‘ബെയ്ദൂ’വിന്റെ പണിയോ? ഇറാന്റെ മിസൈലുകൾ കൃത്യമായി പതിക്കുന്നതിനു പിന്നിൽ

ടെഹ്‌റാൻ: പശ്ചിമേഷ്യയിൽ ഇസ്രയേലിനും അമേരിക്കയ്ക്കും എതിരെ ഇറാൻ നടത്തിയ ആക്രമണങ്ങളിൽ മിസൈലുകളുടെ ലക്ഷ്യപ്രാപ്തിയും കൃത്യതയും വർധിച്ചത് ലോകരാജ്യങ്ങൾക്കിടയിൽ വലിയ ചർച്ചകൾക്കാണ് വഴിവെച്ചിരിക്കുന്നത്. മിസൈലുകളുടെ കൃത്യത വർദ്ധിപ്പിക്കുന്നതിനായി ഇറാൻ ചൈനയുടെ ബെയ്ദൂ (BeiDou) സാറ്റലൈറ്റ് നാവിഗേഷൻ സംവിധാനമാണ് ഉപയോഗിക്കുന്നത് എന്ന തരത്തിലാണ് ചർച്ചകൾ പുരോഗമിക്കുന്നത്.

അമേരിക്കൻ നിയന്ത്രണത്തിലുള്ള ജിപിഎസിന് ബദലായി ചൈന വികസിപ്പിച്ചെടുത്ത ഈ സാങ്കേതികവിദ്യ, ഇറാനിയൻ മിസൈലുകൾക്കും ഡ്രോണുകൾക്കും ലക്ഷ്യസ്ഥാനങ്ങൾ കൂടുതൽ കൃത്യമായി കണ്ടെത്താൻ സഹായിക്കുന്നുണ്ടെന്ന് വിദഗ്ധർ വിലയിരുത്തുന്നു. പശ്ചിമേഷ്യയിലെ യുദ്ധസാഹചര്യങ്ങളിൽ ജിപിഎസ് സിഗ്നലുകൾ തടസ്സപ്പെടുമ്പോൾ, ബെയ്ദൂ നൽകുന്ന സുരക്ഷിതമായ ആശയവിനിമയ മാർഗ്ഗങ്ങൾ ഇറാൻ പ്രയോജനപ്പെടുത്തുന്നുണ്ട് എന്നാണ് വിലയിരുത്തൽ.

ഒരു പ്രത്യേക രാജ്യത്തിന്റെ സാങ്കേതികവിദ്യയെ മാത്രം ആശ്രയിക്കാതെ ആഗോള നാവിഗേഷൻ സംവിധാനങ്ങൾ വൈവിധ്യവൽക്കരിക്കുന്നത് ആധുനിക യുദ്ധമുറകളിൽ വലിയ മാറ്റങ്ങൾ കൊണ്ടുവരുന്നതായി പ്രതിരോധ വിദഗ്ധർ അഭിപ്രായപ്പെടുന്നു. പാശ്ചാത്യ രാജ്യങ്ങളുടെ ഇടപെടലുകളെ മറികടക്കാൻ ഇത്തരം സഹകരണങ്ങൾ ഇറാനെ പ്രാപ്തമാക്കുന്നുവെന്നാണ് റിപ്പോർട്ടുകൾ സൂചിപ്പിക്കുന്നത്.

അമേരിക്കയുടെ ഗ്ലോബൽ പൊസിഷനിംഗ് സിസ്റ്റത്തിന് (GPS) പകരമായി ചൈന വികസിപ്പിച്ചെടുത്ത നാവിഗേഷൻ സംവിധാനമാണ് ബെയ്ദൂ (BeiDou). 1990-കളുടെ അവസാനത്തിൽ നടന്ന മൂന്നാം തായ്‌വാൻ കടലിടുക്ക് പ്രതിസന്ധിയുടെ കാലത്താണ് ചൈന സ്വന്തമായി നാവിഗേഷൻ സംവിധാനം വികസിപ്പിക്കുക എന്ന ആശയത്തിലേക്ക് നീങ്ങിയത്. യുദ്ധസമയങ്ങളിൽ അമേരിക്ക ജിപിഎസ് സേവനങ്ങൾ നിഷേധിച്ചേക്കാമെന്ന ആശങ്കയാണ് അമേരിക്കൻ നിയന്ത്രണത്തിലുള്ള സംവിധാനങ്ങളെ ആശ്രയിക്കാതെ പ്രവർത്തിക്കുന്ന ബെയ്ദൂ വികസിപ്പിക്കാൻ ചൈനയെ പ്രേരിപ്പിച്ചത്.

