കെ.എം. ഷാജിയുടെ വാദം തെറ്റ്, അനുവദിച്ച കാർതന്നെ മന്ത്രിമാർ ഉപയോഗിക്കണം; 2015-ലെ സർക്കാർ ഉത്തരവ് പുറത്ത്

കോഴിക്കോട്: സ്വകാര്യ വ്യക്തിയുടെ റേഞ്ച് റോവർ കാർ ഔദ്യോഗിക ആവശ്യങ്ങൾക്ക് ഉപയോഗിച്ച സംഭവത്തിൽ മന്ത്രി കെ.എം. ഷാജിയുടെ വാദങ്ങൾക്ക് തിരിച്ചടിയായി സർക്കാർ ഉത്തരവ്. സ്വകാര്യ വാഹനങ്ങളിൽ ഔദ്യോഗിക ബോർഡുവെച്ച് യാത്രചെയ്യാൻ മന്ത്രിമാർക്ക് നിയമപരമായി അനുവാദമില്ലെന്ന് വ്യക്തമാക്കുന്ന മോട്ടോർ വാഹന വകുപ്പിന്റെ ഉത്തരവും നിയമസഭാ രേഖകളും പുറത്തുവന്നു.

1989-ലെ കേരള മോട്ടോർ വെഹിക്കിൾ റൂൾസിലെ റൂൾ 92 എ (വാഹനങ്ങളിൽ പേര് വെച്ച ബോർഡുകൾ പ്രദർശിപ്പിക്കുന്നതിനുള്ള നിരോധനം) പ്രകാരം 2015-ലാണ് ഗതാഗത വകുപ്പ് ഇതുസംബന്ധിച്ച വ്യക്തമായ ഉത്തരവ് പുറപ്പെടുവിച്ചിട്ടുള്ളത്. 2019 നവംബർ 15-ന് നിയമസഭയിൽ അന്നത്തെ എം.എൽ.എ പി.ടി.എ. റഹീം ഉന്നയിച്ച ചോദ്യത്തിന് അന്നത്തെ ഗതാഗത മന്ത്രി എ.കെ. ശശീന്ദ്രൻ നൽകിയ മറുപടിയിലാണ് ഈ ഉത്തരവ് തെളിവായി ഉൾപ്പെടുത്തിയിട്ടുള്ളത്. ഈ രേഖകൾ പ്രകാരം, സർക്കാരിൽനിന്ന് പ്രത്യേകമായി അനുവദിക്കപ്പെട്ടതോ അല്ലെങ്കിൽ സർക്കാർ ഉത്തരവിലൂടെ നിയോഗിക്കപ്പെട്ടതോ ആയ വാഹനങ്ങളിൽ മാത്രമേ മന്ത്രിമാർക്ക് ഔദ്യോഗിക ബോർഡുവെച്ച് യാത്രചെയ്യാൻ അനുവാദമുള്ളൂ.

ഗവർണർക്കോ എം.പി., എം.എൽ.എമാർക്കോ നൽകിയിട്ടുള്ള ഇളവുകൾ മന്ത്രിമാർക്കോ ജില്ലാ കളക്ടർമാർക്കോ ബാധകമല്ലെന്നും ഔദ്യോഗിക അറിയിപ്പില്ലാതെ സ്വകാര്യ ആഡംബര വാഹനങ്ങളിൽ ഔദ്യോഗിക ബോർഡ് വെക്കുന്നത് നിയമവിരുദ്ധമാണെന്നും ഉത്തരവ് വ്യക്തമാക്കുന്നു.

സ്വകാര്യ വ്യക്തിയുടെ ഉടമസ്ഥതയിലുള്ള റേഞ്ച് റോവർ കാർ കുടക് യാത്രയ്ക്കും മറ്റ് ഔദ്യോഗിക ആവശ്യങ്ങൾക്കും ഉപയോഗിച്ചതിനെച്ചൊല്ലിയുള്ള വിവാദങ്ങളിൽ കെ.എം. ഷാജി നടത്തിയ പ്രതികരണത്തിന് പിന്നാലെയാണ് രേഖകൾ പുറത്തുവന്നത്.

മന്ത്രി സഞ്ചരിക്കുന്ന വാഹനമാണ് മന്ത്രിയുടെ വാഹനമെന്നും സ്വകാര്യ വാഹനം ഔദ്യോഗിക ആവശ്യത്തിന് ഉപയോഗിക്കുന്നതിൽ നിയമപരമായ തടസ്സങ്ങളില്ലെന്നും കെ.എം. ഷാജി വാദിച്ചിരുന്നു. സർക്കാർ അനുവദിച്ച നമ്പറും ഫ്ലാഗും വെക്കുക എന്നത് മാത്രമാണ് പ്രോട്ടോക്കോൾ എന്നും മറ്റ് മന്ത്രിമാർ സർക്കാരിന്റെ പ്രത്യേക അനുമതി വാങ്ങുന്നത് വെറും കീഴ്വഴക്കം മാത്രമാണെന്നും അദ്ദേഹം പറഞ്ഞിരുന്നു.

Content Highlights: Kerala Motor Vehicle Rules Rule 92A prohibits displaying official name boards on unauthorized vehicles., 2015 Transport Department order clarifies that ministers cannot use official boards on private vehicles without specific government allotment., Recent controversies surrounding KM Shaji's use of a private luxury vehicle for official purposes sparked this document release., Assembly records and previous replies by transport ministers confirm the illegality of using private cars with official state boards.