ലോകകപ്പ് ഫൈനൽ; അനധികൃത ലിങ്കുകളിലൂടെ കാണരുതെന്ന് യുഎഇ, പിഴ ഒരു ലക്ഷം ദിർഹം വരെ

അബുദാബി: ലോകകപ്പ് ഫൈനൽ മത്സരങ്ങൾ അനധികൃത വെബ്സൈറ്റുകളിലൂടെയോ പ്ലാറ്റ്‌ഫോമുകളിലൂടെയോ കാണരുതെന്ന് യു.എ.ഇ സാമ്പത്തിക-ടൂറിസം മന്ത്രാലയം കർശന മുന്നറിയിപ്പ് നൽകി. ഔദ്യോഗിക ലൈസൻസുള്ള പ്ലാറ്റ്‌ഫോമുകൾ വഴി മാത്രം മത്സരങ്ങൾ കാണാനും, അനുമതിയില്ലാതെ ഉള്ളടക്കങ്ങൾ പങ്കുവെക്കുകയോ പുനഃസംപ്രേക്ഷണം ചെയ്യുകയോ ചെയ്യുന്നത് ഒഴിവാക്കണമെന്നും മന്ത്രാലയം ജനങ്ങളോട് അഭ്യർഥിച്ചു. യു.എ.ഇയിലെ പകർപ്പവകാശ നിയമ പ്രകാരം, അംഗീകാരമില്ലാത്ത ഉറവിടങ്ങളിൽ നിന്ന് കായിക മത്സരങ്ങൾ കാണുന്നതും പങ്കുവെക്കുന്നതും ഗുരുതരമായ കുറ്റമാണ്. നിയമലംഘനത്തിന്റെ തീവ്രതയനുസരിച്ച് 10,000 മുതൽ ഒരു ലക്ഷം ദിർഹം വരെ പിഴ ലഭിക്കാം. കൂടാതെ തടവുശിക്ഷ, അനധികൃത വിതരണത്തിന് ഉപയോഗിച്ച ഉപകരണങ്ങൾ കണ്ടുകെട്ടൽ, വെബ്‌സൈറ്റുകൾ ബ്ലോക്ക് ചെയ്യൽ തുടങ്ങിയ നടപടികളും ഉണ്ടാകുമെന്ന് അധികൃതർ വ്യക്തമാക്കി.

മെന മേഖലയിൽ ലോകകപ്പ് സംപ്രേക്ഷണാവകാശം beIN Sports നാണ്. ടെലിവിഷൻ വഴിയും അവരുടെ ഡിജിറ്റൽ പ്ലാറ്റ്‌ഫോമായ ടിഒഡി വഴിയും വരിക്കാർക്ക് മത്സരങ്ങൾ സുരക്ഷിതമായി കാണാം.

വീടിനു പുറത്ത് മത്സരങ്ങൾ ആസ്വദിക്കാൻ ആഗ്രഹിക്കുന്നവർക്കായി യു.എ.ഇയിലുടനീളം മികച്ച സൗകര്യങ്ങളും ഒരുക്കിയിട്ടുണ്ട്. അബുദാബിയിൽ ഫാൻ സോണുകൾ, ലക്ഷ്വറി ലോഞ്ചുകൾ, തിയേറ്ററുകൾ എന്നിവടങ്ങളിൽ വലിയ സ്‌ക്രീനുകളിൽ മത്സരങ്ങൾ തത്സമയം കാണാം. ദുബായിൽ സ്പോർട്സ് ബാറുകൾ, ഫാൻ സോണുകൾ, വലിയ സ്‌ക്രീനുകളോടു കൂടിയ പ്രീമിയം ഡൈനിംഗ് റെസ്റ്റോറന്റുകൾ തുടങ്ങി എല്ലാത്തരം ഫുട്ബോൾ പ്രേമികൾക്കും അനുയോജ്യമായ ഒട്ടനവധി വേദികൾ നഗരത്തിലുണ്ട്. അനധികൃത ലിങ്കുകൾ വഴി മത്സരങ്ങൾ കാണുന്നത് സൈബർ സുരക്ഷാ ഭീഷണികൾക്ക് കാരണമാകും. അതിനാൽ സുരക്ഷിതമായ ഔദ്യോഗിക പ്ലാറ്റ്‌ഫോമുകൾ മാത്രം തിരഞ്ഞെടുക്കണമെന്ന് മന്ത്രാലയം നിർദ്ദേശിച്ചു.

Content Highlights: Strict warning against illegal World Cup streaming in the UAE., Potential penalties include fines from 10,000 to 100,000 AED and imprisonment., Official broadcast rights in the MENA region are held by beIN Sports and TOD., Official fan zones and licensed venues are available for public viewing in Abu Dhabi and Dubai., Illegal streaming poses significant cybersecurity risks.