റാണ, സി9 ഉസൈർ, ആബിദ് ജുട്ട്: ഹമീം മൊണ്ടാലിന് വിദേശത്ത് ഹാൻഡ്ലർമാർ; ഞെട്ടിക്കുന്ന വെളിപ്പെടുത്തലുകൾ
കൊൽക്കത്ത: ബംഗാളിൽ പിടിയിലായ ജെയ്ഷെ മുഹമ്മദ് ഭീകരനെന്ന് സംശയിക്കുന്ന ഹമീം മൊണ്ടാലിന് പാകിസ്താൻ, അമേരിക്ക, യുകെ തുടങ്ങിയ രാജ്യങ്ങളിൽ നിന്നുള്ള ഹാൻഡ്ലർമാരുമായി നേരിട്ട് ബന്ധമുണ്ടായിരുന്നതായി പശ്ചിമ ബംഗാൾ സ്പെഷ്യൽ ടാസ്ക് ഫോഴ്സ്. പശ്ചിമ ബംഗാളിലെ പൂർബ ബർധമാൻ ജില്ലയിൽ നിന്ന് അറസ്റ്റിലായ മൊണ്ടാൽ, ഡൽഹിയിലെ ജന്തർ മന്തറിൽ കോക്രോച്ച് ജനതാ പാർട്ടി നടത്തിയ പ്രതിഷേധത്തിനിടെ അശാന്തി സൃഷ്ടിക്കാൻ പദ്ധതിയിട്ടിരുന്നതായി പോലീസ് എഫ്ഐആറിൽ വ്യക്തമാക്കുന്നു. 'റാണ', 'സി9 ഉസൈർ', 'ആബിദ് ജുട്ട്' തുടങ്ങിയ പേരുകളിലുള്ള വിദേശ ഹാൻഡ്ലർമാരുമായി ഇയാൾ സാമൂഹിക മാധ്യമങ്ങൾ വഴിയും വാട്സ്ആപ്പ് വഴിയും നിരന്തരം ആശയവിനിമയം നടത്തിയിരുന്നു.
അന്വേഷണ ഉദ്യോഗസ്ഥർ മൊണ്ടാലിന്റെ ഫോണുകളിൽ നിന്ന് ആറ് വ്യത്യസ്ത സാമൂഹിക മാധ്യമ അക്കൗണ്ടുകളും വാട്സ്ആപ്പ് നമ്പറുകളും തിരിച്ചറിഞ്ഞിട്ടുണ്ട്. ഇതിൽ പാകിസ്താൻ കോഡായ +92-ൽ തുടങ്ങുന്ന നമ്പറുകൾ 'റാണ', 'സി9 ഉസൈർ' എന്നിവരുടേതും, അമേരിക്കൻ കോഡായ +1 ഉപയോഗിച്ചിരുന്നത് 'ആബിദ് ജുട്ട്' എന്നയാളുമാണെന്ന് പോലീസ് കണ്ടെത്തി. കൂടാതെ, പാകിസ്താനിൽ നിന്ന് പ്രവർത്തിക്കുന്ന 'എലമെന്റ് എക്സ്' എന്ന പ്രത്യേക പ്ലാറ്റ്ഫോമിലെ അക്കൗണ്ട് വഴിയും ഇയാൾ വിവരങ്ങൾ കൈമാറിയിരുന്നു. യുകെ, മെക്സിക്കോ എന്നിവിടങ്ങളിലെ നമ്പറുകൾ 'ഹാമിദ്' എന്ന പേരിലാണ് ഇയാൾ ഉപയോഗിച്ചിരുന്നതെന്നും അന്വേഷണ റിപ്പോർട്ട് ചൂണ്ടിക്കാട്ടുന്നു.
ഇന്ത്യയിൽ വിപുലമായ ഒരു ചാര ശൃംഖല കെട്ടിപ്പടുക്കാനായിരുന്നു മൊണ്ടാലും കൂട്ടാളികളും ലക്ഷ്യമിട്ടിരുന്നതെന്നാണ് കണ്ടെത്തൽ. ഇതിനായി പ്രാദേശിക യുവാക്കളെ ഭീകരവാദത്തിലേക്ക് റിക്രൂട്ട് ചെയ്യുക, ആയുധങ്ങൾ സംഘടിപ്പിക്കുക, രാജ്യത്തെ പ്രധാനപ്പെട്ട സർക്കാർ സ്ഥാപനങ്ങളെയും പ്രമുഖ വ്യക്തികളെയും കുറിച്ചുള്ള രഹസ്യ വിവരങ്ങൾ ശേഖരിക്കുക എന്നിവയായിരുന്നു ഈ ശൃംഖലയുടെ പ്രധാന ദൗത്യങ്ങൾ. രാജ്യത്തിന്റെ സുരക്ഷയ്ക്കും പരമാധികാരത്തിനും വലിയ വെല്ലുവിളിയാകുന്ന തരത്തിലുള്ള ഗുരുതരമായ ക്രിമിനൽ പ്രവർത്തനങ്ങൾ ഇവർ ആസൂത്രണം ചെയ്തിരുന്നതായി എസ്.ടി.എഫ് കണ്ടെത്തിയിട്ടുണ്ട്. പാകിസ്താൻ ആസ്ഥാനമായുള്ള ഷഹസാദ് ഭട്ടി ഗ്യാങ്ങിന്റെ നിർദ്ദേശപ്രകാരമാണ് ഇവർ പ്രവർത്തിച്ചിരുന്നതെന്നും ഉദ്യോഗസ്ഥർ വ്യക്തമാക്കി.
കേസുമായി ബന്ധപ്പെട്ട് മൊണ്ടാലിന്റെ കാമുകി അർപിത സർക്കാരിനെ ഝാർഖണ്ഡിൽ നിന്ന് പോലീസ് അറസ്റ്റ് ചെയ്തതോടെയാണ് ഞെട്ടിക്കുന്ന വിവരങ്ങൾ പുറത്തുവന്നത്. പശ്ചിമ ബംഗാൾ മുഖ്യമന്ത്രി സുവേന്ദു അധികാരിയെ ഹണി ട്രാപ്പിൽ പെടുത്തി അദ്ദേഹത്തിന്റെ ഓഫീസിൽ പ്രവേശിച്ച് വധിക്കാൻ ഇവർ ഗൂഢാലോചന നടത്തിയതായി എഫ്ഐആർ ആരോപിക്കുന്നു. കൂടാതെ, മന്ത്രി ഉമേഷ് റായിയുടെ മകനെ തട്ടിക്കൊണ്ടുപോയി പണം തട്ടാനും ഇവർ പദ്ധതിയിട്ടിരുന്നു. ഇൻസ്റ്റാഗ്രാം വഴി പരിചയപ്പെട്ട മൊണ്ടാലും അർപിതയും കഴിഞ്ഞ നാല് വർഷമായി പ്രണയത്തിലായിരുന്നുവെന്നും, സാമൂഹിക മാധ്യമങ്ങൾ വഴിയാണ് മൊണ്ടാൽ ഭീകരവാദ ആശയങ്ങളിലേക്ക് ആകൃഷ്ടനായതെന്നും അന്വേഷണ ഏജൻസികൾ കൂട്ടിച്ചേർത്തു.
Content Highlights: West Bengal STF arrests terror suspect Hamim Mondal over links to Pakistan-based handlers and a plot to assassinate CM Suvendu Adhikari.