ആഗോള കളക്ഷൻ 150 കോടി കടന്ന് വിശ്വനാഥ് & സൺസ്, സൂര്യയുടെ ഈ വർഷത്തെ അടുത്ത ബ്ലോക്ക് ബസ്റ്റർ

തെന്നിന്ത്യൻ താരം സൂര്യ നായകനായ ഏറ്റവും പുതിയ ചിത്രമാണ് 'വിശ്വനാഥ് ആൻഡ് സൺസ്'. വെങ്കി അറ്റ്‌ലൂരി സംവിധാനം ചെയ്ത ഈ ചിത്രം തിയേറ്ററുകളിൽ റിലീസ് ചെയ്തതു മുതൽ പ്രേക്ഷകരിൽനിന്നും നിരൂപകരിൽനിന്നും മികച്ച പ്രതികരണങ്ങളാണ് സ്വന്തമാക്കിക്കൊണ്ടിരിക്കുന്നത്. തിയേറ്ററുകളിൽ മികച്ച മുന്നേറ്റം നടത്തുന്ന ചിത്രം അഞ്ചാം ദിവസത്തോടെ ആഗോളതലത്തിൽ 150 കോടി രൂപ ഗ്രോസ് കളക്ഷൻ സ്വന്തമാക്കിയിരിക്കുകയാണ്. സൂര്യയോടൊപ്പം മമിത ബൈജു, രാധിക ശരത്കുമാർ, രവീണ ടണ്ടൻ എന്നിവരും ഈ ചിത്രത്തിൽ പ്രധാന വേഷങ്ങളിൽ എത്തുന്നു.

പുതിയ കളക്ഷൻ റിപ്പോർട്ട് പുറത്തുവന്നതോടെ 2026-ൽ പുറത്തിറങ്ങിയ തമിഴ് സിനിമകളിൽ ഏറ്റവും കൂടുതൽ കളക്ഷൻ നേടിയ ചിത്രങ്ങളിൽ മൂന്നാം സ്ഥാനത്തായിരിക്കുകയാണ് വിശ്വനാഥ് ആൻഡ് സൺസ്. അഞ്ചാം ദിവസമായ ചൊവ്വാഴ്ച ഇന്ത്യയിൽ നിന്ന് മാത്രം 6.35 കോടി രൂപ നെറ്റ് കളക്ഷൻ സ്വന്തമാക്കാൻ ചിത്രത്തിന് കഴിഞ്ഞു. വിദേശത്തുനിന്നുള്ള ഗ്രോസ് കളക്ഷനായി അഞ്ചാം ദിവസം നേടിയ 2 കോടി രൂപ കൂടി കൂട്ടിച്ചേർത്തതോടെ വിദേശത്തെ മൊത്തം കളക്ഷൻ 45 കോടി രൂപയായി ഉയർന്നു.

ഈ ചിത്രത്തിന്റെ തെലുങ്ക് പതിപ്പ് കളക്ഷന്റെ കാര്യത്തിലും പ്രേക്ഷക പങ്കാളിത്തത്തിലും തമിഴ് പതിപ്പിനേക്കാൾ മുന്നിലാണ്. അഞ്ചാം ദിവസത്തിൽ തമിഴ് പതിപ്പ് 3,054 ഷോകളിൽ നിന്നായി 3.15 കോടി രൂപ നേടിയപ്പോൾ, തെലുങ്ക് പതിപ്പ് 1,967 ഷോകളിൽ നിന്ന് 3.20 കോടി രൂപ സ്വന്തമാക്കി. തമിഴ് പതിപ്പിന് അഞ്ചാം ദിവസം മൊത്തത്തിൽ 25.46 ശതമാനം തിയേറ്റർ ഒക്യുപ്പൻസിയാണ് ഉണ്ടായിരുന്നത്. എന്നാൽ തെലുങ്ക് പതിപ്പിന് 33.98 ശതമാനം ഒക്യുപ്പൻസി രേഖപ്പെടുത്താൻ കഴിഞ്ഞു. പ്രത്യേകിച്ച് രാത്രി ഷോകളിൽ തെലുങ്ക് പതിപ്പിന് 46.50 ശതമാനം ഒക്യുപ്പൻസി ഉണ്ടായിരുന്നു.

അഞ്ചാം ദിവസത്തെ സംസ്ഥാനങ്ങൾ തിരിച്ചുള്ള ഗ്രോസ് കളക്ഷൻ പരിശോധിച്ചാൽ ആന്ധ്രാപ്രദേശും തെലങ്കാനയും ചേർന്നാണ് ഏറ്റവും കൂടുതൽ തുക സംഭാവന ചെയ്തത്; 3.50 കോടി രൂപ. തമിഴ്‌നാട്ടിൽ നിന്ന് 2.35 കോടി രൂപയും കർണാടകയിൽ നിന്ന് 78 ലക്ഷം രൂപയും ലഭിച്ചപ്പോൾ കേരളത്തിൽ നിന്ന് 55 ലക്ഷം രൂപയാണ് ചിത്രം നേടിയത്. ഇന്ത്യയിലെ മറ്റു ഭാഗങ്ങളിൽ നിന്ന് 15 ലക്ഷം രൂപ കൂടി ലഭിച്ചതോടെ അഞ്ചാം ദിവസത്തെ ആകെ ഗ്രോസ് കളക്ഷൻ 7.33 കോടി രൂപയായി ഉയർന്നു. അഞ്ചാം ദിവസവും 5,021 ഷോകളുമായി തിയേറ്ററുകളിൽ ഉറച്ചുനിന്നുകൊണ്ട് ചിത്രം ഒരു വലിയ വാണിജ്യ വിജയമായി തുടരുകയാണ്.

ഫോർച്യൂൺ ഫോർ സിനിമാസുമായി ചേർന്ന്, സിതാര എന്റർടെയ്ൻമെന്റ്‌സ് ബാനറിൽ സൂര്യദേവര നാഗവംശി, സായ് സൗജന്യ എന്നിവരാണ് നിർമിച്ചിരിക്കുന്നത്. ശ്രീകര സ്റ്റുഡിയോസ് ആണ് ചിത്രം അവതരിപ്പിക്കുന്നത്. സംവിധായകൻ വെങ്കി അറ്റ്‌ലൂരി തന്നെയാണ് ചിത്രം രചിച്ചിരിക്കുന്നതും. സൂര്യയുടെ കരിയറിലെ 46-ാം ചിത്രമായ വിശ്വനാഥ് ആൻഡ് സൺസ്, ബ്ലോക്ക്ബസ്റ്റർ ഹിറ്റായ ലക്കി ഭാസ്‌കറിന് ശേഷം വെങ്കി അറ്റ്‌ലൂരി ഒരുക്കിയ ചിത്രമാണ്. സൂര്യ ആരാധകർക്കും കുടുംബ പ്രേക്ഷകർക്കും ഒരുപോലെ ആസ്വദിക്കാവുന്ന രീതിയിലാണ് ചിത്രം ഒരുക്കിയിരിക്കുന്നത്.

Content Highlights: Suriya's latest film Viswanath & Sons, directed by Venky Atluri, has crossed the ₹150 crore mark in global gross collections within five days of its release, emerging as one of the biggest blockbusters of 2026.