റഷ്യ വാക്കുപാലിച്ചില്ല, റഫാലിന് വിലക്കൂടുതൽ; ഇന്ത്യൻ സുഖോയ് വാങ്ങുന്നത് പരിഗണിച്ച് അർമേനിയ

ന്യൂഡൽഹി: ഇന്ത്യയിൽ നിർമിച്ച റഷ്യൻ യുദ്ധവിമാനം സുഖോയ് 30എംകെഐ വാങ്ങാൻ ആലോചിച്ച് അർമേനിയ. എതിരാളിയായ അസർബൈജാൻ പാകിസ്താനിൽനിന്ന് ചൈനീസ് വിമാനമായ ജെഎഫ്-17 തണ്ടർ വിമാനത്തിന്റെ 40 എണ്ണം വാങ്ങാനുള്ള തീരുമാനമെടുത്തതിനെ തുടർന്നാണ് അർമേനിയ ഇന്ത്യയിലേക്ക് ആയുധത്തിനായി നീക്കം നടത്തുന്നത്. ബ്രഹ്‌മോസ് എൻജി, അസ്ത്ര എന്നീ മിസൈലുകൾ കൂടി ഉൾപ്പെടുത്തി പരിഷ്‌കരിച്ച സുഖോയ്-30 എംകെഐ യുദ്ധവിമാനമാണ് അർമേനിയ ഇന്ത്യയിൽനിന്ന് വാങ്ങുകയെന്നാണ് റിപ്പോർട്ടുകൾ.

നേരത്തെ ഫ്രഞ്ച് യുദ്ധവിമാനമായ റഫാൽ വാങ്ങാനായിരുന്നു അർമേനിയ തീരുമാനിച്ചത്. എന്നാൽ, സാമ്പത്തിക ലാഭവും കൂടുതൽ പ്രവർത്തന മികവും കണക്കിലെടുത്താണ് ഇന്ത്യയിൽ നിർമിച്ച സുഖോയ്-30 എംകെഐ വിമാനം വാങ്ങാൻ അർമേനിയ ആലോചിക്കുന്നത്. യാഥാർഥ്യമായാൽ ഇരുരാജ്യങ്ങളും തമ്മിലുള്ള ബന്ധം കൂടുതൽ മെച്ചപ്പെടാൻ പ്രതിരോധ ഇടപാട് കാരണമായി തീരും. നിലവിൽ ഇന്ത്യയിൽനിന്ന് പിനാക റോക്കറ്റ് സംവിധാനം ഉൾപ്പെടെ ഒട്ടേറെ ആയുധങ്ങൾ അർമേനിയ വാങ്ങിയിട്ടുണ്ട്.

അസർബൈജാനുമായി 2020 മുതൽ തുടരുന്ന നഗൊർണൊ- കരാബാക്ക് യുദ്ധത്തിൽ ഇന്ത്യ അർമേനിയയുടെ പക്ഷത്താണ്. 2022-ലെ കണക്കനുസരിച്ച് ഇന്ത്യയിൽ നിന്ന് 25 കോടി ഡോളറിന്റെ ആയുധങ്ങൾ അർമേനിയ വാങ്ങിയിട്ടുണ്ട്. ടാങ്ക് വേധ മിസൈലുകളും റോക്കറ്റുകളും ആർട്ടിലറി ഷെല്ലുകളുമുൾപ്പെടെ നിരവധി ആയുധങ്ങൾ ഇന്ത്യ അർമേനിയയ്ക്ക് നൽകിയിട്ടുമുണ്ട്.

നഗൊർണൊ- കരാബാക്ക് വിഷയത്തിൽ അസർബൈജാന് പാകിസ്താന്റെ പിന്തുണയുണ്ട്. ഇതിനൊപ്പം തുർക്കിയുടേയും. ഇന്ത്യൻ ആയുധങ്ങളുടെ ബലത്തിൽ അസർബൈജാനെ അർമേനിയ പ്രതിരോധത്തിലാക്കിയതിനെ തുടർന്നാണ് ചൈനയും പാകിസ്താനും സംയുക്തമായി വികസിപ്പിച്ച ജെ.എഫ്-17 തണ്ടർ വിമാനം വാങ്ങാൻ അസർബൈജൻ തീരുമാനിച്ചത്. ഇതോടെയാണ് അർമേനിയയും വ്യോമസേനാ ശേഷി വർധിപ്പിക്കാൻ തീരുമാനിച്ചത്. 

നിലവിൽ റഷ്യൻ നിർമിത എസ്.യു-30എം യുദ്ധവിമാനമുള്ള ചെറിയൊരു വ്യോമസേനയാണ് അർമേനിയയ്ക്കുള്ളത്. എസ്.യു-30 എമ്മിന്റെ ഇന്ത്യൻ പതിപ്പാണ് എസ്.യു-30എംകെഐ. ഇതിൽ പല സാങ്കേതിക വിദ്യകളും ഇന്ത്യയുടേതാണ്. ആയുധങ്ങളും, ഇലക്ട്രോണിക് കൗണ്ടർ മെഷർമെൻസുകളുമടക്കം ഇന്ത്യ തദ്ദേശീയമായി വികസിപ്പിച്ചവയാണ് അധികവും. 