മൂന്ന് ഘട്ടങ്ങളിലായാണ് ഇതിന്റെ വികസനം പൂർത്തിയാക്കിയത്. ഒന്നാം ഘട്ടത്തിൽ, 2000-ഓടെ ചൈനയ്ക്കുള്ളിൽ പരിമിതമായ സേവനങ്ങൾ നൽകിത്തുടങ്ങി. രണ്ടാം ഘട്ടത്തിൽ, 2012-ഓടെ ഏഷ്യ-പസഫിക് മേഖലയിലുടനീളം സേവനം വ്യാപിപ്പിച്ചു. മൂന്നാം ഘട്ടത്തിൽ, 2020-ൽ ചൈനീസ് പ്രസിഡന്റ് ഷി ജിൻപിങ് BDS3 എന്ന മൂന്നാം തലമുറ സംവിധാനം ആഗോള സേവനമായി  ഉദ്ഘാടനം ചെയ്തു. സ്‌പേസ്, ഗ്രൗണ്ട്, യൂസർ എന്നിങ്ങനെ മൂന്ന് പ്രധാന ഘടകങ്ങൾ ചേർന്നാണ് ബെയ്ദൂ പ്രവർത്തിക്കുന്നത്.

ബഹിരാകാശ ഭാഗം (Space Segment): ഭൂമിയുടെ വിവിധ ഭ്രമണപഥങ്ങളിൽ സ്ഥിതി ചെയ്യുന്ന ഉപഗ്രഹങ്ങളാണ് ഇതിൽ ഉൾപ്പെടുന്നത്.

ഭൗമ ഭാഗം (Ground Segment): ഈ സംവിധാനത്തെ നിയന്ത്രിക്കുകയും നിരീക്ഷിക്കുകയും ചെയ്യുന്ന കൺട്രോൾ, മോണിറ്ററിംഗ് സ്റ്റേഷനുകൾ ഇതിൽ അടങ്ങിയിരിക്കുന്നു.

ഉപയോക്തൃ ഭാഗം (User Segment): സിഗ്നലുകൾ സ്വീകരിക്കുന്ന റിസീവറുകൾ, ചിപ്പുകൾ, ആന്റിനകൾ, വിവിധ നാവിഗേഷൻ സേവനങ്ങൾ എന്നിവയാണ് ഈ വിഭാഗത്തിൽ വരുന്നത്. ഈ മൂന്ന് ഘടകങ്ങളും ചേർന്നാണ് ഉപയോക്താവിന്റെ കൃത്യമായ ഭൂമിശാസ്ത്രപരമായ സ്ഥാനം കണ്ടെത്തുന്നത്.

ഉപഗ്രഹങ്ങളിൽനിന്ന് ഭൂമിയിലുള്ള റിസീവറുകളിലേക്ക് സിഗ്നലുകൾ അയയ്ക്കുകയും ഒന്നിലധികം ഉപഗ്രഹങ്ങളിൽനിന്നുള്ള സിഗ്നലുകൾ എത്താൻ എടുക്കുന്ന സമയം കണക്കാക്കി സ്ഥാനം നിർണ്ണയിക്കുകയുമാണ് ഈ സംവിധാനം ചെയ്യുന്നത്. മിസൈലുകൾ സാധാരണയായി അവയുടെ ഉള്ളിലെ ഇൻടേർഷ്യൽ നാവിഗേഷൻ സിസ്റ്റങ്ങളെയാണ് (INS) ആശ്രയിക്കുന്നത്. എന്നാൽ, ദീർഘദൂര സഞ്ചാരത്തിനിടയിൽ ഇവയിൽ പിഴവുകൾ സംഭവിക്കാം. ബെയ്ദൂവിൽനിന്നുള്ള ഉപഗ്രഹ സിഗ്നലുകൾ പിഴവുകൾ തിരുത്താനും മിസൈലിന്റെ സഞ്ചാരപഥം നിരന്തരം പുതുക്കി ലക്ഷ്യസ്ഥാനത്ത് കൃത്യമായി പതിക്കാനും സഹായിക്കുന്നു.

കൂടാതെ, ശത്രുക്കൾ ജിപിഎസ് സിഗ്‌നലുകൾ തടസ്സപ്പെടുത്താൻ (Jamming) ശ്രമിക്കുമ്പോൾ, ബെയ്ദൂവിന്റെ എൻക്രിപ്റ്റ് ചെയ്ത സിഗ്നലുകളും ആധികാരികത ഉറപ്പുവരുത്തുന്ന സംവിധാനങ്ങളും ഇത്തരം ഇലക്ട്രോണിക് യുദ്ധമുറകളെ ഫലപ്രദമായി പ്രതിരോധിക്കാൻ സഹായിക്കുന്നു.

