന്ത്യയെ വിജയികളായി പ്രഖ്യാപിച്ചു. അഞ്ചുമത്സരങ്ങളടങ്ങിയ പരമ്പരയിൽ 2-0 ന് ഇന്ത്യ മുന്നിലെത്തി.

കിവീസിനെ 134 റൺസിന് ഓൾഔട്ടാക്കിയ ശേഷം മറുപടി ബാറ്റിങ്ങിനിറങ്ങിയ ഇന്ത്യയ്ക്ക് തുടക്കം തകർച്ചയോടെയായിരുന്നു. ടീം 17 റൺസെടുക്കുന്നതിനിടെ രണ്ട് വിക്കറ്റ് നഷ്ടമായി. ക്യാപ്റ്റൻ ശുഭ്മാൻ ഗിൽ ഗോൾഡൻ ഡക്കായി മടങ്ങിയപ്പോൾ വിരാട് കോലി 7 റൺസ് മാത്രമെടുത്ത് പുറത്തായി. മൂന്നാം വിക്കറ്റിൽ രോഹിത് ശർമയും ശ്രേയസ് അയ്യരും ചേർന്നാണ് ഇന്നിങ്‌സ് മുന്നോട്ടുകൊണ്ടുപോയത്. എന്നാൽ വിക്കറ്റ് വീഴ്ത്തി കിവീസ് തിരിച്ചടിച്ചു. രോഹിത് ശർമയും (23) അക്ഷർ പട്ടേലും പുറത്തായതോടെ ടീം 47-4 എന്ന നിലയിലേക്ക് വീണു.

അഞ്ചാം വിക്കറ്റിൽ ഒന്നിച്ച കെ.എൽ രാഹുലും ശ്രേയസ് അയ്യരും ചേർന്ന് പിന്നീട് ഇന്ത്യയെ കരകയറ്റി. അഞ്ചാം വിക്കറ്റിൽ നിർണായകമായ 39 റൺസ് കൂട്ടുകെട്ട് പടുത്തുയർത്തി. അതോടെ സ്‌കോർ 86 ലെത്തി. ബാറ്റർമാരെ അധികനേരം ക്രീസിൽ നിലയുറപ്പിക്കാൻ അനുവദിക്കാതെ കിവീസ് ബൗളർമാർ പ്രതിരോധത്തിലാക്കി. 46 പന്തിൽ 30 റൺസെടുത്ത് അയ്യരും 12 റൺസ് മാത്രമെടുത്ത് നമാൻ ധിറും മടങ്ങി. പിന്നാലെ അൻഷുൽ കാംബോജും (1) പുറത്തായതോടെ ഇന്ത്യ 111-7 എന്ന നിലയിലായി. 113 റൺസിൽ നിൽക്കേ വീണ്ടും മഴയെത്തി. പിന്നീട് കളി തുടരാനായില്ല. അതോടെ പാർ സ്‌കോറിൽ മുന്നിലായിരുന്ന ഇന്ത്യ വിജയിച്ചു.

ആദ്യം ബാറ്റുചെയ്ത ന്യൂസീലൻഡിനെ ഇന്ത്യ 134 റൺസിന് എറിഞ്ഞൊതുക്കിയിരുന്നു. നാല് വിക്കറ്റെടുത്ത ഗുർനൂർ ബ്രാറാണ് കിവീസിനെ ചെറിയ സ്‌കോറിലൊതുക്കുന്നതിൽ വലിയ പങ്ക് വഹിച്ചത്. ആഖ്വിബ് നബി, അൻഷുൽ കാംബോജ്, അക്‌സർ പട്ടേൽ എന്നിവർ രണ്ട് വിക്കറ്റ് വീതം വീഴ്ത്തി. 55 റൺസെടുത്ത ഡാരിൽ മിച്ചലാണ് കിവീസിന്റെ ടോപ് സ്കോറർ.

മഴ മൂലം 47 ഓവറായി ചുരുക്കിയ മത്സരത്തിൽ ന്യൂസീലൻഡിന്റെ തുടക്കം തന്നെ തകർച്ചയോടെയായിരുന്നു. സ്‌കോർ ബോർഡിൽ ഒരു റണ്ണെത്തിയപ്പോഴേക്കും ടിം സെയ്‌ഫേർട്ടിനെ ആഖ്വിബ് നബി പുറത്താക്കി. ഇന്ത്യൻ ജെഴ്‌സിയിൽ ആഖ്വിബിന്റെ ആദ്യ വിക്കറ്റായിരുന്നു അത്. ആറ് റൺസെടുത്ത വിൽ യങ്ങിനെയും ആഖ്വിബ് തിരിച്ചയച്ചു. അൻഷുൽ കാംബോജിന് മുന്നിൽ കളി മറന്ന ഹെൻട്രി നിക്കോൾസിന്റെ സംഭാവന 11 റൺസായിരുന്നു.

പിന്നീട് ക്രീസിലെത്തിയ ഡാരിൽ മിച്ചൽ ഒരറ്റത്ത് പിടിച്ചുനിന്നെങ്കിലും മറുവശത്ത് വിക്കറ്റുകൾ വീണുകൊണ്ടേയിരുന്നു. ടോം ലാഥം ഏഴ് റൺസിനും ഗ്ലെൻ ഫിലിപ്‌സ് അക്കൗണ്ട് തുറക്കും മുമ്പും പുറത്തായി. പിന്നീട് ആറാം വിക്കറ്റിൽ ഡാരിൽ മിച്ചലും സാന്റ്‌നറും ചേർന്ന് 59 റൺസ് കൂട്ടുകെട്ടുണ്ടാക്കി സ്‌കോർ 100 കടത്തി. എന്നാൽ 104 പന്തിൽ 55 റൺസെടുത്ത ഡാരിൽ മിച്ചലിനെ പുറത്താക്കി അക്‌സർ പട്ടേൽ ആ കൂട്ടുകെട്ട് പൊളിച്ചു. പിന്നാലെ 31 റൺസെടുത്ത് മിച്ചൽ സാന്റ്‌നറും പുറത്തായി. നഥാൻ സ്മിത്ത്-3, കെയ്ൽ ജമൈസൺ-7, ബ്ലെയ്ർ ടിക്ക്‌നർ-2 എന്നിങ്ങനെയായിരുന്നു വാലറ്റത്തിന്റെ സ്‌കോറുകൾ. ഒരു റണ്ണോടെ ജേക്കബ് ഡഫി പുറത്താകാതെ നിന്നു.

Content Highlights: New Zealand vs India, 2nd ODI