കോൺഗ്രസിനുള്ള വൻകിട സംഭാവനകളിൽ 75% കുറവ്; ബി.ജെ.പി. ബഹുദൂരം മുന്നിൽ

ന്യൂഡൽഹി:രാജ്യത്തെ മുഖ്യ പ്രതിപക്ഷപാർട്ടിയായ കോൺഗ്രസിന് ലഭിക്കുന്ന വൻകിട സംഭാവനകളിൽ കനത്ത ഇടിവ്. സംഭാവന 75 ശതമാനത്തോളം കുറഞ്ഞ് 130.69 കോടി രൂപയായി ചുരുങ്ങി. 20,000 രൂപയ്ക്കു മുകളിലുള്ള സംഭാവനകളിൽ ഒരു പതിറ്റാണ്ടിനിടയിലെ ഏറ്റവും വലിയ ഇടിവാണ് 2025-26 സാമ്പത്തികവർഷത്തിലുള്ളത്. തിരഞ്ഞെടുപ്പ് കമ്മഷന് സമർപ്പിച്ച ഏറ്റവും പുതിയ സംഭാവനാ റിപ്പോർട്ടിലാണ് ഈ കണക്കുകൾ.

2024-25 സാമ്പത്തികവർഷത്തിൽ ലോക്സഭാ തിരഞ്ഞെടുപ്പ് നടന്ന പശ്ചാത്തലത്തിൽ 517.39 കോടി രൂപയായിരുന്നു കോൺഗ്രസിന് ലഭിച്ചത്. അതിൽനിന്ന് ഒറ്റയടിക്ക് 386.7 കോടിയോളം രൂപയുടെ കുറവാണ് ഇത്തവണയുള്ളത്. കഴിഞ്ഞ 12 വർഷത്തെ കണക്കുകൾ പരിശോധിക്കുമ്പോൾ 2015-16 കാലത്തിനുശേഷമുള്ള ഏറ്റവും കുത്തനെയുള്ള ഇടിവാണിത്. അന്ന് 86 ശതമാനത്തോളമായിരുന്നു കുറവുണ്ടായത്. കോവിഡ് കാലത്തും കുറഞ്ഞതുകയാണ് കിട്ടിയത്.

വൻകിട ഫണ്ടിങ് ഏജൻസിയായ 'പ്രൂഡന്റ് ഇലക്ടറൽ ട്രസ്റ്റ്' നൽകിയ തുകയിലുണ്ടായ ഗണ്യമായ കുറവാണ് തിരിച്ചടിയായത്. 2024-25 കാലത്ത് 216.34 കോടി രൂപ നൽകിയ ട്രസ്റ്റ്, 2025-26 കാലത്ത് 25 കോടി രൂപ മാത്രമാണ് നൽകിയത്. 88 ശതമാനത്തിന്റെ ഇടിവ്. ഇത്തവണത്തെ റിപ്പോർട്ടിൽ ഉൾപ്പെട്ടിട്ടുള്ള ഒരേയൊരു ഇലക്ടറൽ ട്രസ്റ്റും പ്രൂഡന്റ് മാത്രമാണ്. സ്റ്റാർ സിമന്റ്-അഞ്ചു കോടി, സജ്ജൻ ഭജങ്ക-നാലുകോടി, പ്രേംകുമാർ ഭജങ്ക-രണ്ടു കോടി എന്നിങ്ങനെ നൽകിയിട്ടുണ്ട്.

ഇലക്ടറൽ ബോണ്ടുകൾ വഴിയുള്ള വരുമാനംകൂടി പരിഗണിച്ചാൽ 2020-21-നുശേഷമുള്ള കോൺഗ്രസിന്റെ ഏറ്റവും കുറഞ്ഞ സംഭാവനയാണിത്. 20,000 രൂപയിൽ താഴെയുള്ള ചെറിയ സംഭാവനകൾ, പാർട്ടി അംഗത്വ ഫീസ്, കൂപ്പൺ വിൽപ്പന, ബാങ്ക് പലിശ എന്നിവയിലൂടെയുള്ള തുക ഇതിലില്ല. ഓഡിറ്റ് റിപ്പോർട്ടുകളിലാണ് അത് ഉൾപ്പെടുക. 2024-25-ൽ കൂപ്പൺ വിൽപ്പനയിലൂടെ മാത്രം 350.12 കോടി രൂപ പാർട്ടിക്ക് ലഭിച്ചിരുന്നു. പൂർണമായ ഓഡിറ്റ് റിപ്പോർട്ട് പുറത്തുവരുന്നതോടെ മാത്രമേ യഥാർഥ സാമ്പത്തികസ്ഥിതി വ്യക്തമാകൂ.

ബി.ജെ.പി. ബഹുദൂരം മുന്നിൽ

കഴിഞ്ഞ 12 സാമ്പത്തികവർഷങ്ങളിലെയും കണക്കിൽ ബി.ജെ.പി. തന്നെയാണ് ഫണ്ടുശേഖരണത്തിൽ ബഹുദൂരം മുന്നിൽ. 2024-25 സാമ്പത്തികവർഷത്തിൽ 20,000 രൂപയ്ക്ക് മുകളിലുള്ള സംഭാവന 6,074.02 കോടിയാണ്. കോൺഗ്രസ് സമാഹരിച്ചതുകയുടെ 12 ഇരട്ടി. എന്നാൽ, ബി.ജെ.പി.യുടെ 2025-26 വർഷത്തെ കണക്കുകൾ തിരഞ്ഞെടുപ്പ് കമ്മിഷൻ ഇതുവരെ പരസ്യപ്പെടുത്തിയിട്ടില്ല.

Content Highlights: Congress party donations above Rs 20,000 dropped by 75% to Rs 130.69 crore in the 2025-26 fiscal year., Funding fell sharply compared to Rs 517.39 crore in the 2024-25 fiscal year during the Lok Sabha elections., Prudent Electoral Trust reduced its funding significantly from Rs 216.34 crore to Rs 25 crore., BJP historically leads in fundraising with Rs 6,074.02 crore in donations for the 2024-25 period.