ചൈനയുടെ ബെയ്ദൂവിന് സമാനമായി റഷ്യയ്ക്കും യൂറോപ്പിനും സ്വന്തം ഉപഗ്രഹ നാവിഗേഷൻ സംവിധാനങ്ങളുണ്ട്. അമേരിക്കയുടെ ജിപിഎസ്, ചൈനയുടെ ബെയ്ദൂ എന്നിവയ്ക്കൊപ്പം ആഗോളതലത്തിൽ ലഭ്യമായ മറ്റ് പ്രധാന നാവിഗേഷൻ സ്രോതസ്സുകളാണ് റഷ്യയുടെ ഗ്ലോനാസ് (GLONASS). സമാനമായി യൂറോപ്പ് വികസിപ്പിച്ചെടുത്ത ഉപഗ്രഹ നാവിഗേഷൻ സംവിധാനമാണ് ഗലീലിയോ (Galileo).

ഇറാനെപ്പോലുള്ള രാജ്യങ്ങൾ അവരുടെ മിസൈൽ ആക്രമണ ലക്ഷ്യത്തിനായി ഒരു സംവിധാനത്തെ മാത്രം ആശ്രയിക്കുന്നതിന് പകരം, ജിപിഎസ്, ഗ്ലോനാസ്, ഗലീലിയോ തുടങ്ങിയ ലഭ്യമായ എല്ലാ സാധ്യതകളും ഉപയോഗിക്കുന്നതായി വിദഗ്ധർ ചൂണ്ടിക്കാട്ടുന്നു. ബദൽ സംവിധാനങ്ങൾ നിലവിൽ വന്നതോടെ നാവിഗേഷൻ ആവശ്യങ്ങൾക്കായി അമേരിക്കൻ സാങ്കേതികവിദ്യയെ മാത്രം ആശ്രയിക്കേണ്ടി വരുന്ന സാഹചര്യം കുറയുകയും യുദ്ധസമയങ്ങളിൽ സിഗ്നലുകൾ തടസ്സപ്പെടുത്തുന്നത് ശത്രുക്കൾക്ക് പ്രയാസകരമാവുകയും ചെയ്യുന്നു.

2015-ൽ ബെയ്ദൂ സംവിധാനം ഉപയോഗിക്കാനുള്ള കരാറിൽ ഇറാൻ ഒപ്പിട്ടിരുന്നെങ്കിലും, 2021-ലെ ചൈന-ഇറാൻ പങ്കാളിത്ത കരാറിന് ശേഷമാണ് ഈ സംയോജനം വേഗത്തിലായത്. ഇറാന്റെ സൈന്യം അവരുടെ മിസൈലുകളിലും ഡ്രോണുകളിലും ബെയ്ദൂ സിഗ്നലുകൾ ഉൾപ്പെടുത്തിയിട്ടുള്ളതായി വിദഗ്ധർ സാക്ഷ്യപ്പെടുത്തുന്നു. കഴിഞ്ഞ വർഷത്തെ യുദ്ധത്തിനിടയിൽ മേഖലയിൽ ജിപിഎസ് തടസ്സങ്ങൾ ഉണ്ടായതും ഇത്തരം ബദൽ സംവിധാനങ്ങളിലേക്ക് മാറാൻ ഇറാനെ പ്രേരിപ്പിച്ചതായാണ് വിവരം.

തങ്ങൾ ഒരു സംവിധാനത്തെ മാത്രം ആശ്രയിക്കുന്നില്ലെന്നും ജിപിഎസ്, റഷ്യയുടെ ഗ്ലോനാസ്, യൂറോപ്പിന്റെ ഗലീലിയോ എന്നിവയുൾപ്പെടെയുള്ള എല്ലാ സാധ്യതകളും ഉപയോഗിക്കുന്നുണ്ടെന്നുമാണ് ഇറാന്റെ ഔദ്യോഗിക വിശദീകരണം. അമേരിക്കയുടെ ജിപിഎസ് ശൃംഖല പതിറ്റാണ്ടുകളായി ഈ രംഗത്ത് പുലർത്തിയിരുന്ന മേധാവിത്വത്തിന് ചൈനയുടെ ബെയ്ദൂവും റഷ്യയുടെ ഗ്ലോനാസും വലിയ വെല്ലുവിളിയാണ് ഉയർത്തുന്നത്. ആധുനിക യുദ്ധമുറകളിൽ സാങ്കേതിക കരുത്തിന്റെ തുലനാവസ്ഥ മാറുന്നതിന്റെ വലിയൊരു സൂചനയായാണ് ഈ നീക്കങ്ങൾ വിലയിരുത്തപ്പെടുന്നത്.

Content Highlights: Iran is suspected of using China's BeiDou to improve missile precision. BeiDou provides a critical alternative to US-controlled GPS. Integration of satellite signals corrects inertial navigation errors in missiles. Advanced encryption in BeiDou helps Iranian weapons resist GPS jamming. This indicates a shift in global military power away from US-dominant navigation.