പൊതുമേഖലാ സ്ഥാപനമായ ഹിന്ദുസ്ഥാൻ എയ്‌റോനോട്ടിക്‌സ് ലിമിറ്റഡ്( എച്ച്എഎൽ) ആണ് റഷ്യയുടെ ലൈസൻസോടെ ഇന്ത്യയിൽ ഈ യുദ്ധവിമാനം നിർമിക്കുന്നത്. ആയുധങ്ങളടക്കം പൂർണസജ്ജമായ റഫാൽ വിമാനം വാങ്ങണമെങ്കിൽ അർമേനിയ കുറഞ്ഞത് ഓരോ വിമാനത്തിനും 20 കോടി ഡോളർ വീതം മുടക്കണം. എന്നാൽ റഫാലിന്റെ അത്രവരില്ലെങ്കിലും ഇന്ത്യയുടെ എസ്.യു-30 എംകെഐ കിടയറ്റതും വില കുറവുള്ളതുമാണ്. 

ഇന്ത്യയിൽനിന്ന് എത്ര യുദ്ധവിമാനങ്ങൾ വാങ്ങുമെന്നതിന്റെ വിവരങ്ങൾ പുറത്തുവന്നിട്ടില്ല. എന്നാൽ, പുതിയ യുദ്ധവിമാനങ്ങൾ വാങ്ങുന്നതിനൊപ്പം തങ്ങളുടെ നിലവിലുള്ള എസ്.യു-30എം  യുദ്ധവിമാനങ്ങൾ പരിഷ്‌കരിക്കാനും അർമേനിയ ഇന്ത്യയുടെ സഹായം തേടിയേക്കും. ഇവയിലും ഇന്ത്യയുടെ അസ്ത്ര മിസൈലും ബ്രഹ്‌മോസ് മിസൈലും ഉൾപ്പെടുത്താനുള്ള സംവിധാനങ്ങൾ കൊണ്ടുവരാൻ അർമേനിയ ആലോചിക്കുന്നു. 

പരമ്പരാഗതമായി റഷ്യയെ ആയുധങ്ങൾക്ക് വേണ്ടി ആശ്രയിച്ചിരുന്ന രാജ്യമായിരുന്ന അർമേനിയ. എന്നാൽ നഗൊർണൊ- കരാബാക്ക് വിഷയത്തിൽ റഷ്യയുടെ ഭാഗത്തുനിന്ന് വേണ്ടത്ര ആയുധ സഹായം അർമേനിയയ്ക്ക് ലഭിച്ചില്ല. യുക്രൈനുമായി നീണ്ട യുദ്ധത്തിൽ നിൽക്കുന്നതിനാൽ അർമേനിയയ്ക്കുള്ള ആയുധ വിതരണത്തിലും തടസമുണ്ടായി. നേരത്തെ ഓർഡർ ചെയ്തിരുന്ന എസ്.യു-30 എം വിമാനങ്ങൾ ഇതുവരെ റഷ്യ വിതരണം ചെയ്തിട്ടില്ല. 

ഈ സമയത്താണ് ഇന്ത്യ അർമേനിയയ്ക്ക് ആയുധ സഹായവുമായെത്തിയത്. ഇന്ത്യയിൽ നിന്ന് ആയുധങ്ങൾ വാങ്ങുമ്പോൾ അർമേനിയയ്ക്ക് പാശ്ചാത്യ രാജ്യങ്ങളുടെ ഉപരോധത്തിൽനിന്ന് രക്ഷപ്പെടുകയും ചെയ്യാം. 

അസർബൈജാൻ ജെ.എഫ്-17 തണ്ടർ വിമാനങ്ങളും ചൈനീസ് ആയുധങ്ങളുമായി എത്തുമ്പോൾ തിരിച്ചടിക്കാനാണ് ഇന്ത്യൻ നിർമിത എസ്.യു-30 എംകെഐ വിമാനങ്ങൾ വാങ്ങുക. നിലവിൽ അർമേനിയൻ വ്യോമസേനയ്ക്ക് അനുഭവപരിചയമുള്ള യുദ്ധവിമാനമാണെന്നതും കൂടുതൽ ആധുനികവത്കരിച്ചതും സവിശേഷമായ ആയുധങ്ങളുള്ളവയുമായതിനാൽ അസർബൈജാന് മേൽ നിർണായക മേധാവിത്വമുണ്ടാകുമെന്നാണ് പ്രതീക്ഷിക്കുന്നത്. 

ജെ.എഫ്-17 തണ്ടറിന് എസ്.യു-30 എംകെഐയേക്കാൾ പേലോഡ് ശേഷി കുറവാണ്. ഇതും നേരിട്ടുള്ള വ്യോമയുദ്ധത്തിൽ അർമേനിയയ്ക്ക് മുൻതൂക്കം നൽകും. നിലവിൽ ഇന്ത്യൻ വ്യോമസേനയ്ക്കായി 12 എസ്.യു-30 എംകെഐ വിമാനങ്ങൾ നിർമിച്ചുകൊണ്ടിരിക്കുകയാണ് എച്ച്എഎൽ. അർമേനിയ ആവശ്യപ്പെട്ടാൽ നിർമാണ ശേഷി വർധിപ്പിക്കാൻ എച്ച്എഎൽ തയ്യാറായേക്കും. അങ്ങനെ വന്നാൽ രാജ്യത്തിന് പുറത്തേക്ക് ആദ്യമായി യുദ്ധവിമാനം കയറ്റുമതി ചെയ്യുക എന്ന സുപ്രധാന നേട്ടം കൂടി എച്ച്എഎല്ലിന് ലഭിക്കും. 

Content Highlights: Armenia considers buying India`s Sukhoi-30MKIs, upgraded with BrahMos & Astra missiles,