ഭര്‍ത്താവ് ജോലിക്ക് പോകുമ്പോള്‍ താനാണ് കുഞ്ഞിനെ നോക്കേണ്ടതെന്ന് ഭാര്യ മനസിലാക്കണം -സുനില്‍ ഷെട്ടി
ക്ഷമയില്ലായ്മയാണ് ഇന്നത്തെ കാലത്ത് വിവാഹജീവിതത്തെ ബാധിക്കുന്നതെന്ന് ബോളിവുഡ് താരം സുനില്‍ ഷെട്ടി. മാറിമറിയുന്ന കുടുംബബന്ധങ്ങളെ കുറിച്ചുള്ള തന്റെ കാഴ്ചപ്പാടുകള്‍ പങ്കുവെക്കവെയാണ് അദ്ദേഹം ഇക്കാര്യം പറഞ്ഞത്. വിട്ടുവീഴ്ച ചെയ്തും പരസ്പരം മനസിലാക്കിയും വേണം ജീവിക്കാനെന്നും അദ്ദേഹം പറഞ്ഞു. പിങ്ക് വില്ലയോട് സംസാരിക്കുകയായിരുന്നു താരം.
'ഇന്നത്തെ കുട്ടികള്‍ക്ക് തീരെ ക്ഷമയില്ല. വിവാഹം കഴിഞ്ഞ് കുറച്ചുകാലം കഴിഞ്ഞാല്‍ ജീവിതം പരസ്പരം മനസിലാക്കിയും കരുതലേകിയും വിട്ടുവീഴ്ച ചെയ്തും മുന്നോട്ട് പോകേണ്ടതാണെന്ന് മനസിലാകും.' -സുനില്‍ ഷെട്ടി പറഞ്ഞു.
'അപ്പോഴാണ് ഒരു കുഞ്ഞ് കൂടി വരുന്നത്. ഭര്‍ത്താവ് ജോലിക്ക് പോകുകയാണെങ്കില്‍ താനാണ് കുഞ്ഞിനെ നോക്കേണ്ടതെന്ന് ഭാര്യ മനസിലാക്കണം. തീര്‍ച്ചയായും ഭര്‍ത്താവിനും അതില്‍ ഉത്തരവാദിത്തമുണ്ട്. എന്നാല്‍ ഈ കാലത്ത് എല്ലാത്തിലും വലിയ സമ്മര്‍ദ്ദമാണ് ഉള്ളത്.' -അദ്ദേഹം തുടര്‍ന്നു.
ഡിജിറ്റല്‍ ലോകത്ത് നിന്ന് ലഭിക്കുന്ന ഉപദേശങ്ങള്‍ക്കെതിരെയും സുനില്‍ ഷെട്ടി തുറന്നടിച്ചു. 'ഇന്ന് എല്ലാവരും ഉപദേശം നല്‍കുന്നു. എങ്ങനെ നല്ലൊരു അമ്മയാകണം, നല്ലൊരു അച്ഛനാകണം, എന്ത് കഴിക്കണം, എന്ത് ചെയ്യണം എന്നെല്ലാം വെര്‍ച്വല്‍ ലോകമാണ് പറഞ്ഞുതരുന്നത്. എന്നാല്‍ അനുഭവങ്ങളില്‍ നിന്ന് പഠിക്കുന്നതാണ് നല്ലതെന്നാണ് ഞാന്‍ വിശ്വസിക്കുന്നത്. നിങ്ങളുടെ മുത്തശ്ശിയില്‍ നിന്ന്, അമ്മയില്‍ നിന്ന്, സഹോദരിമാരില്‍ നിന്ന്... ഏതാണോ നിങ്ങള്‍ക്ക് അനുയോജ്യമായത്, അത് തിരഞ്ഞെടുക്കുക. ബാക്കിയുള്ളതെല്ലാം ഉപേക്ഷിക്കുക. ഇപ്പോള്‍ വിവാഹത്തിന് മുമ്പ് ആളുകള്‍ വിവാഹമോചിതരാകുകയാണ്.' -സുനില്‍ ഷെട്ടി പറഞ്ഞു.
Content Highlights: Suniel Shetty says wife needs to understand she has to take care of child if husband building career