ഒന്നും വലിച്ചെറിയല്ലേ.... നാളത്തെ നല്ല പൗരന്മാരാകാൻ ശീലിപ്പിക്കേണ്ട കാര്യങ്ങൾ

അമ്മയ്ക്കും അച്ഛനുമൊപ്പം ബസിൽ പോകുകയായിരുന്നു ശങ്കു. ഇടയ്ക്ക് അവൻ പോക്കറ്റിൽ നിന്ന് മിഠായി എടുത്ത് കഴിച്ചു. എന്നിട്ട് മിഠായി കവർ പുറത്തേക്ക് വലിച്ചെറിഞ്ഞു. ഇങ്ങനെയാണ് പല കുട്ടികളും. പൊതുസ്ഥലങ്ങളിൽ പാലിക്കേണ്ട മര്യാദകളെക്കുറിച്ച് അവർക്കറിയില്ല. ഇതുമായി ബന്ധപ്പെട്ട് ചില കാര്യങ്ങൾ കുട്ടികൾക്ക് മുതിർന്നവർ പറഞ്ഞുകൊടുത്തേ പറ്റൂ.

മിഠായി കവറുകൾ, ജ്യൂസിന്റെ പാക്കറ്റുകൾ, പ്ലാസ്റ്റിക്ക് ബോട്ടിലുകൾ എന്നിവയൊക്കെ പൊതുസ്ഥലങ്ങളിൽ വലിച്ചെറിയരുതെന്ന് കുഞ്ഞുങ്ങൾക്ക് പറഞ്ഞുകൊടുക്കണം.

വേസ്റ്റ് ബാസ്‌ക്കറ്റുകൾ ഇല്ലാത്ത സ്ഥലങ്ങളാണെങ്കിൽ അവ കൈയിൽ തന്നെ സൂക്ഷിക്കാൻ നിർദേശിക്കാം. പൊതുസ്ഥലങ്ങളിൽ തുപ്പരുതെന്നും പറയണം.

സിനിമാതീയേറ്ററുകൾ, പാർക്കുകൾ എന്നിവിടങ്ങളിലൊക്കെയുള്ള ബാത്ത്റൂമുകൾ വൃത്തിയായി കൈകാര്യം ചെയ്യാൻ നിർദേശിക്കണം.

എവിടെയായാലും ലൈറ്റുകൾ അനാവശ്യമായി ഓണാക്കി ഇടരുതെന്ന് പറയണം.

ചുമരുകളിൽ ചെരുപ്പിട്ട കാലുകൊണ്ട് ചവിട്ടുകയോ കുത്തിവരയ്ക്കുകയോ ചെയ്യരുതെന്ന് പറഞ്ഞുകൊടുക്കണം.

കുട്ടിക്കാലത്ത് ശീലിക്കുന്ന ഇത്തരം മര്യാദകൾ അവർ ജീവിതകാലം മുഴുവൻ ഓർത്തുവയ്ക്കും. ഭാവിയിലെ നല്ല പൗരന്മാരായി വളർന്നുവരാൻ അതുവരെ സഹായിക്കും.

Content Highlights: Teach children not to throw candy wrappers and plastic bottles in public places., Instruct kids to keep waste in their hands until they find a dustbin.