'അന്ന് വിമാന ദുരന്തമുണ്ടായപ്പോള് ഓടിയെത്തിയവരാണ്, ഇന്ന് ഞങ്ങളുടെ മണ്ണും വീടും ആര് രക്ഷിക്കും?'
കരിപ്പൂരില് വിമാനം തകര്ന്ന് 21 പേരുടെ ജീവന് നഷ്ടപ്പെട്ടിട്ട് ഓഗസ്റ്റ് ഏഴിന് മൂന്ന് വര്ഷം പൂര്ത്തിയാകുന്നു. അന്ന് രക്ഷാപ്രവര്ത്തനത്തില് പങ്കെടുത്ത് 'മലപ്പുറം മോഡല്' എന്ന പേരില് ലോകത്തിനുതന്നെ മാതൃക സൃഷ്ടിച്ചവര് ഇന്ന്, പക്ഷേ, കുടിയിറക്കലിന്റെ ആശങ്കയിലും അനിശ്ചിതത്വത്തിലുമാണ് ജീവിക്കുന്നത്. വിമാനദുരന്തത്തിലെ രക്ഷാപ്രവര്ത്തനത്തിന്റെ പേരില് ആദരിക്കപ്പെട്ടവര്ക്ക് ഇന്ന് അതേ വിമാനത്താവളത്തിന്റെ പേരില് വീടും നാടും നഷ്ടപ്പെടേണ്ടി വരുന്ന അവസ്ഥയാണ് കരിപ്പുരിൽ.
കൊണ്ടോട്ടി നഗരസഭയില് ഉള്പ്പെട്ട നെടിയിരുപ്പ് വില്ലേജിലെ 30, 31 വാര്ഡുകളില്നിന്നും പള്ളിക്കല് പഞ്ചായത്തിലെ 6, 7 വാര്ഡുകളുടെ പരിധിയില്നിന്നുമാണ് 14.5 ഏക്കര് ഭൂമി ഏറ്റെടുക്കുന്നത്. ദുരന്തത്തിനു ശേഷം 'വിമാനാപകടങ്ങള് എങ്ങനെ കുറയ്ക്കാം' എന്ന് അന്വേഷിച്ച വിദഗ്ധ സമിതിയുടെ റിപ്പോര്ട്ടിന്റെ അടിസ്ഥാനത്തില് 'റണ്വേ എന്ഡ് സേഫ്റ്റി ഏരിയ'യുടെ നീളം കൂട്ടാനാണ് ഈ ഭൂമി ഉപയോഗിക്കുന്നത്. 64 വീടുകള്ക്കു പുറമെ 28 പ്ലോട്ടുകള്, രണ്ട് അങ്കണവാടികള്, ഒരു ടര്ഫ് അടക്കം 94 വസ്തുവകകളാണ് ഏറ്റെടുക്കാനുള്ളത്. ഇതില് 50 വീടുകള് നെടിയിരുപ്പ് വില്ലേജിലെ പാലക്കാപ്പറമ്പിലാണ് ഉള്പ്പെടുന്നത്. ഈ കുടുംബങ്ങളെല്ലാം അന്ന് രക്ഷാപ്രവര്ത്തനത്തിനായി ഓടിയെത്തിയവരും ഒന്നിലധികം തവണ കുടിയിറക്കപ്പെടലിന് ഇരയാകേണ്ടി വന്നവരുമാണ്. പുതുതായി സര്ക്കാര് പ്രഖ്യാപിക്കുന്ന പുനരധിവാസ പാക്കേജില് എത്ര പണം ഉള്പ്പെടുത്തിയാലും ജനിച്ച വീടും നാടും വിട്ടുപോകാന് തയ്യാറല്ലെന്നാണാണ് ഇവര് പറയുന്നത്.
Content Highlights: karipur airport land acquisition story