പ്ലാസ്റ്റിക്കിനെ വെറുക്കേണ്ട; മാതൃഭൂമി ‘ലവ് പ്ലാസ്റ്റിക്’ പദ്ധതിയുടെ സംസ്ഥാനതല ഉദ്ഘാടനം മുഖ്യമന്ത്രി നിർവഹിച്ചു

#ന്യൂസ് ഡെസ്ക്
മുഖ്യമന്ത്രി വി.ഡി. സതീശൻ പ്രസംഗിക്കുന്നു, തുണിസഞ്ചികൾ മുഖ്യമന്ത്രിക്ക് സമ്മാനിക്കുന്നു
മുഖ്യമന്ത്രി വി.ഡി. സതീശൻ പ്രസംഗിക്കുന്നു, തുണിസഞ്ചികൾ മുഖ്യമന്ത്രിക്ക് സമ്മാനിക്കുന്നു

കൊച്ചി: മാതൃഭൂമി സംഘടിപ്പിച്ച ‘ലവ് പ്ലാസ്റ്റിക്’ പദ്ധതിയുടെ സംസ്ഥാനതല ഉദ്ഘാടനം മുഖ്യമന്ത്രി വി.ഡി. സതീശൻ നിർവഹിച്ചു. പറവൂർ തോന്ന്യകാവ് എൻ.എസ്.എസ്. ഓഡിറ്റോറിയത്തിൽ നടന്ന പരിപാടിയിൽ മാതൃഭൂമി ചെയർമാൻ പി.വി. ചന്ദ്രൻ ഉൾപ്പെടെയുള്ളവർ പങ്കെടുത്തു.

ജൈവവസ്തുക്കൾ മണ്ണിൽ ലയിച്ചുചേരുമ്പോൾ പ്ലാസ്റ്റിക് ലയിക്കാതെ പ്രകൃതിക്ക് ഭീഷണിയാകുകയാണെന്നും അവ ഒടുവിൽ കടലിലെത്തി ജൈവവൈവിധ്യത്തിന് വലിയ ആഘാതമുണ്ടാക്കുന്നുവെന്നും ചടങ്ങിൽ മുഖ്യമന്ത്രി പറഞ്ഞു. പ്ലാസ്റ്റിക് മാലിന്യങ്ങൾ ഭക്ഷിച്ച് കടൽജീവികൾ ചത്തൊടുങ്ങുന്നതും വംശനാശം സംഭവിക്കുന്നതും പരിസ്ഥിതി സമതുലിതാവസ്ഥയെ ദോഷകരമായി ബാധിക്കുന്നുണ്ടെന്നും അദ്ദേഹം ചൂണ്ടിക്കാട്ടി.

പ്ലാസ്റ്റിക് ഉപയോഗം ഒഴിവാക്കുക എന്നതിലുപരി, ഉപയോഗിച്ച പ്ലാസ്റ്റിക് കളയാതെ കഴുകിവൃത്തിയാക്കി പുനരുപയോഗ ഉത്പന്നങ്ങളാക്കി മാറ്റുക എന്ന ഇന്നവേറ്റീവ് ആശയമാണ് മാതൃഭൂമിയുടെ ലവ് പ്ലാസ്റ്റിക് മുന്നോട്ടുവയ്ക്കുന്നത്. മനുഷ്യന്റെ ആരോഗ്യം നിലനിൽക്കണമെങ്കിൽ പ്രകൃതിയുടെയും അതിലെ ജീവജാലങ്ങളുടെയും ആരോഗ്യം സംരക്ഷിക്കപ്പെടണമെന്ന വൺ ഹെൽത്ത് എന്ന ആശയം എല്ലാവരും ഉയർത്തിപ്പിടിക്കണമെന്നും മുഖ്യമന്ത്രി പ്രസംഗത്തിൽ ആഹ്വാനംചെയ്തു.