ഇന്ത്യയില്നിന്ന് റഷ്യയിലേക്ക് നീളുന്ന വ്യാപാര പാത; തുരങ്കം വെയ്ക്കുമോ ചൈന?
അന്താരാഷ്ട്ര സമൂഹത്തിന്റെ വ്യത്യസ്ത ഉപരോധങ്ങളില് വീര്പ്പുമുട്ടുന്നതിനിടയിലും നിര്ണായകമായ ഒരു കരാറില് ഒപ്പുവെച്ചിരിക്കുകയാണ് റഷ്യയും ഇറാനും. ഇന്റര്നാഷണല് നോര്ത്ത്-സൗത്ത് ട്രാന്സിറ്റ് കോറിഡോര് ( International North–South Transport Corridor ഐ.എന്.എസ്.ടി.സി.) വികസനത്തില് നിര്ണായക ചുവടുവെപ്പായ റാഷ്ത്-അസ്താര (Rasht–Astara) റെയില്പ്പാതയുടെ നിര്മാണ കരാറിലാണ് ഇരുരാജ്യങ്ങളും ഒപ്പുവച്ചത്. റഷ്യന് പ്രസിഡന്റ് വ്ളാദിമിര് പുതിനും ഇറാന് പ്രസിഡന്റ് ഇബ്രാഹം റെയ്സിയും പങ്കെടുത്ത വെര്ച്വല് ചടങ്ങില് ഇരുരാജ്യങ്ങളുടെയും ഗതാഗത മന്ത്രിമാരാണ് കരാറില് ഒപ്പുവച്ചത്. കരാര് പ്രകാരം, 162 കിലോ മീറ്റര് ദൈര്ഘ്യമുള്ള റെയില്പാതയുടെ നിര്മാണത്തിനായി റഷ്യ 1.6 ബില്യണ് യൂറോ നിക്ഷേപിക്കും. ഈ വര്ഷമാദ്യം, ഇറാനിയന് ഗതാഗത-നഗരവികസന മന്ത്രി മെഹര്ദാദ് ബസര്പാഷ് റഷ്യന് പ്രസിഡന്റിന്റെ പ്രത്യേക പ്രതിനിധി ഇഗോര് ലെവിറ്റിനെ സന്ദര്ശിച്ച് ഇരു രാജ്യങ്ങളും തമ്മിലുള്ള റെയില്വേ സഹകരണത്തിന്റെ പുരോഗതി ചര്ച്ച ചെയ്തതിന് പിന്നാലെയാണ് കരാറിലേക്ക് എത്തുന്നത്.
നോര്ത്ത്-സൗത്ത് ട്രാന്സ്പോര്ട്ട് കോറിഡോറിന്റെ ഭാഗമായ റാഷ്ത്-അസ്താര റെയില്വേ ലൈന് ആഗോള ഗതാഗതത്തെ വൈവിധ്യവത്കരിക്കാന് സഹായിക്കുമെന്നാണ് ചടങ്ങില് പുതിന് പറഞ്ഞത്. കാസ്പിയന് കടല് തീരത്തുകൂടിയുള്ള 162 കിലോ മീറ്റര് റെയില്പ്പാത ബാള്ട്ടിക് കടലിലെ റഷ്യന് തുറമുഖങ്ങളെ, ഇന്ത്യന് മഹാസമുദ്രത്തിലെ ഇറാനിയന് തുറമുഖങ്ങളുമായി ബന്ധിപ്പിക്കാന് സഹായിക്കുമെന്നും അദ്ദേഹം പറഞ്ഞു. റഷ്യയും ഇറാനും തമ്മിലുള്ള സഹകരണത്തിലെ സുപ്രധാനവും തന്ത്രപരവുമായ ചുവടുവെപ്പെന്നാണ് കരാറിനെ ഇറാനിയന് പ്രസിഡന്റ് ഇബ്രാഹം റെയ്സി വിശേഷിപ്പിച്ചത്. പാശ്ചാത്യ ഉപരോധങ്ങള് റഷ്യയേയും ഇറാനേയും തങ്ങളുടെ രാഷ്ട്രീയവും സാമ്പത്തികവുമായ ബന്ധം ശക്തിപ്പെടുത്താന് പ്രേരിപ്പിച്ചുവെന്നും അദ്ദേഹം പറഞ്ഞു.
Content Highlights: Is China Hitting Back at India’s North South Transport Corridor Plans?