ആ അറുപത്തിനാലു പേരും മോതിരവും! ഉടലും അടയാളങ്ങളും കൊണ്ട് കലഹിച്ച താത്രി
മാനം മുടിത്തെയ്യം പോലെ ഉറഞ്ഞാടിയ ഇതുപോലൊരു മഴക്കാലത്താണ് ഓക്കി അന്തര്‍ജനത്തിന്റെ അന്തഃപുരത്തില്‍ മിന്നല്‍പ്പിണർ പോലൊരു കുഞ്ഞ് പിറന്നു വീണത്. കല്‍പകശ്ശേരി ഇല്ലത്തിന്റെ അകത്തളത്തിലാകെ കെട്ടിനിന്ന ഇരുട്ടിലും പ്രകാശിച്ച അവളുടെ മുഖം നോക്കി അഷ്ടമൂര്‍ത്തി നമ്പൂതിരിയുടെ ആദ്യ വേളിയായ ഓക്കി അന്തര്‍ജനം പേരുചൊല്ലി, താത്രിക്കുട്ടി! താത്രിക്കുട്ടിയുടെ കഥ നമ്മളിലെത്തിയത് ഐതിഹ്യവും ചരിത്രവുമെല്ലാം കൂടിക്കലർന്ന രൂപത്തിലാണ്. അതിലൊന്നിൽ ഇങ്ങനെ പറയന്നു- കല്‍പകശ്ശേരിയില്‍ കുഞ്ഞു പിറന്ന കഥ ആറങ്ങോട്ടുകരയില്‍ പാണന്മാര്‍ പാടിനടന്നു. വാര്‍ത്ത മഹാപണ്ഡിതനും ജ്യോതിഷിയുമായ കറുത്തേടത്ത് നമ്പൂതിരിയുടെ കാതിലുമെത്തി. കുട്ടി ജനിച്ച സമയം ചോദിച്ചറിഞ്ഞ കറുത്തേടത്തിന്റെ മുഖം കര്‍ക്കടകകടലു പോലെ കറുത്തു. ഗ്രഹങ്ങളുടെ ഏറ്റക്കുറച്ചിലുകള്‍ ഗുണിച്ചു നോക്കി കറുത്തേടത്ത് പിറുപിറുത്തു, 'പെണ്ണ് പേര് കേള്‍പ്പിക്കൂലോ, വംശം മുടിക്കൂലോ..' അല്‍പമൊച്ച കൂടിപ്പോയ ആത്മഗതത്തിന്റെ മാറ്റൊലിയില്‍ അന്ധാളിച്ചുനിന്ന ഇല്ലച്ചുമരുകള്‍ അറിഞ്ഞില്ല അഗ്നിജ്വാല പോലെ കത്തിയ ആ പെണ്ണ് പുരുഷാധിപത്യം കൊടികുത്തി വാണ ജീർണമായ സാമൂഹികവ്യവസ്ഥയുടെ അടിവേരിളക്കുമെന്ന്.
Content Highlights: the iconic revenge story of kuriyedathu thathri and her trial smarthavicharam