സ്വാർഥതയ്ക്ക് വേണ്ടി സിനിമാ വ്യവസായത്തെ മുഴു‌വൻ നാണം കെടുത്തി; ഖുശ്ബുവിനെതിരേ രഞ്ജിനി

കോൺഗ്രസിൽനിന്ന് രാജിവെച്ച നടി ഖുശ്ബു ബിജെപിയിൽ ചേർന്ന വിഷയത്തിൽ പ്രതികരണവുമായി നടി രഞ്ജിനി. സ്വന്തം സ്വാർഥതയ്ക്ക് വേണ്ടി സിനിമാ വ്യവസായത്തെ മുഴുവൻ ഖുശ്ബു നാണം കെടുത്തി എന്ന് രഞ്ജിനി പ്രതികരിച്ചു

''ബിജെപിയിൽ ചേർന്ന എന്റെ പ്രിയ സഹപ്രവർത്തക ഖുശ്ബുവിനെ അഭിനന്ദിക്കണോ എന്ന് എനിക്ക് നിശ്ചയമില്ല. .. ഡിഎംകെ, എ.ഐ.എ.ഡി.എം.കെ( താത്‌പര്യം കാണിച്ചു പക്ഷേ അം​ഗത്വമെടുത്തില്ല), കോൺ​ഗ്രസ്,. ഇന്നലെ ബിജെപി. അത്ഭുതപ്പെടേണ്ടതില്ല അടുത്തതായി സിപിഐഎംമിലേക്ക് ഖുശ്ബു ചേക്കേറും. രാഷ്ട്രീയത്തിൽ ക്ഷമ അത്യാവശ്യമാണ്. അതിലേറെ പ്രത്യയശാസ്ത്രവും പ്രധാനമാണ്. നിങ്ങൾ ആഗ്രഹിക്കുന്ന സ്ഥാനം മാത്രമാവരുത് രാഷ്ട്രീയം.

നമ്മുടെ പ്രധാനമന്ത്രിയേയും അദ്ദേഹത്തിന്റെ പാർട്ടിയേയും നിങ്ങൾ അപലപിച്ചത് കഴിഞ്ഞ ദിവസമാണ്. അതേ നിങ്ങൾ തന്നെ ഇന്ത്യയെ നയിക്കാൻ മോദിജി മാത്രമാണ് ശരിയായ വ്യക്തിയെന്ന് അഭിപ്രായപ്പെട്ടതും കേട്ടു. അത് ഏറെ നിരാശാജനകമാണ്. നിങ്ങൾ അവസരവാദിയാണെന്നല്ലേ ഇത് തെളിയിക്കുന്നത്.

പക്വതയില്ലാത്ത പ്രസ്താവനകളുടെ പേരിൽ മറ്റ് മേഖലകളിലെ ആളുകൾ അഭിനേതാക്കളെ കളിയാക്കുന്നതിൽ അതിശയിക്കാനില്ല.ഇന്ന് നിങ്ങളുടെ സ്വാർഥതയ്ക്ക് വേണ്ടി നിങ്ങൾ സിനിമാ വ്യവസായത്തെ മുഴുവൻ നാണംകെടുത്തി''- രഞ്ജിനി ഫെയ്സ്ബുക്കിൽ കുറിച്ചു

ഡൽഹിയിൽ ബിജെപി ദേശീയ ആസ്ഥാനത്ത് നടന്ന ചടങ്ങിലാണ് ഖുശ്ബു ബിജെപിയിൽ ഔദ്യോഗികമായി അംഗത്വമെടുത്തത്. സംസ്ഥാന ചുമതലയുള്ള ജനറൽ സെക്രട്ടറിയും കേന്ദ്ര മന്ത്രിയുമായ സി.ടി. രവിയിൽനിന്നാണ് അവർ അംഗത്വമെടുത്തത്.

പാർട്ടിക്കുവേണ്ടി പ്രവർത്തിക്കാൻ താൻ ആഗ്രഹിക്കുന്നെങ്കിലും തനിക്ക് പ്രവർത്തിക്കാൻ സാധിക്കാത്ത സാഹചര്യമാണ് നിലവിലുള്ളതെന്ന് ചൂണ്ടിക്കാട്ടിയാണ് ഖുശ്ബു സോണിയാ ഗാന്ധിക്ക് രാജിക്കത്ത് നൽകിയത്. അടിസ്ഥാന യാഥാർഥ്യങ്ങളുമായി ബന്ധമില്ലാത്ത, ജനസമ്മതിയില്ലാത്ത ചിലരാണ് പാർട്ടിയിൽ കാര്യങ്ങൾ തീരുമാനിക്കുന്നതെന്നും പാർട്ടിക്കുവേണ്ടി പ്രവർത്തിക്കാൻ ആഗ്രഹിക്കുന്ന തന്നേപ്പോലുള്ളവർ തഴയപ്പെടുന്നെന്നും അവർ രാജിക്കത്തിൽ ചൂണ്ടിക്കാണിച്ചിരുന്നു.

Content Highlights : Actress Ranjini against Khushboo Joins BJP

Content Highlights: