‘ബൈബിളിൽ നിന്നുള്ള യൂറോപ്പിന്റെ പലായനം’; സ്യൂട്ടയിലേക്ക് നീന്തിക്കയറിയ 50000 പേർ നമ്മോട് പറയുന്നത്..

കളമശ്ശേരി മുനിസിപ്പൽ അതിർത്തിയിലുള്ളത്ര ജനസംഖ്യയേ ജിബ്രാൾട്ടർ കടലിടുക്കിലേക്ക് മൂക്ക് നീട്ടിനിൽക്കുന്ന ഉത്തരാഫ്രിക്കൻ നഗരമായ സ്യൂട്ടയിലുള്ളൂ, എൺപതിനായിരം പേർ. അവിടേയ്ക്കാണ് ആഗസ്ത് മാസത്തിലെ ആദ്യദിവസങ്ങളിലൊന്നിൽ അൻപതിനായിരം പേർ കടൽ നീന്തി കരയ്ക്കണഞ്ഞത്. സ്പാനിഷ് അധീനതയിലുള്ള സ്യൂട്ട ആഫ്രിക്കയിലെ യൂറോപ്യൻ നഗരമാണ്. അസ്തമിച്ച യൂറോപ്യൻ സാമ്രാജ്യത്വം മരിക്കുന്നതിന് മുമ്പ് എടുത്തുപോകാൻ മറന്നുപോയ ഒരു നിമിഷംപോലെയാണ് സ്യൂട്ട. അവിടേയ്ക്കാണ് മൊറോക്കോയിൽ നിന്ന് അർദ്ധനഗ്‌നരായ പതിനായിരങ്ങൾ എത്തിച്ചേർന്നത്. കടൽത്തീരത്തെ കമ്പിവേലികളിൽ അള്ളിപ്പിടിച്ച് ഒരു യുവാവ് സ്പാനിഷ് പോലീസിനോട് പറയുന്നതു കേട്ടു, 'കഴിഞ്ഞ ഇരുപത്തിനാലു മണിക്കൂറായി നീന്തുകയായിരുന്നു. ഒന്നും കഴിച്ചിട്ടില്ല. വിശക്കുന്നു'.

ക്രൂശിലെ ക്രിസ്തുവിനെ ഓർമ്മിപ്പിക്കുന്ന വിധം ക്ഷീണിതനായി അരയിലെ ഒറ്റമുണ്ടിൽ കണ്ട ആ യുവാവിന്റെ വിശപ്പ് ഒരു മനുഷ്യന്റെ വിശപ്പു മാത്രമായിരുന്നില്ല. നീന്തിനീന്തി തളർന്ന ആ മനുഷ്യരൂപം ഇന്നത്തെ ലോകം അഭയാർത്ഥികളെ കാണുന്ന രീതിയെക്കുറിച്ചുള്ള ഒരു ചോദ്യമായി മാറി.