ഒമാനിലെ അൽ അമീറാത്തയിൽ ലുലു ഗ്രൂപ്പിന്റെ പുതിയ ഹൈപ്പർമാർക്കറ്റ് പ്രവർത്തനം ആരംഭിച്ചു

മസ്‌കറ്റ്: ഒമാനിലെ അൽ അമീറാത്തയിൽ ലുലു ഗ്രൂപ്പിന്റെ പുതിയ ഹൈപ്പർമാർക്കറ്റ് പ്രവർത്തനം ആരംഭിച്ചു. അൽ നഹ്ദയിൽ സ്ഥിതി ചെയ്യുന്ന ഈ പുതിയ ഹൈപ്പർമാർക്കറ്റ് അൽ അമീറാത്ത് വാലി ശൈഖ് ഹമദ് ബിൻ സുൽത്താൻ അൽ ബുസൈദിയാണ് ഉദ്ഘാടനം ചെയ്തത്. ലുലു ഗ്രൂപ്പ് ചെയർമാൻ എം.എ യൂസഫ് അലി, മറ്റ് മുതിർന്ന മാനേജ്മെന്റ് ഉദ്യോഗസ്ഥർ എന്നിവരും ചടങ്ങിൽ സന്നിഹിതരായിരുന്നു.

ഒമാൻ ദേശീയ ദിനാഘോഷങ്ങളുടെ ഭാഗമായാണ് ഈ പുതിയ ഹൈപ്പർമാർക്കറ്റിന്റെ ഉദ്ഘാടനം എന്ന് ലുലു ഗ്രൂപ്പ് ചെയർമാൻ എം.എ. യൂസഫ് അലി വ്യക്തമാക്കി. ഒമാന്റെ സാമ്പത്തിക വളർച്ചയിലും ചില്ലറ വ്യാപാര മേഖലയിലും ലുലുവിന്റെ പ്രതിബദ്ധതയാണ് ഇത് കാണിക്കുന്നത്. കൂടാതെ, ലുലുവിന്റെ 'ഹാപ്പിനസ്' ലോയൽറ്റി പ്രോഗ്രാം ഒമാനിൽ 10 ലക്ഷം അംഗങ്ങൾ എന്ന അഭിമാനാർഹമായ നേട്ടം കൈവരിച്ചതായും അദ്ദേഹം കൂട്ടിച്ചേർത്തു.

59,000 ചതുരശ്ര അടി വിസ്തൃതിയിലാണ് പുതിയ ഹൈപ്പർമാർക്കറ്റ് ഒരുക്കിയിരിക്കുന്നത്. പച്ചക്കറികൾ, പഴങ്ങൾ, മാംസം, സമുദ്രവിഭവങ്ങൾ, പലവ്യഞ്ജനങ്ങൾ, ബേക്കറി ഉൽപ്പന്നങ്ങൾ, ഇലക്ട്രോണിക്‌സ്, ഗാർഹികോപകരണങ്ങൾ എന്നിവയെല്ലാം ഒരുകുടക്കീഴിൽ ഇവിടെ ലഭ്യമാണ്. ഉപഭോക്താക്കൾക്കായി എളുപ്പത്തിലുള്ള പ്രവേശനം, വിശാലമായ പാർക്കിംഗ് സൗകര്യം, സെൽഫ് ചെക്ക്-ഔട്ട് കൗണ്ടറുകൾ എന്നിവയും സജ്ജീകരിച്ചിട്ടുണ്ട്. പ്രാദേശിക കർഷകരെയും ഉത്പാദകരെയും പിന്തുണയ്ക്കുന്നതിന്റെ ഭാഗമായി ഒമാനി ഉൽപ്പന്നങ്ങൾക്കായി പ്രത്യേക ഇടം ഇവിടെ മാറ്റിവെച്ചിരിക്കുന്നു.

ഉദ്ഘാടനത്തോടനുബന്ധിച്ച് വിവിധ ഉൽപ്പന്നങ്ങൾക്ക് പ്രത്യേക കിഴിവുകളും ആകർഷകമായ ഓഫറുകളും പ്രഖ്യാപിച്ചിട്ടുണ്ട്.പ്രാദേശിക ഉത്പന്നങ്ങളുടെ ലഭ്യത ഉറപ്പാക്കുന്നതിലൂടെയും തൊഴിലവസരങ്ങൾ സൃഷ്ടിക്കുന്നതിലൂടെയും ഒമാന്റെ സാമ്പത്തിക വികസനത്തിന് ലുലു ശക്തമായ സംഭാവനകളാണ് നൽകിവരുന്നത്. നിലവിൽ 3,400-ലധികം ഒമാനി പൗരന്മാരാണ് ലുലു ഗ്രൂപ്പിൽ ജോലി ചെയ്യുന്നത്. ഒമാനിലെ ജനങ്ങൾക്ക് കൂടുതൽ സൗകര്യപ്രദവും ഗുണനിലവാരമുള്ളതുമായ ഷോപ്പിംഗ് അനുഭവം നൽകിക്കൊണ്ട് തങ്ങളുടെ സാന്നിധ്യം കൂടുതൽ വ്യാപിപ്പിക്കാനാണ് ലുലു ലക്ഷ്യമിടുന്നത്.