കോഴിക്കോട്ടെ മാതൃഭൂമി ഓഫീസിലെത്തിയ ഗാന്ധിജി...

1923 മാർച്ച് 18 നാണ് മാതൃഭൂമി പത്രം ആദ്യമായി അച്ചടിച്ചത്. ഗാന്ധിജിയെ കൊളോണിയൽ ഭരണകൂടം അറസ്റ്റുചെയ്ത് ആറുവർഷത്തെ തടവിന് ശിക്ഷിച്ചുകൊണ്ട് ജയിലിലടച്ചത് 1922 മാർച്ച് 18 നായിരുന്നു. ഈ സംഭവത്തിന് ഒരുവർഷം തികയുന്ന അന്നുതന്നെ മാതൃഭൂമി ആദ്യമായി പ്രസിദ്ധീകരണം ആരംഭിച്ചു.

1934-ൽ, തന്റെ നാലാം കേരളസന്ദർശനത്തിനിടെയാണ് ഗാന്ധിജി മാതൃഭൂമി ഓഫീസിലെത്തിയത്. ഹരിജനോദ്ധാരണത്തിന് ഫണ്ട് ശേഖരിക്കാനും ഖാദി പ്രചാരണത്തിനുമായാണ് അദ്ദേഹം കേരളത്തിലെ വിവിധ സ്ഥലങ്ങൾ സന്ദർശിച്ചത്. ജനുവരി 13-ന് അദ്ദേഹം കോഴിക്കോട്ടെത്തി.

കോഴിക്കോട് ടൗൺഹാളിൽ, മാതൃഭൂമിയുടെ പ്രഥമ മാനേജിങ് ഡയറക്ടറായ കെ. മാധവൻനായരുടെ ഛായാപടം അനാച്ഛാദനം ചെയ്തശേഷം വൈകീട്ട് 7.15-ന് അദ്ദേഹം മാതൃഭൂമി ഓഫീസ് സന്ദർശിച്ചു. മാതൃഭൂമി ഓഫീസിലും കെ.മാധവൻനായരുടെ ഛായാപടം അനാച്ഛാദനം ചെയ്തു.

ഗാന്ധിജിയുടെ രക്തം വീണ മണ്ണ് മാതൃഭൂമി ഓഫീസിൽ ഇന്നും പവിത്രമായി സൂക്ഷിക്കുന്നു.

Content Highlights: Mathrubhumi first published on March 18, 1923, exactly one year after Gandhi's arrest in 1922.