തർക്കങ്ങളും രാജിനീക്കങ്ങളും, CINTAA തിരഞ്ഞെടുപ്പിൽ ഉപാസനാ സിങ്ങിന് വൻവിജയം, പൂനം ധില്ലണും പദ്മിനി കോലാപുരിക്കും തിരിച്ചടി
സിനി ആന്റ് ടിവി ആർട്ടിസ്റ്റ്സ് അസോസിയേഷൻ (CINTAA) പുനർതിരഞ്ഞെടുപ്പ് ഫലം പുറത്തുവന്നപ്പോൾ വൻവിജയം നേടി ഉപാസന സിങ്. 360 വോട്ടുകൾ നേടിയാണ് ഉപാസന വിജയികളുടെ പാനലിൽ ഒന്നാമതെത്തിയത്. 357 വോട്ടുകൾ നേടിയ സാഹില ഛദ്ദ തൊട്ടുപിന്നിൽ രണ്ടാം സ്ഥാനത്തെത്തി. പൂനം ധില്ലൺ, പത്മിനി കോലാപുരി എന്നിവരുമായുണ്ടായ കടുത്ത തർക്കങ്ങൾക്കും ഭരണസമിതിയിലെ രാജിനീക്കങ്ങൾക്കും ശേഷമാണ് സെപ്റ്റംബർ 12-ന് ഈ വോട്ടെടുപ്പ് നടന്നത്.
സിന്റായുടെ എക്സിക്യൂട്ടീവ് കമ്മിറ്റിയിൽ നിന്നുണ്ടായ തുടർച്ചയായ രാജികളെത്തുടർന്ന് ഫെഡറേഷൻ ഓഫ് വെസ്റ്റേൺ ഇന്ത്യ സിനി എംപ്ലോയീസ് (FWICE) ഇടപെട്ടാണ് പുതിയ തിരഞ്ഞെടുപ്പ് നടത്താൻ ആവശ്യപ്പെട്ടത്. ഉപാസന സിങ്ങും മുൻ ഭാരവാഹികളായ പൂനം ധില്ലൺ, പദ്മിനി കോലാപുരെ എന്നിവരും തമ്മിലുണ്ടായ കടുത്ത പരസ്യ തർക്കങ്ങളുടെയും രാജികളുടെയും പശ്ചാത്തലത്തിലാണ് സംഘടനയിൽ പുനർതിരഞ്ഞെടുപ്പ് വേണ്ടിവന്നത്.
വിജയിച്ച പാനലിൽ ഉൾപ്പെട്ട മറ്റ് പ്രമുഖരിൽ വികാസ് വർമ്മ (349 വോട്ടുകൾ), ദീപക് പരാശർ (348 വോട്ടുകൾ), കുനിക സദാനന്ദ് (312 വോട്ടുകൾ), വർഷ ഉസ്ഗാവ്കർ ശർമ്മ (306 വോട്ടുകൾ), നഗ്മ മൊറാർജി (290 വോട്ടുകൾ) എന്നിവരും ഉൾപ്പെടുന്നു. തങ്ങളുടെ പാനലിൽ വിശ്വസിച്ച് വോട്ട് രേഖപ്പെടുത്തിയ എല്ലാ സിന്റാ അംഗങ്ങൾക്കും നന്ദി അറിയിച്ചുകൊണ്ട് നഗ്മ ഇൻസ്റ്റാഗ്രാമിൽ കുറിപ്പ് പങ്കുവെച്ചു.
പുനർതിരഞ്ഞെടുപ്പ് തടയണമെന്ന് ആവശ്യപ്പെട്ട് പൂനം ധില്ലണും പദ്മിനി കോലാപുരിയും കോടതിയെ സമീപിച്ചെങ്കിലും കോടതി ആ ഹർജി തള്ളി. വോട്ടെടുപ്പിന് തൊട്ടുമുമ്പ് സിന്റാ ഓഫീസിൽ നിന്ന് ഔദ്യോഗിക രേഖകൾ നീക്കം ചെയ്യാൻ ശ്രമിച്ചതായി ആരോപണമുയരുകയും, തുടർന്ന് വർസോവ പോലീസ് സ്റ്റേഷനിൽ പരാതി നൽകുകയും ചെയ്തിരുന്നു. എന്നാൽ അംഗങ്ങളുടെ വ്യക്തിഗത വിവരങ്ങൾ സംരക്ഷിക്കാനാണ് പോലീസ് സാന്നിധ്യം തേടിയതെന്നാണ് ഇരുവിഭാഗവും വ്യക്തമാക്കിയത്.
Also Read: നടി പൂനം ധില്ലന് ഡെങ്കിപ്പനി, ആശുപത്രിയിൽ പ്രവേശിപ്പിച്ചു, സുഖം പ്രാപിക്കുന്നെന്ന് റിപ്പോർട്ട്
തിരഞ്ഞെടുപ്പ് വിജയത്തിനുശേഷം തങ്ങളുടെ ഭാവി പ്രവർത്തനങ്ങളെക്കുറിച്ച് വിജയികൾ പ്രതികരിച്ചു. തനിക്ക് ലഭിച്ച മികച്ച വോട്ട് നേട്ടം അപ്രതീക്ഷിതമാണെന്നും ഇനി അംഗങ്ങൾക്കായി ഒന്നിച്ചു പ്രവർത്തിക്കുകയാണ് ലക്ഷ്യമെന്നും ദീപക് പരാശർ പറഞ്ഞു. അംഗങ്ങൾ അർപ്പിച്ച വിശ്വാസ്യത തെളിയിക്കാനുള്ള യഥാർത്ഥ പോരാട്ടവും ജോലിയുമാണ് ഇനി ആരംഭിക്കുന്നതെന്ന് കുനിക സദാനന്ദും വ്യക്തമാക്കി.
Content Highlights: Actress Upasana Singh secured a massive victory by topping the CINTAA executive committee elections with 360 votes following a period of intense internal disputes, court battles, and resignations involving former office bearers Poonam Dhillon and Padmini Kolhapure.