വിദ്വേഷ പരാമർശം: ടി.ജി. മോഹൻദാസിന് ജാമ്യം, മൂന്ന് ദിവസം അന്വേഷണവുമായി സഹകരിക്കണം

തിരുവനന്തുപുരം: ജന്തർമന്തറിൽ സമരം ചെയ്ത വിദ്യാർഥികളെ അധിക്ഷേപിച്ച കേസിൽ ആർ.എസ്.എസ്. സൈദ്ധാന്തികൻ

ടി.ജി. മോഹൻദാസിന് ജാമ്യം. അഡീഷണൽ ജീഫ് ജുഡീഷ്യൽ മജിസ്ട്രേറ്റ് കോടതിയാണ് ജാമ്യം അനുവദിച്ചത്. തുടർച്ചയായ അടുത്ത മൂന്ന് ദിവസം അന്വേഷണ ഉദ്യോഗസ്ഥർക്ക് മുമ്പിൽ ഹാജരാകണമെന്നും അന്വേഷണവുമായി പൂർണ്ണമായും സഹകരിക്കണമെന്നും കോടതി ജാമ്യ ഉത്തരവിൽ പറയുന്നു.

ഒരുവിധത്തിലും ജാമ്യം അനുവദിക്കരുതെന്നും പ്രതി പുറത്തേക്ക് പോയാൽ ഡിജിറ്റൽ തെളിവുകൾ നശിപ്പിക്കുമെന്നും പ്രോസിക്യൂഷൻ കോടതിയിൽ വാദിച്ചു. എന്നാൽ അന്വേഷണവുമായി ടി.ജി. മോഹൻദാസ് സഹകരിക്കുന്നുണ്ടെന്ന് പ്രതിക്ക് വേണ്ടി ഹാജരായ വക്കീൽ വാദിച്ചു. നോട്ടീസ് പോലും നൽകാതെയാണ് ടി.ജി. മോഹൻദാസിനെ കസ്റ്റഡിയിൽ എടുത്തതെന്നും ഇത് നിയപരമല്ലെന്നും അഭിഭാഷകൻ കോടതിയിൽ അറിയിച്ചു. 

എന്നാൽ ഇത്തരത്തിൽ ഒരു നോട്ടീസ് നൽകിയിരുന്നെങ്കിൽ പ്രതി നേരത്തെ തന്നെ ഒളിവിൽ പോകുമായിരുന്നുവെന്ന് പ്രോസിക്യൂഷൻ വാദിച്ചെങ്കിലും കോടതി ജാമ്യം നൽകുകയായിരുന്നു. ജാമ്യം ലഭിക്കാവുന്ന വകുപ്പുകളായിരുന്നു ടി.ജി. മോഹൻദാസിന് മേൽ ചുമത്തിയിരുന്നതെന്നാണ് ലഭിക്കുന്ന വിവരം.

Content Highlights: RSS leader TG Mohandas granted bail by Additional Chief Judicial Magistrate Court., The case is related to alleged insult of students protesting at Jantar Mantar., Court ordered him to appear before the investigating officer for the next three consecutive days.