ആനക്കൊമ്പുകളുടെ വിവരങ്ങൾ വനംവകുപ്പിന് കൈമാറി മോഹൻലാൽ, കയ്യിലുള്ളത് 2 കൊമ്പുകളും 13 കരകൗശലവസ്തുക്കളും

ആനക്കൊമ്പ് കേസുമായി ബന്ധപ്പെട്ട് നടൻ മോഹൻലാൽ തന്റെ കൈവശമുള്ള ആനക്കൊമ്പുകളുടെ വിവരങ്ങൾ വനംവകുപ്പിന് ഔദ്യോഗികമായി കൈമാറി. ഏറെ നാളായി തുടരുന്ന ഈ നിയമപ്രശ്നത്തിൽ പരിഹാരം കാണുന്നതിന്റെ ഭാഗമായി വനംവകുപ്പ് പ്രഖ്യാപിച്ച ഒറ്റത്തവണ ഡിക്ലറേഷൻ നടപടിയുടെ അടിസ്ഥാനത്തിലാണ് ഈ നീക്കം. വനംവകുപ്പ് ഉദ്യോഗസ്ഥർ മോഹൻലാലിന്റെ വീട്ടിലെത്തിയാണ് ഇതുമായി ബന്ധപ്പെട്ട വിശദാംശങ്ങൾ ശേഖരിച്ചത്.

തന്റെ കൈവശമുള്ള രണ്ട് ജോഡി ആനക്കൊമ്പുകളെക്കുറിച്ചും ആനക്കൊമ്പിൽ തീർത്ത 13 കരകൗശല വസ്തുക്കളെക്കുറിച്ചുമുള്ള വിവരങ്ങളാണ് മോഹൻലാൽ കൈമാറിയത്. കൊച്ചിയിലെ അദ്ദേഹത്തിന്റെ വീട്ടിലെത്തി വനംവകുപ്പ് തയ്യാറാക്കിയ ഈ വിവരങ്ങൾ അടങ്ങിയ ഇൻവെന്ററി റിപ്പോർട്ട് ഇനി തുടർനടപടികൾക്കായി മേലുദ്യോഗസ്ഥർക്ക് സമർപ്പിക്കും. ഈ വസ്തുക്കൾ എങ്ങനെ കൈവശം വന്നു എന്നത് സംബന്ധിച്ച വിശദീകരണങ്ങളും അദ്ദേഹം അധികൃതർക്ക് നൽകിയിട്ടുണ്ട്.

വർഷങ്ങൾക്ക് മുമ്പ് മോഹൻലാലിന്റെ വീട്ടിൽ ആദായനികുതി വകുപ്പ് നടത്തിയ പരിശോധനയിലാണ് ഈ ആനക്കൊമ്പുകൾ കണ്ടെത്തിയത്. അന്ന് വനംവകുപ്പ് ഇവ കസ്റ്റഡിയിലെടുക്കുകയും ഉടമസ്ഥാവകാശം സംബന്ധിച്ച തർക്കങ്ങൾ ഉടലെടുക്കുകയും ചെയ്തു. പിന്നീട് മോഹൻലാലിന് ഉടമസ്ഥാവകാശം ലഭിച്ചെങ്കിലും, കൃത്യമായ നടപടിക്രമങ്ങൾ പാലിക്കാത്തതിനാൽ ഹൈക്കോടതി ആ ഉടമസ്ഥാവകാശം റദ്ദാക്കുകയായിരുന്നു.

ഹൈക്കോടതിയുടെ ഇടപെടലിനെത്തുടർന്ന്, വന്യജീവി ഉൽപ്പന്നങ്ങൾ കൈവശമുള്ളവർക്ക് അത് വെളിപ്പെടുത്താൻ വനംവകുപ്പ് പ്രത്യേക നോട്ടിഫിക്കേഷൻ പുറപ്പെടുവിച്ചിരുന്നു. ഈ പദ്ധതി പ്രകാരം വന്യജീവി ഉൽപ്പന്നങ്ങൾ സ്വയം വെളിപ്പെടുത്തുന്നവർക്ക് (Self-declaration) നിയമനടപടികളിൽ നിന്ന് പരിരക്ഷ നേടാൻ സാധിക്കും. ഈ സൗകര്യം പ്രയോജനപ്പെടുത്തിയാണ് മോഹൻലാൽ ഇപ്പോൾ അപേക്ഷ നൽകിയിരിക്കുന്നത്.

വനംവകുപ്പ് തയ്യാറാക്കിയ റിപ്പോർട്ടിന്റെ അടിസ്ഥാനത്തിൽ ചീഫ് വൈൽഡ് ലൈഫ് വാർഡൻ ആയിരിക്കും ഉടമസ്ഥാവകാശം സംബന്ധിച്ച അന്തിമ തീരുമാനം എടുക്കുക. റിപ്പോർട്ടിലെ വിവരങ്ങളും മറ്റ് നിയമപരമായ വശങ്ങളും പരിശോധിച്ച ശേഷമായിരിക്കും മോഹൻലാലിന് ഉടമസ്ഥാവകാശം നൽകുന്ന കാര്യത്തിൽ തീരുമാനമുണ്ടാകുക.

Content Highlights: In a crucial turn of events regarding the long-drawn illegal wildlife possession controversy, Malayalam superstar Mohanlal has officially handed over detailed documentation of the elephant tusks and ivory artifacts in his possession to the Kerala Forest Department. The move comes as part of a one-time self-declaration window notified by the Forest Department, following string of legal battles and previous High Court interventions.