ബെംഗളൂരുവിലെ തെരുവിൽ വെച്ച് ഒരാൾ പിന്നാലെ കൂടി, പറയാൻ അറയ്ക്കുന്ന പ്രവൃത്തി ചെയ്തു –നടി ദിവ്യ സുരേഷ്

ബെംഗളൂരുവിലെ ഒരു തെരുവിൽവെച്ച് തനിക്കും കസിനുമെതിരെ ഉണ്ടായ അതിക്രമത്തെക്കുറിച്ച് വെളിപ്പെടുത്തി കന്നഡ നടി ദിവ്യ സുരേഷ്. ബന്ധുവുമൊത്ത് കാറിലേക്ക് നടക്കുമ്പോൾ ഒരാൾ തന്നെ ശല്യപ്പെടുത്തിയതായി അവർ ആരോപിച്ചു. നഗരത്തിലെ സ്ത്രീകളുടെ സുരക്ഷയെക്കുറിച്ച് ആശങ്ക പ്രകടിപ്പിച്ച അവർ സംഭവം സോഷ്യൽ മീഡിയയിൽ പങ്കുവെച്ചു. ഇക്കഴിഞ്ഞ ഞായറാഴ്ച രാത്രി 11.30-ഓടെയാണ് സംഭവം നടന്നത്.

ദിവ്യയും ബന്ധുവായ പെൺകുട്ടിയും തങ്ങളുടെ കാറിനടുത്തേക്ക് നടന്നുപോകുമ്പോൾ അജ്ഞാതനായ ഒരാൾ ഇവരെ പിന്തുടരുകയായിരുന്നു. ഇയാൾ ഇവരോട് പൊതുസ്ഥലത്ത് വെച്ച് അപമര്യാദയായി പെരുമാറുകയും അശ്ലീല ആംഗ്യം കാണിക്കുകയും ചെയ്തതായി ദിവ്യ ആരോപിച്ചു. ഇക്കാര്യം ചോദ്യംചെയ്തിട്ടും അയാൾ പിന്മാറാൻ തയ്യാറായില്ല. തങ്ങൾ ഇരുവരും കാറിൽ കയറുന്നതുവരെ അയാൾ ശല്യം തുടർന്നുവെന്നും ദിവ്യ തന്റെ ഇൻസ്റ്റാഗ്രാം സ്റ്റോറിയിൽ കുറിച്ചു. "രാത്രിയിൽ നടക്കുന്നത് കൊണ്ട് മാത്രം" ഒരു സ്ത്രീയും ശല്യം നേരിടേണ്ടതില്ലെന്ന് നടി പറഞ്ഞു. അവർ ബംഗളൂരു "നാം വാഗ്ദാനം ചെയ്യപ്പെട്ട സുരക്ഷ എവിടെ?" എന്ന് പോലീസിനെ ടാഗ് ചെയ്ത് ചോദിക്കുകയും ചെയ്തു.

ഈ സംഭവത്തിന്റെ ദൃശ്യങ്ങൾ ദിവ്യ തന്റെ മൊബൈലിൽ പകർത്തുകയും അത് സോഷ്യൽ മീഡിയയിൽ പങ്കുവെക്കുകയും ചെയ്തിട്ടുണ്ട്. ഇവർ കാറിനുള്ളിൽ കയറി വാതിലുകൾ പൂട്ടിയ ശേഷവും ഇയാൾ അതിക്രമം തുടർന്നുവെന്ന് റിപ്പോർട്ടുകൾ പറയുന്നു. ഒപ്പമുണ്ടായിരുന്ന ബന്ധു പോലീസിനെ വിളിക്കാൻ ആവശ്യപ്പെടുന്നതും ആ വ്യക്തിയുടെ മോശം പെരുമാറ്റം ചൂണ്ടിക്കാണിക്കുന്നതും വീഡിയോയിൽ വ്യക്തമാണ്. കാറിൽ കയറിയ ശേഷവും ഇയാൾ തങ്ങളെ പിന്തുടർന്നുവെന്ന് ദിവ്യ വീഡിയോയിൽ പറയുന്നുണ്ട്.

2021 ൽ കളേഴ്സ് കന്നഡയിൽ സംപ്രേക്ഷണം ചെയ്ത ബിഗ് ബോസ് കന്നഡ സീസൺ 8 ലെ മത്സരാർത്ഥിയായിരുന്നു ദിവ്യാ സുരേഷ്. നന്നാ ഹെൻതി എംബിബിഎസ്, ജോഡി ഹക്കി എന്നീ കന്നഡ സീരിയലുകളിലൂടെയും അവർ പ്രശസ്തയാണ്. മുൻപ് ഒരു മോഡലായിരുന്ന ദിവ്യ സുരേഷ് 2017 ൽ മിസ് ഇന്ത്യ സൗത്ത് കിരീടം നേടി. അതേ വർഷം കന്നഡ ചിത്രമായ #9, ഹിൽട്ടൺ ക്രോസ് എന്ന ചിത്രത്തിലൂടെ സിനിമാരംഗത്തേക്ക് പ്രവേശിച്ചു. റോഡി ബേബി, കംപു ഹലാദി ഹസിരു, ഹിരണ്യ എന്നിവ അവരുടെ മറ്റ് ചിത്രങ്ങളാണ്.

Content Highlights: Raising serious concerns over women's safety in public spaces, popular Kannada television actress and former Bigg Boss Kannada contestant Divya Suresh took to social media to share a disturbing video of an unidentified man who allegedly stalked and made obscene gestures at her and her cousin late Sunday night in Bengaluru.