ഇന്ത്യക്ക് വെല്ലുവിളി; റഷ്യൻ എണ്ണ വാങ്ങിയാൽ 100 ശതമാനം വരെ താരിഫ്; ബിൽ പാസാക്കി യുഎസ് സെനറ്റ്
വാഷിംഗ്ടൺ: യുക്രൈൻ യുദ്ധത്തിനുള്ള സാമ്പത്തിക സ്രോതസ്സുകൾ തടയാൻ ലക്ഷ്യമിട്ട്, റഷ്യയിൽ നിന്ന് എണ്ണയും പ്രകൃതിവാതകവും വാങ്ങുന്ന രാജ്യങ്ങൾക്ക് പിഴ ചുമത്താൻ വ്യവസ്ഥ ചെയ്യുന്ന ഉപരോധ ബിൽ യുഎസ് സെനറ്റ് പാസാക്കി. പതിനൊന്നിനെതിരെ 86 വോട്ടുകൾക്കാണ് ബിൽ സെനറ്റിൽ പാസായത്. കയറ്റുമതിയിൽ നിന്നുള്ള വരുമാനം ഇല്ലാതാക്കി വ്ളാദിമിർ പുതിനെ യുദ്ധത്തിൽ നിന്ന് പിന്തിരിപ്പിക്കുക എന്നതാണ് ഈ നീക്കത്തിന്റെ ലക്ഷ്യം.
റഷ്യയിൽ നിന്ന് ഏറ്റവും കൂടുതൽ എണ്ണയോ പ്രകൃതിവാതകമോ വാങ്ങുന്ന ലോകത്തിലെ അഞ്ച് രാജ്യങ്ങൾക്കുമേൽ താരിഫ് ഏർപ്പെടുത്താൻ ഈ നിയമം പ്രസിഡന്റിന് അധികാരം നൽകുന്നു. ഇതിൽ ചൈനയും ഇന്ത്യയും ഉൾപ്പെടാൻ സാധ്യതയുണ്ട്. റഷ്യയിൽ നിന്ന് കൂടുതൽ എണ്ണ വാങ്ങുന്ന രാജ്യങ്ങളാണ് ഇന്ത്യയും ചൈനയും.
എന്നാൽ, തങ്ങളുടെ പ്രകൃതിവാതക ഇറക്കുമതിയുടെ 15 ശതമാനത്തിൽ താഴെ മാത്രം റഷ്യയെ ആശ്രയിക്കുകയും അത് കുറയ്ക്കാൻ നടപടികൾ സ്വീകരിക്കുകയും ചെയ്യുന്ന രാജ്യങ്ങളെ ഇതിൽ നിന്ന് ഒഴിവാക്കിയിട്ടുണ്ട്. റഷ്യൻ പ്രസിഡന്റ് പുതിൻ, മുതിർന്ന റഷ്യൻ രാഷ്ട്രീയ-സൈനിക നേതാക്കൾ, റഷ്യൻ ധനകാര്യ സ്ഥാപനങ്ങൾ, ഊർജ്ജ പദ്ധതികൾ എന്നിവർക്കെതിരെയും ബില്ലിൽ ഉപരോധം വ്യവസ്ഥ ചെയ്യുന്നുണ്ട്. നിലവിലുള്ള ഉപരോധങ്ങൾ മറികടക്കാൻ റഷ്യ ഉപയോഗിക്കുന്ന ഷാലോ ഫ്ളീറ്റ് എന്ന് വിശേഷിപ്പിക്കപ്പെടുന്ന പഴയ എണ്ണക്കപ്പലുകളെയും ഈ നിയമം ലക്ഷ്യം വെക്കുന്നു.
അന്തരിച്ച സെനറ്റർ ലിൻഡ്സി ഗ്രഹാമിന്റെ ഒരു വർഷം നീണ്ട പരിശ്രമത്തിന്റെ ഫലമായാണ് ഈ ബിൽ അവതരിപ്പിക്കപ്പെട്ടത്. യുക്രൈൻ പ്രസിഡന്റ് വോളോദിമർ സെലൻസ്കി കഴിഞ്ഞ ആഴ്ച യുഎസ് സന്ദർശിച്ച് സെനറ്റർമാരുമായി കൂടിക്കാഴ്ച നടത്തിയിരുന്നു. ബിൽ കൊണ്ടുവരാനായി നടത്തിയ സഹായത്തിന് അദ്ദേഹം സെനറ്റിനോട് നന്ദി അറിയിക്കുകയും ചെയ്തു.
താരിഫ് ഏർപ്പെടുത്താനുള്ള വിപുലമായ അധികാരം പ്രസിഡന്റ് ഡൊണാൾഡ് ട്രംപിന് നൽകുന്നതിൽ ചില സെനറ്റർമാർ ആശങ്ക പ്രകടിപ്പിച്ചിട്ടുണ്ട്. ഇത്തരം നടപടികൾ സാധനങ്ങളുടെ വില വർദ്ധിക്കുന്നതിനും അമേരിക്കക്കാർക്ക് സാമ്പത്തിക ബാധ്യതയുണ്ടാക്കുന്നതിനും കാരണമാകുമെന്ന് ഇവർ ചൂണ്ടിക്കാട്ടുന്നു. സെനറ്റ് പാസാക്കിയ ഈ ബിൽ ഇനി യുഎസ് ജനപ്രതിനിധി സഭയുടെ പരിഗണനയ്ക്ക് അയക്കും. അവിടെ കൂടി അംഗീകരിക്കപ്പെട്ടാൽ മാത്രമേ ഇത് നിയമമായി മാറൂ.
Content Highlights: US Senate passed a bill with 86-11 vote to sanction countries buying Russian oil/gas., Targeting Russia's export revenue to impact the Ukraine war effort., Bill grants authority to impose tariffs on top importers including India and China., Includes provisions against 'shadow fleet' oil tankers and Russian financial institutions., Legislation awaits approval from the US House of Representatives.