മുഖ്യമന്ത്രി-DGP കൂടിക്കാഴ്ച നടത്തി; ADGP H. വെങ്കിടേഷും ചര്ച്ചയില്, അജിത്കുമാര് നാലുദിവസം അവധി
തിരുവനന്തപുരം: എ.ഡി.ജി.പി. അജിത് കുമാർ -ആർ.എസ്.എസ്. കൂടിക്കാഴ്ച വിവാദത്തിന് പിന്നാലെ ക്ലിഫ് ഹൗസിൽ തിരക്കിട്ട ചർച്ചകൾ. മുഖ്യമന്ത്രി പിണറായി വിജയനും ഡി.ജി.പിയും തമ്മിൽ നിർണായക കൂടിക്കാഴ്ച നടത്തി.എ.ഡി.ജി.പിക്കെതിരായ അന്വേഷണ വിവരങ്ങൾ ഡി.ജി.പി. ഷേക്ക് ദര്വേശ് സാഹിബ് മുഖ്യന്ത്രിയെ ധരിപ്പിച്ചതായാണ് വിവരം. കൂടിക്കാഴ്ചയിൽ മുഖ്യമന്ത്രിയുടെ പൊളിറ്റിക്കൽ സെക്രട്ടറി പി. ശശിയും ജോൺ ബ്രിട്ടാസ് എം.പിയും പങ്കെടുത്തു. ക്രൈംബ്രാഞ്ച് ചുമതലയുള്ള എ.ഡി.ജി.പി. എച്ച് വെങ്കടേഷിനേയും ക്ലിഫ് ഹൗസിലേക്ക് വിളിച്ചു വരുത്തിയിരുന്നു.
ഒന്നേമുക്കാല് മണിക്കൂറോളം ചര്ച്ച നീണ്ടു. അജിത്കുമാര് ഈമാസം 14 മുതല് നാലുദിവസത്തേക്ക് അവധിയില്പ്പോകാനും തീരുമാനിച്ചു. നേരത്തേ നല്കിയ അവധി അപേക്ഷയാണിതെന്നാണ് വിവരം. അതേസമയം അവധി നീട്ടാനും സാധ്യതയുണ്ട്.
ക്രമസമാധാന ചുമതലയുള്ള എ.ഡി.ജി.പി. എം.ആർ. അജിത് കുമാർ രണ്ട് ആർ.എസ്.എസ്. നേതാക്കളെ പോയി കണ്ടു എന്ന റിപ്പോർട്ട് പുറത്തുവന്നിരുന്നു. ഇതിനെതിരേ പ്രതിപക്ഷം ശക്തമായ വിമർശനം ഉയർത്തിയിരുന്നു. ഇതുകൂടാതെ ഭരണപക്ഷ എം.എൽ.എ. കൂടിയായ പി.വി. അൻവർ, അജിത് കുമാറിനെതിരേ ഗുരുതര ആരോപണങ്ങളും ഉന്നയിച്ചിരുന്നു. ഇതുമായി ബന്ധപ്പെട്ട് മുഖ്യമന്ത്രിക്കും പാർട്ടി സെക്രട്ടറിക്കും അടക്കം പരാതി നൽകുകയും ചെയ്തിരുന്നു. ഇവയുടെ പശ്ചാത്തലത്തിലാണ് ഇപ്പോൾ നിർണായ കൂടിക്കാഴ്ച എന്നത് ശ്രദ്ധേയമാണ്.
ആർ.എസ്.എസ്. നേതാക്കളായ രാം മാധവിനേയും ദത്താത്രേയ ഹൊസബലെയും നേരിട്ട് കണ്ട ഒരു എ.ഡി.ജി.പിയെ ഇനിയും ആ സ്ഥാനത്ത് തുടരാൻ അനുവദിക്കേണ്ടതുണ്ടോ എന്ന കാര്യവും പാർട്ടിയിൽ ഉയരുന്നുണ്ട്. രാഷ്ട്രീയപരമായി വലിയതോതിൽ പ്രതിരോധത്തിലാണ് ഇപ്പോൾ സി.പി.എം. ഇതിനിടെയാണ് മുഖ്യമന്ത്രിയും ഡി.ജി.പിയും നിർണായക കൂടിക്കാഴ്ച നടത്തുന്നത്.
എൽ.ഡി.എഫ്. മുന്നണിയിൽ സഖ്യകക്ഷികളുടെ ഭാഗത്ത് നിന്നും വിയോജിപ്പിന്റെ സ്വരം ഉയർന്നിട്ടുണ്ട്. ബിനോയ് വിശ്വം, തൃശ്ശൂരിലെ ലോക്സഭാ സ്ഥാനാര്ഥിയായിരുന്ന വി.എസ്. സുനിൽ കുമാർ എന്നിവര് അടക്കം വിമർശനവുമായി രംഗത്തെത്തിയിരുന്നു. എന്തുകൊണ്ടാണ് എം.ആർ. അജിത് കുമാർ ആർ.എസ്.എസ്. നേതാക്കളുമായി കൂടിക്കാഴ്ച നടത്തിയത് എന്ന ചോദ്യം ഉയര്ന്നിട്ടുണ്ട്.
തൃശ്ശൂർ പൂരം കലക്കിയതിന് പിന്നിൽ എം.ആർ. അജിത് കുമാറിന്റെ കരങ്ങളുണ്ട് എന്ന് പി.വി.അൻവർ എം.എൽ.എ. ആരോപണം ഉന്നയിച്ചിരുന്നു. ഇതിന് പുറമെ മാമി തിരോധാനക്കേസ് അടക്കമുള്ളവ മുഖ്യമന്ത്രിയുടെ മുമ്പിൽ റിപ്പോർട്ട് ഡി.ജി.പി. അവതരിപ്പിക്കുന്നുണ്ടെന്നാണ് വിവരം. കൂടിക്കാഴ്ചയ്ക്ക് പിന്നാലെ നിർണായ തീരുമാനങ്ങൾ ഉണ്ടാകുമെന്നാണ് ലഭിക്കുന്ന വിവരം.
Content Highlights: dgp pinarayi vijayan meet at cliff house